ប្រទះឃើញសពទារកអណ្តែតទឹកមកទើរក្រោមស្ពានព្រះមុនីវង្សថ្មី

ប្រជានេសាទនៅក្រោមស្ពានព្រះមុនីវង្សថ្មីបានស្រង់យកសពទារកម្នាក់ ដែលអណ្តែតមកទើក្រោមស្ពាន។ ការប្រទះឃើញសពទារកនេះ បានកើតឡើងនៅវេលាម៉ោង១៦និង១០នាទីរសៀលថ្ងៃទី១៨ខែមេសានៅចំណុមក្រោមស្ពានព្រះមុនីវង្សថ្មីស្ថិតក្នុងភូមិព្រែកសង្កាត់ច្បារអំពៅទី១ខណ្ឌច្បារអំពៅរាជធានីភ្នំពេញ។

តាមការបញ្ជាក់ពីលោក ពៅ ហួត ចៅសង្កាត់ច្បារអំពៅទី១បានឲ្យដឹងថា សពទារកទើបនឹងប្រសូត។ នៅលើសពទារកពុំមានស្លាកស្នាមដែលគេសង្ស័យថាជាអំពើទារុណ្ឌកម្មនោះទេ។

លោកចៅសង្កាត់បានអះអាងថា ពុំមានបងប្អូនប្រជាពលរដ្ឋរស់នៅម្តុំច្បារអំពៅបានស្គាល់អត្តសញ្ញាណសពទារកនោះទេ។ ភ្លាមៗនោះលោកបានដឹកយកសពទារកដ៏កំសត់នេះទៅតំកល់ទុកនៅវត្តពោធិព្រះបាត្រហៅវត្តច្បារអំពៅផងដែរ។

ប្រជាពលរដ្ឋមានការអាណិតអាសូរដល់ទារកខាងលើដែលមិនគួរណាម្តាយរបស់គេមានគំនិតយ៉ាងដូចម្តេចបានជា​យក​សព​កូន​មកបោះចូលទន្លេបែបនេះសោះ៕

អត្ថបទ៖ នរា