អ្នកស្លាប់ដោយសារព្យុះទីហ្វុង Bualoi ក្នុងប្រទេសវៀតណាមកើនដល់១៩នាក់

យោងតាមការចេញផ្សាយរបស់សារព័ត៌មាន CNA នៅថ្ងៃទី៣០ខែកញ្ញា ព្យុះទីហ្វុង Bualoi បានសម្លាប់មនុស្សយ៉ាងហោចណាស់ ១៩ នាក់នៅក្នុងប្រទេសវៀតណាម ខណៈមនុស្ស ២១ នាក់ទៀតនៅតែបាត់ខ្លួន ដែលធ្វើឱ្យវាក្លាយជាព្យុះដែលមានមនុស្សស្លាប់ច្រើនបំផុតរបស់ប្រទេសវៀតណាមក្នុងឆ្នាំនេះ។

ព្យុះទីហ្វុងនេះបានបោកបក់នៅខេត្តភាគខាងជើងកាលពីថ្ងៃចន្ទ ដោយបានបញ្ចេញខ្យល់បក់ខ្លាំង រលកសមុទ្រធំៗ និងភ្លៀងធ្លាក់ខ្លាំងបណ្តាលឱ្យមានទឹកជំនន់រីករាលដាល។ អាជ្ញាធរវៀតណាមបានរាយការណ៍ថាមនុស្ស ៨៨ នាក់បានរងរបួស ខូចខាតផ្ទះជាង ១០ ម៉ឺនខ្នង និងបំផ្លាញដំណាំជាង ១ម៉ឺន ហិកតាភាគច្រើននៅក្នុងខេត្ត Nghe An និង Ha Tinh ។

ជាមួយគ្នានេះភ្លៀងធ្លាក់លើសពី ៣០០មីលីម៉ែត្រ បង្កឱ្យមានបំណាក់ដី និងទឹកជំនន់ភ្លាមៗ ធ្វើឱ្យលិចលង់ភូមិមួយចំនួនទាំងមូល និងធ្វើឱ្យតំបន់មួយចំនួនគ្មានអគ្គិសនីប្រើប្រាស់ និងផ្លូវថ្នល់ត្រូវជន់លិច។ ចំណែកនៅទីក្រុងហាណូយ ភ្លៀងធ្លាក់ជាបន្តបន្ទាប់បានជន់លិចផ្លូវសំខាន់ៗ ធ្វើឱ្យស្ទះចរាចរណ៍ ទឹកសាចចូលពេញផ្ទះពលរដ្ឋ។ ប្រជាជនវៀតណាមបាន​ពណ៌នា​ថាវាជាទឹក​ជំនន់​ដ៏អាក្រក់​បំផុត​ដែល​ពួក​គេ​មិន​ធ្លាប់​ជួបប្រទះ។

គួរបញ្ជាក់ថាប្រទេសវៀតណាមមានឆ្នេរសមុទ្រវែង នៅគែមសមុទ្រចិនខាងត្បូង ងាយនឹងរងគ្រោះដោយព្យុះទីហ្វុង ដែលជារឿយៗនាំមកនូវទឹកជំនន់ និងបំណាក់ដីយ៉ាងធ្ងន់ធ្ងរ៕

អត្ថបទ៖ ប៊ុន សុភាព