ខេត្តទេសចរណ៍ ៣ ជាប់ប្រទេសក្បែរខាង ស័ក្តិសមបំផុតសម្រាប់ដំណើរកម្សាន្ត នារដូវធ្លាក់ខ្យល់នេះ

ដំណើរកម្សាន្តទៅកាន់តំបន់សមុទ្រ និងភ្នំ ជារឿងទូទៅហើយ សម្រាប់អ្នកទេសចរនៅកម្ពុជា ហើយជម្រើសទី១ របស់អ្នកទេសចរ ភាគច្រើនជាខេត្តជាប់មាត់សមុទ្រ ក៏ព្រោះតែជាតំបន់ឆ្នេរ មានរលកបោកបក់ស្រស់ស្អាត និងអំណោយផលបំផុតសម្រាប់ការកម្សាន្តស្ទូចសត្វសមុទ្រ និងអាចងូតទឹកកម្សាន្តបាន។

ប៉ុន្តែកម្ពុជានៅមានខេត្តទេសចរណ៍ជាច្រើនផ្សេងទៀត ដែលជាឋានសួគ៌លើដី ស្រស់ស្អាត និងស័ក្តិសមបំផុត សម្រាប់ដំណើរកម្សាន្តក្នុងអំឡុងខែរងារនេះ។ ដូចនេះ កម្ពុជាថ្មី សូមណែនាំខេត្តទេសចរណ៍ ៣ ដែលជាតំបន់រមណីយដ្ឋាន ជាយដែន កម្ពុជា ដ៏ស្រស់ស្អាតបំផុត។

១. តំបន់ទេសចរណ៍ ខេត្តស្ទឹងត្រែង
ស្ទឹងត្រែង ជាខេត្តជាប់នឹងព្រំប្រទល់ប្រទេសឡាវ និងមានព្រំប្រទល់ជាប់ ខេត្តរតនគិរី ក្រចេះ មណ្ឌលគិរី ខេត្តព្រះវិហារ និងកំពង់ធំ។ ខេត្តទេសចរណ៍នេះ មានតំបន់ទាក់ទាញជាច្រើនកន្លែង រួមមាន សហគមន៍អេកូទេសចរណ៍ភ្នំជម្រកសត្វ; តំបន់ទេសចរណ៍រ៉ាមសា; សហគមន៍អេកូទេសចរណ៍សម្រស់កោះហាន; សហគមន៍អេកូទេសចរណ៍បុរីអូរស្វាយ រមណីយដ្ឋានបក្សីមេគង្គ; ស្ទឹងត្រែងរីសត រមណីយដ្ឋានចម្ការក្រូច និងតំបន់ទេសចរណ៍អូរឫស្សីកណ្ដាល ដែលសុទ្ធសឹង ជាតំបន់ល្បីៗប្រចាំខេត្តនេះ។

ភាពល្បីល្បាញនៃខេត្តនេះ គឺត្រីធម្មជាតិ ដោយសារតែស្ទឹងត្រែង ជាខេត្តដែលមានទន្លេបួនឆ្លងកាត់ គឺទន្លេសេសាន ទន្លេសេកុង ទន្លេស្រែពក និងទន្លេមេគង្គ។

២. ខេត្តរតនគីរី
រតនគីរី មានព្រំប្រទល់ជាប់នឹងប្រទេសឡាវ និងវៀតណាម។ ខេត្តទេសចរណ៍មួយនេះ ពោពេញដោយរមណីយដ្ឋាន ធម្មជាតិ ពិសេសជាទឹកដីដែលសម្បូរដោយជនជាតិភាគតិចរស់នៅ។ តំបន់ទាក់ទាញបំផុតរបស់ខេត្តនេះ រួមមាន​ រមណីយ​ដ្ឋាន​​ឥសី​បតមៈ (ភ្នំ​ស្វាយ); រមណីយ​ដ្ឋាន​ធម្ម​ជាតិ​បឹង​យក្ស​ឡោម; ​ទឹក​ជ្រោះ​កាចាញ​; ​ទឹក​ជ្រោះ​​​​កាទៀង​; ​​ទឹកជ្រោះ​​អូរ​ស៊ិន​លែរ៍; បឹង​​លំកុដ; រមណីយ​ដ្ឋាន​​​ទឹក​ជួរ​តាតៃ; រមណីយ​ដ្ឋាន​វាល​ថ្ម​រំផ្លង់; ឧទ្យាន​ជាតិ​វីរ​ជ័យ និងជំរកសត្វព្រៃ​​លំផាត់ជាដើម។

៣. ខេត្តក្រចេះ
ខេត្តនេះមានព្រំប្រទល់ជាប់នឹងប្រទេសវៀតណាម ជាខេត្តដែលបន្ស់លទុកនូវសិល្បៈសំណង់បុរាណ នាសម័យបារាំង ច្រើន ហើយក៏ជាដែនដីនៃអេកូធម្មជាតិ ពោរពេញដោយជីវៈចម្រុះគ្រប់ប្រភេទ យ៉ាងស្រស់ត្រកាលបំផុត។ តំបន់ទេសចរណ៍ដ៏ទាក់ទាញរបស់ខេត្តនេះ អន្លង់ផ្សោតកាំពី តំបន់ប្រវត្តិសាស្ត្រ; “ព្រះវិហារសសរ១០០”; កោះទ្រង់; កោះសាមសិបជាដើម។ មួយវិញទៀត ក្រចេះ ជាដែនដីល្បីល្បាញនៃនំក្រឡានដ៏ឈ្ងុយឆ្ងាញ់។