សុខភាព

ខណៈ WHO ព្រមានដល់ថៃ ពីសេរ៉ូក្អក សម្លាប់កុមារ, តើកម្ពុជា មានករណីនេះ ឬយ៉ាងណា?

បានផុស

៣ years មុន

នៅ

ថ្ងៃសៅរ៍ ២២ តុលា ២០២២

ដោយ

អង្គការសុខភាពពិភពលោក (WHO) បានព្រមានដល់ប្រទេសនានា ក្នុងនោះក៏មានថៃ ជាប្រទេសជិតខាងកម្ពុជាផងដែរ ខណៈថ្នាំទឹកសេរ៉ូក្អក ដែលផលិតដោយប្រទេសឥណ្ឌាចំនួន ៤ប្រភេទ បានសម្លាប់កុមារសរុបឡើងដល់ ១៦៥នាក់ នៅក្នុងប្រទេសហ្គាំប៊ី និងឥណ្ឌូណេស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ត្រីជាន់ខ្ពស់ ក្រសួងសុខាភិបាល មានប្រសាសន៍ប្រាប់ “កម្ពុជាថ្មី” មុននេះបន្តិច នារសៀលថ្ងៃទី២២ ខែតុលា ឆ្នាំ២០២២នេះថា ឱសថទឹកសេរ៉ូក្អក ចំនួន ៤ ប្រភេទ របស់ឥណ្ឌា ដែលអង្គការសុខភាពពិភពលោក (WHO) ប្រកាសអាសន្ន និងហាមប្រើប្រាស់នោះ មិនមានចុះបញ្ចិកា នៅក្រសួងសុខាភិបាលកម្ពុជាឡើយ ហើយប្រភេទថ្នាំទាំងនេះ ក៏មិនមានការចរាចរស្របច្បាប់នៅលើទីផ្សារកម្ពុជាដែរ។

លោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការ និងជាអ្នកនាំពាក្យ ក្រសួងសុខាភិបាល មានប្រសាសន៍បញ្ជាក់ថា៖ “ប្រទេសកម្ពុជាអត់មានកុមារឈឺ ឬស្លាប់ ឬបញ្ហាអ្វីទាក់ទងនឹងការប្រើទឹកសេរ៉ូក្អកទាំង ៤ប្រទេស របស់ប្រទេសឥណ្ឌានោះទេ”។

លោក ផាន អូន ប្រតិភូរាជរដ្ឋាភិបាលទទួលបន្ទុកអគ្គនាយក នៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ ក.ប.ប. បានមានប្រសាសន៍ថា ក្រសួងសុខាភិបាល ពិតជាបានធ្វើការយ៉ាងហ្មត់ចត់ចំពោះករណីនេះ បន្ទាប់ពីក្រសួងបានប្រកាសថា មិនមានការផ្តល់បញ្ជិកា ឱ្យនាំចូលថ្នាំប្រភេទទាំងនោះមកកម្ពុជា។

លោក ផាន អូន បញ្ជាក់ថា៖ “ទោះយ៉ាងណា ក.ប.ប. នៅតែបន្តឃ្លាំមើលនៅតាមបណ្តាទីផ្សារ តាមដេប៉ូ តាមម៉ាត និងបណ្ដាកន្លែងលក់តូចតាច ដើម្បីឱ្យប្រាកដថា គ្មានការចរាចរដោយសុខច្បាប់ចំពោះឱសថទាំង ៤ នេះ ចៀសវាងបង្កផលប៉ះពាល់ដល់សុខភាពប្រជាពលរដ្ឋ ជាពិសេសកុមារតូចៗកម្ពុជា”។

គួររំលឹកថា កាលដើមខែតុលានេះ WHO បានប្រកាសអាសន្នសាកលមួយ និងព្រមានពីការប្រើប្រាស់ឱសថទឹកសេរ៉ូក្អកទាំង ៤ ប្រភេទ ដែលផលិតដោយក្រុមហ៊ុនឥណ្ឌាមួយមានឈ្មោះ Maiden Pharmaceuticals ដោយថា ឱសថនោះ ពុំបានផ្តល់ការធានាអំពីសុវត្ថិភាពឱសថឡើយ។ ឱសថទឹកសេរ៉ូក្អកចំនួន ៤ ប្រភេទនោះ មានដូចជា Promethazine Oral Solution, Kofexmalin Baby Cough Syrup, Makoff Baby Cough Syrup and Magrip N Cold Syrup ដោយអង្គការសុខភាពពិភពលោក អះអាងថា ឱសថទាំងនេះអាចជាប់ពាក់ព័ន្ធនឹងការស្លាប់របស់កុមារចំនួន ៦៦ នាក់នៅប្រទេសហ្គាំប៊ី។

អង្គការ WHO បានឱ្យដឹងថា យោងតាមការវិភាគមន្ទីរពិសោធន៍ រកឃើញថា ទឹកសេរ៉ូក្អកទាំង ៤ ប្រភេទនេះ មានផ្ទុកនូវបរិមាណមិនអាចទទួលយកបាន នៃ diethylene glycol និង ethylene glycol ដែលវា គឺជាសារធាតុម្យ៉ាង ដែលមានជាតិពុលដល់មនុស្ស និងអាចស្លាប់នៅពេលទទួលទាន។ ផលិតផលត្រូវបានគេកំណត់អត្តសញ្ញាណនៅក្នុងប្រទេសហ្គាំប៊ី។ ប៉ុន្តែពួកគេប្រហែលជាត្រូវបានចែកចាយទៅកាន់ប្រទេសផ្សេងទៀតតាមរយៈទីផ្សារក្រៅផ្លូវការ៕

អត្ថបទ៖ ច័ន្ទ វីរៈ