ត្រៀម ៤យ៉ាងនេះឱ្យហើយ មុនទៅចាក់វ៉ាក់សាំងដូសទី៣ ទើបមិនលំបាកខ្លួនឯង

ការ​ចាក់​វ៉ាក់សាំងដូសទី៣ ឬដូសជំរុញ គឺ​ជា​វិធានការ​មាន​ប្រសិទ្ធភាព​បំផុត​ក្នុង​ការ​ការពារ​ខ្លួន​ពី​ជំងឺ​កូវីដ-១៩ ក៏ដូចជាវីរុសបំប្លែងខ្លួនប្រភេទ Delta។ បច្ចុប្បន្ន យុទ្ធនាការចាក់វ៉ាក់សាំងដូសជំរុញកំពុងដំណើរការជូន ថ្នាក់ដឹកនាំ មន្ត្រីរាជការ មន្ត្រីសុខាភិបាល និងបុគ្គលិករដ្ឋបាលរាជធានី-ខេត្តមួយចំនួន ក្នុងប្រទេសកម្ពុជា។

ថ្វីត្បិត អ្នកធ្លាប់ចាក់វ៉ាក់សាំង២ដូសរួចមកហើយ និងមានបទពិសោធន៍ចំពោះការចាក់វ៉ាក់សាំងក៏ពិតមែន ប៉ុន្តែ​សកម្មភាពប៉ុន្មាននេះ នៅតែជាតម្រូវការ និងត្រូវត្រៀមទុកជាមុន មុន​ពេល​ចាក់​វ៉ាក់សាំង​ដូសទី៣។

១. ត្រៀម​ទប់ទល់​ផល​រំខាន៖ ធម្មតា ក្រោយ​ចាក់​វ៉ាក់សាំងដូសណីមួយៗ​រួច រាងកាយ​ នឹង​បញ្ចេញ​អាការ​មួយ​ចំនួន​ដូច​ជា ក្ដៅ​ខ្លួន ឈឺ​មុខ​ម្ជុល វិល​មុខ​។ល។ ក្នុងករណីខ្លះ អ្នកចាក់ដូសទី៣ អាចរងផលរំខានខ្លាំងជាងពេលចាក់ពីរដូសដំបូង។ ប៉ុន្តែ​នេះមិន​ជាអ្វី​គួរ​ឲ្យ​បារម្ភទេ ព្រោះវា​ជា​បញ្ហា​ទូទៅ ហើយ​អ្នក​អាច​លេប​ថ្នាំ​បំបាត់​ក្ដៅ​ខ្លួន​ក្រោយ​ចាក់​បាន ក្នុង​ករណី​ឡើង​កម្ដៅ។

២. ពាក់ម៉ាស៖ ការ​ពាក់​ម៉ាស​នៅ​តែ​ជា​វិធាន​ការ​ល្អ​មួយ​ក្នុង​ការ​កាត់​បន្ថយ​ភាគរយ​នៃ​ការ​ឆ្លង​កូវីដ-១៩ ​ឲ្យ​នៅ​ទាប។ ម៉្យាង​នៅ​ពេល​ដែល​ដល់​កន្លែង​ចាក់​វ៉ាក់សាំង អ្នក​នឹង​ជួប​មនុស្ស​ច្រើន ជាហេតុ​​ចាំបាច់​ត្រូវ​ពាក់​ម៉ាស និង​បន្ត​រក្សា​គម្លាតជាប់ជានិច្ច។

៣. ពាក់​អាវ​ដៃ​ខ្លី៖ អ្នក​ត្រូវ​ចាក់​វ៉ាក់សាំង​នៅ​លើ​ស្មា​ ដូច​នេះ​ហើយ​គួរ​តែ​ពាក់​អាវ​ដៃ​ខ្លី រលុងៗ ងាយ​ស្រួល​ក្នុង​ការ​លាត់​ដៃ​អាវ​ឲ្យ​គ្រូពេទ្យ​ចាក់​វ៉ាក់សាំង។

៤. ត្រៀមឧបករណ៍ជំនួយ៖ ឧបករណ៍ជំនួយត្រង់ណេះ សំដៅដល់អាល់កុលឬជែល ទុកសម្រាប់បាញ់កន្លែងអង្គុយរង់ចាំ និងទុកប្រើលាងដៃផងដែរ ព្រោះថានៅកន្លែងចាក់វ៉ាក់សាំងពុំមានសាប៊ូសម្អាតដៃនោះទេ។ រីឯរឿងសំខាន់មួយទៀត គឺដបទឹក ត្រូវមានជាប់ខ្លួនកុំខាន ទុកផឹកបំពេញជាតិទឹកឱ្យរាងកាយ ចៀសវាងស្រេកឬអាចដួលសន្លប់។

គួររំឭកថា នៅថ្ងៃទី១៨ ខែ សីហានេះ រដ្ឋបាលរាជធានីភ្នំពេញ បានបើកដំណើរការចាក់វ៉ាក់សាំង អាស្ត្រាហ្សេនីកា ​ដូសទី៣ ឬដូសជំរុញ ជូនដល់ថ្នាក់ដឹកនាំ មន្ត្រីរាជការ មន្ត្រីសុខាភិបាល និងបុគ្គលិកនៃរដ្ឋបាលរាជធានីភ្នំពេញ រដ្ឋបាលខណ្ឌទាំង១៤ រដ្ឋបាលសង្កាត់ទាំង១០៥ មន្ទីរអង្គភាពជំនាញ ជុំវិញរដ្ឋបាលរាជធានីភ្នំពេញ ព្រមទាំងមន្ត្រីសុខាភិបាលជួរមុខវិស័យឯកជន នៅតាមកម្មវិធី និងទីកន្លែងដែលបានកំណត់។ ក្រៅពីនោះ ខេត្តមួយចំនួននៅតាមព្រំដែនជាប់ប្រទេសថៃ ក៏បានចាក់ដូសទី៣ជូនមន្ត្រីជួរមុខ រួចរាល់ផងដែរ៕

អត្ថបទ៖ សន្យា

ចុចអាន៖ មន្ត្រីជួរមុខនៅភ្នំពេញ ត្រូវគោរ​ពតាមលក្ខខណ្ឌ ៣ចំណុចនេះ ទើបអនុញ្ញាតឲ្យចាក់វ៉ាក់សាំង ដូសទី៣

ចុចអាន៖ មិនថាដូសទីប៉ុន្មាន! មុនចាក់វ៉ាក់សាំងហាមធ្វើរឿងនេះដាច់ខាត ប្រយ័ត្នដួលសន្លប់ភ្លាមៗអំឡុងចាក់

ចុចអាន៖ សកម្មភាព ៥យ៉ាងចាំបាច់បំផុត ធ្វើឲ្យប្រព័ន្ធភាពស៊ាំខ្លាំងក្លា ក្រោយចាក់វ៉ាក់សាំងដូសទី៣