សម្តេចធិបតីរំលឹកដល់នាយករដ្ឋមន្រ្តីថៃឱ្យឆាប់ដោះលែងទាហានទាំង១៨រូប តាមការសន្យាក្នុងកិច្ចព្រមព្រៀងសន្តិភាព

ជំនួបពីទីក្រុងគូឡាឡាំពួ នៅថ្ងៃអង្គារនេះ នាយករដ្ឋមន្ត្រីកម្ពុជា សម្ដេច ហ៊ុន ម៉ាណែត បានរំលឹកទៅកាន់នាយករដ្ឋមន្ត្រីថៃ លោក អានុទីន ឆានវីរៈគុល ឱ្យឆាប់ដោះលែងទាហានកម្ពុជាទាំង១៨រូប តាមការសន្យាក្នុងកិច្ចព្រមព្រៀងសន្តិភាព។

ការរំលឹករបស់នាយករដ្ឋមន្ត្រីកម្ពុជា បានធ្វើឡើងក្នុងជំនួបទ្វេភាគីជាមួយលោក អានុទីន ឆានវីរៈគុល នៅក្រៅកិច្ចប្រជុំកំពូលអាស៊ាននាថ្ងៃទី២៨ ខែតុលានេះ ក្នុងប្រទេសម៉ាឡេស៊ី ពោលគឺ២ថ្ងៃបន្ទាប់ពីការចុះហត្ថលេខារវាងមេដឹកនាំទាំងពីរលើសេចក្ដីថ្លែងការណ៍រួមមួយដែលជាកិច្ចព្រមព្រៀងសន្តិភាពក្នុងដំណោះស្រាយនៃបញ្ហាជម្លោះព្រំដែនរវាងប្រទេសទាំងពីរ នៅចំពោះមុខសាក្សីពីប្រធានាធិបតីសហរដ្ឋអាមេរិក លោក ដូណាល់ ត្រាំ និងនាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម កាលពីថ្ងៃទី២៦ ខែតុលា។

សេចក្ដីប្រកាសព័ត៌មានរបស់ក្រសួងការបរទេសកម្ពុជា បានបញ្ជាក់ឱ្យដឹងថា ក្នុងជំនួបនោះ សម្ដេចធិបតី ហ៊ុន ម៉ាណែត បានរំឭកជាថ្មីនូវការអំពាវនាវឱ្យមានការដោះលែងទាហានកម្ពុជាចំនួន១៨រូបឱ្យបានឆាប់ ដោយឈរលើមូលដ្ឋានមនុស្សធម៌ និងដូចដែលបានឯកភាពគ្នាក្នុងសេចក្តីថ្លែងការណ៍រួមគូឡាឡាំពួ។

ជុំវិញការអំពាវនាវរបស់កម្ពុជានេះ ក៏ស្របទៅនឹងការប្រកាសរបស់លោកប្រធានាធិបតី ដូណាល់ ត្រាំ ដែលអះអាងថា ក្រោមកិច្ចព្រមព្រៀងសន្តិភាព ទាហានកម្ពុជា១៨រូប នឹងត្រូវដោះលែងមកឱ្យកម្ពុជាវិញ។

សម្រាប់ក្នុងកិច្ចសន្ទនារវាងនាយករដ្ឋមន្ត្រីកម្ពុជា និងនាយករដ្ឋមន្ត្រីថៃ នៅថ្ងៃនេះ មេដឹកនាំទាំងពីរបានបញ្ជាក់ជាថ្មីនូវការប្តេជ្ញាចិត្តយ៉ាងមុតមាំក្នុងការគោរព និងប្រកាន់ខ្ជាប់ចំពោះសេចក្តីថ្លែងការណ៍រួមគូឡាឡាំពួដែលបានផ្តល់ក្របខ័ណ្ឌមួយសម្រាប់ប្រទេសទាំងពីរក្នុងការធ្វើការជាមួយគ្នាឆ្ពោះទៅរកសន្តិភាព កិច្ចសហប្រតិបត្តិការ និងវិបុលភាព។

សម្តេចធិបតី ហ៊ុន ម៉ាណែត គូសបញ្ជាក់ថា ការចុះហត្ថលេខានេះឆ្លុះបញ្ចាំងវឌ្ឍនភាពបន្ថែមទៀត ចាប់តាំងពីមានកិច្ចព្រមព្រៀងបទឈប់បាញ់ ដែលរហូតមកដល់ពេលនេះ បានជួយរក្សានូវភាពស្ងប់ស្ងាត់ និងស្ថិរភាព នៅតាមបណ្តោយព្រំដែន។ សម្តេចធិបតីបានលើកឡើងថា កិច្ចការបន្ទាន់សម្រាប់ភាគីទាំងពីរ គឺត្រូវធ្វើការជិតស្និទ្ធជាមួយគ្នាដើម្បីធានានូវការអនុវត្តសេចក្តីថ្លែងការណ៍នេះឱ្យបានពេញលេញ និងប្រកបដោយភាពស្មោះត្រង់។

គួរឱ្យដឹងថា តបតាមការអញ្ជើញរបស់លោក អាន់វ៉ា អ៊ីប្រាហ៊ីម នាយករដ្ឋមន្ត្រីម៉ាឡេស៊ី, សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា រួមជាមួយនឹងលោក Anutin Charnvirakul នាយករដ្ឋមន្ត្រីថៃ បានចូលរួមក្នុងពិធីចុះហត្ថលេខាលើកិច្ចព្រមព្រៀងសន្តិភាពរួមទីក្រុងគូឡាឡាំពួ រវាងព្រះរាជាណាចក្រទាំងពីរ នៅប្រទេសម៉ាឡេស៊ី។

ក្នុងពិធីនេះ ក៏មានការចូលរួមធ្វើជាសាក្សីពីលោក ដូណាល់ ត្រាំ (Donald J. Trump) ប្រធានាធិបតីសហរដ្ឋអាមេរិក និងលោក លោក អាន់វ៉ា អ៊ីប្រាហ៊ីម នាយករដ្ឋមន្ត្រីម៉ាឡេស៊ី និងជាប្រធានអាស៊ានប្ដូរវេន។

ក្នុង​កិច្ច​ព្រមព្រៀង​សន្ដិភាព​កម្ពុជា-ថៃ ចំណុច​ទី​៥​ បាន​បញ្ជាក់​ថា ការ​ដោះលែង​ទាហាន​ខ្មែរ​ទាំង​១៨នាក់​មក​កម្ពុជា​វិញ​គឺ​ជា​ការ​បង្ហាញ​ពី​បំណង​ប្រាថ្នា​របស់​ថៃ​ក្នុង​ការ​លើក​កម្ពស់​ទំនុកចិត្ត និង​ការ​ជឿ​ទុក​ចិត្ត​គ្នា​ជាមួយ​កម្ពុជា​ឡើងវិញ «ប្រទេស​ថៃ​នឹង​ដោះលែង​ឈ្លើយ​សឹក​ដោយ​គ្មាន​បង្អែ​បង្អង់»៕

អត្ថបទ៖ ធឿន វ៉ាន់សុង