កាតព្វកិច្ចយោធានៅវៀតណាម៖ វិន័យដែក និងទណ្ឌកម្មធ្ងន់ធ្ងរ សម្រាប់អ្នកគេចវេះ

នៅក្នុងប្រទេសវៀតណាម ការបំពេញកាតព្វកិច្ចយោធា មិនមែនជារឿងលេងសើចនោះទេ។ សម្រាប់យុវជនគ្រប់រូប ការចូល​បម្រើកងទ័ពត្រូវបានចាត់ទុកថាជា «កាតព្វកិច្ចដ៏រុងរឿង» ក្នុងការការពារជាតិ។ នៅឆ្នាំ ២០២៦ នេះ រដ្ឋាភិបាលវៀតណាម បានរឹតបន្តឹងបទប្បញ្ញត្តិ និងបង្កើនការដាក់ទណ្ឌកម្មយ៉ាងតឹងរ៉ឹង ចំពោះអ្នកដែលព្យាយាមគេចវេះពីកាតព្វកិច្ចនេះ។

យោងតាមច្បាប់ស្តីពីកាតព្វកិច្ចយោធា ពលរដ្ឋជាបុរស ដែលមានអាយុចាប់ពី ១៨ ដល់ ២៥ឆ្នាំ ត្រូវមានកាតព្វកិច្ចចូលបម្រើកងទ័ព។ សម្រាប់អ្នកដែលកំពុងសិក្សានៅថ្នាក់ឧត្តមសិក្សា អាយុនៃការចូលបម្រើ អាចត្រូវបានពន្យារពេលរហូតដល់អាយុ ២៧ឆ្នាំ។

អាជ្ញាធរវៀតណាម បានបង្ហាញជំហរយ៉ាងម៉ឺងម៉ាត់ ចំពោះអ្នកដែលមិនគោរពតាមការកោះហៅ។ យោងតាមគេហទំព័ររបស់រដ្ឋបាលខេត្តតៃនិញ (TANDONG.TAYNINH.GOV.VN) អ្នកដែលគេចវេះ នឹងត្រូវប្រឈមមុខនឹងទណ្ឌកម្មដូចខាងក្រោម៖

ការផាកពិន័យជាប្រាក់៖ សម្រាប់អ្នកដែលមិនព្រមចូលរួមការពិនិត្យសុខភាព ឬមិនគោរពតាមការសម្រេចចិត្តចូលបម្រើយោធា អាចត្រូវពិន័យជាប្រាក់ចាប់ពី ៥០លាន ដល់ ៧៥លានដុង (ប្រហែល ២ ០០០ ទៅ ៣ ០០០ដុល្លារអាមេរិក)។

ការកែឯកសារ​ខុសច្បាប់៖ អ្នកដែលប្រើល្បិចកល ឬក្លែងបន្លំឯកសារសុខភាព ដើម្បីគេចវេះ អាចត្រូវពិន័យរហូតដល់ ៤០លានដុង។

ទោសព្រហ្មទណ្ឌ៖ ក្នុងករណីធ្ងន់ធ្ងរ ការគេចវេះពីកាតព្វកិច្ចយោធា អាចឈានទៅដល់ការកាត់ទោសដាក់ពន្ធនាគាររហូតដល់ ៥ឆ្នាំ ស្របតាមក្រមព្រហ្មទណ្ឌឆ្នាំ២០១៥ និងបទប្បញ្ញត្តិថ្មីៗឆ្នាំ២០២៦។

គួរឱ្យកត់សម្គាល់ថា បន្ថែមពីលើទោសទណ្ឌទាំងនេះ អ្នកដែលគេចវេះ នៅតែត្រូវបានបង្ខំឱ្យបំពេញកាតព្វកិច្ចយោធាដដែល បន្ទាប់ពីការអនុវត្តទោសរួចរាល់។ នេះមានន័យថា ការគេចវេះ មិនអាចជួយឱ្យពួកគេរួចផុតពីការបម្រើជាតិបានឡើយ។

គោលដៅនៃវិធានការទាំងនេះ គឺដើម្បីធានាបាននូវគុណភាពកងទ័ព និងភាពយុត្តិធម៌ក្នុងសង្គម។ យោងតាមសារព័ត៌មាន VietnamNet កងទ័ពវៀតណាម កំពុងធ្វើទំនើបកម្មយ៉ាងខ្លាំងក្លា ដោយទាមទារនូវយុវជន ដែលមានទាំងកាយសម្បទារឹងមាំ និងចំណេះដឹងខ្ពស់។ អាជ្ញាធរជឿជាក់ថា ការអនុវត្តច្បាប់ដោយតឹងរ៉ឹង នឹងជំរុញឱ្យយុវជនមានស្មារតីទទួលខុសត្រូវខ្ពស់ ចំពោះមាតុភូមិ។

ការរឹតបន្តឹងនេះ បានបញ្ជូនសារដ៏ច្បាស់លាស់មួយទៅកាន់សាធារណជនថា កាតព្វកិច្ចយោធា គឺជាកាតព្វកិច្ចពិតប្រាកដ ដែលមិនអាចគេចផុតបាន ហើយគ្រប់សកម្មភាពគេចវេះ សុទ្ធតែរង​ការ​ពិន័យ​យ៉ាង​ធ្ងន់ធ្ងរ៕

អត្ថបទ៖ ឈាង