ស្រុកសំបូរ​ក្នុង​ខេត្តក្រចេះ មាន​ក្រុមហ៊ុន​ធំៗ​កំពុង​​វិនិយោគ​សាងសង់រោងចក្រ​​ផលិតស៊ីម៉ង់ រោងចក្រស្ករស តម្លៃទុនរយលានដុល្លារ

ស្រុកសំបូរ គឺជា​ស្រុក​យុទ្ធសាស្ត្រមួយក្នុងចំណោមក្រុងស្រុក​ទាំង ៧ នៃខេត្តក្រចេះដែលមានចម្ងាយ​ពីទីរួមស្រុក ទៅកាន់ទីរួមខេត្តប្រមាណជា ៣៦ គីឡូមែត្រ។

ស្រុក​ជាប់ដងទន្លេមួយ​​នេះ​មានភូមិសាស្រ្ត​រដ្ឋបាល​ចែកចេញ​ជា ៦ ឃុំ និង ៣៤ ភូមិ មានប្រជាជនរស់នៅ​ប្រហែល ៥ ម៉ឺននាក់ ស្មើនឹង ១ ម៉ឺនគ្រួសារ។ ពលរដ្ឋភាគច្រើនប្រកបមុខរបរកសិកម្មប្រហែល ៨០%។ នេះ​បើ​តាមការឲ្យដឹងពីលោក គង់ មេត្តា អភិបាលស្រុកសំបូរនាព្រឹកថ្ងៃទី ២២ ខែមេសា ឆ្នាំ២០២៦។

សក្ដានុពលដ៏សំខាន់នៃស្រុកសំបូរ គឺមានតំបន់អេកូទេសចរណ៍វប្បធម៌ដ៏ល្បីល្បាញ​​​តាមដងទន្លេមេគង្គជាមួយ​ដីដ៏មានជីជាតិ សំបូរធនធានធម្មជាតិទាំង​នៅ​លើដីនិងក្នុងទឹក ក្នុងនោះតំបន់ការ​ពារធនធានធម្មជាតិមាន​សរុប ៤ តំបន់ មានដែនព្រៃឡង់ , ដែនក្ដាន់, ដែនសត្វព្រៃសំបូរ និងដែនអភិរក្សផ្សោត។

អភិបាល​ស្រុក​សំបូរ​បានឲ្យដឹងថា ស្រុកសំបូរ​មានទន្លេមេគង្គហូរកាត់ប្រវែងជាង ៦០ គីឡូម៉ែត្រ មានកោះសរុប ១២៥ និងអន្លង់សរុបចំនួន ១៣៧។ បច្ចុប្បន្ន ក្នុង​មូលដ្ឋាន​ស្រុកមានក្រុមហ៊ុនធំៗកំពុង​វិនិយោគលើវិស័យកសិកម្មរួមមាន ដំណាំអំពៅ, កៅស៊ូ, ដំឡូង, ប្រេងខ្យល់ តាម​រយៈ​​ដីសប្បទានសេដ្ឋកិច្ចចំនួន ៥ ក្រុមហ៊ុន។ 

ក្រៅពីនេះក្រុមហ៊ុន​​​ផលិត​ស្ករសរ និង​ រោងចក្រស៊ីម៉ង កំពុង​ដំណើរការ​សាងសង់​។ ក្នុង​មូលដ្ឋាន​ស្រុកក៏​​​មានរោងចក្រ​ថ្មកំបោរ, ថ្មម៉ាប​ចំនួន​ ២ កន្លែង, ក្រុមហ៊ុន​រ៉ែមាសកំពុង​សាងសង់​ និងក្រុមហ៊ុនរុករករ៉ែចំនូន ២ ក្រុមហ៊ុន។

បើតាមលោកអភិបាល​ស្រុក​ ស្រុកសំបូរបានត្រៀមខ្លួនរួចជាស្រេចដើម្បីស្វាគមន៍វិនិយោគិនលើវិស័យសំខាន់ៗចំនួន ៣ គឺវិស័យទេសចរណ៍ វិស័យរ៉ែ និងវិស័យកសិ-ឧស្សាហកម្ម និងហេដ្ឋារចនាសម្ព័ន្ធសេវាកម្ម។

១. សក្ដានុពលវិនិយោគ

-មានទីតាំងបុរាណដ្ឋានអតីតក្រុងសម្ភុបុរៈ, វត្តសសរ ១០០ និងប្រព័ន្ធទេសចរណ៍តាមដងទន្លេមេគង្គ ការទស្សនាផ្សោត និងសហគមន៍អេកូទេសចរណ៍ កោះ និងឆ្នេរខ្សាច់ដ៏ស្រស់ស្អាត​ ជា​ឱកាសសម្រាប់ការ​​វិនិយោគបង្កើតតំបន់អេកូទេសចរណ៍, ផ្ទះសំណាក់បែបធម្មជាតិ (Eco-Resort), កន្លែងកម្សាន្តសម្រាប់ក្រុម​គ្រួសារ និងការរៀបចំសេវាដឹកជញ្ជូនទេសចរ។

-សក្ដានុពលវិស័យកសិ-ឧស្សាហកម្ម ដែល​ដីមានជីជាតិ និងប្រភពទឹកស្រោចស្រពគ្រប់គ្រាន់ សម្រាប់​ការ​វិនិយោគ​បង្កើតកសិដ្ឋាន ចំការស្ដង់ដារ, ការបង្កើតរោងចក្រកែច្នៃកសិផល ដូចជា ដំណាំស្រូវ ស្វាយចន្ទី ឬផលិតផលកសិកម្មក្នុងស្រុក ដើម្បីបន្ថែមតម្លៃមុនពេលនាំចេញ។ វិនិយោគិនមិនមែនមកដាំដុះតែមួយមុខទេ តែពួកគេមកដើម្បីបង្កើតខ្សែសង្វាក់ផលិតកម្ម។

២.ការគាំទ្រពីរដ្ឋបាល​ដែល​នេះគឺជាផ្នែកសំខាន់បំផុតដើម្បីឱ្យវិនិយោគិនមានទំនុកចិត្ត៖

-ក្រោមយន្តការ “ច្រកចេញចូលតែមួយ” ថ្នាក់ខេត្ត ថ្នាក់ជាតិ ក្នុង​ការ​​ជួយ​សម្របសម្រួលឯកសារច្បាប់ ពាក់ព័ន្ធនឹងការចុះ​បញ្ជីអាជីវកម្ម និងការស្នើសុំអាជ្ញាប័ណ្ណផ្សេងៗ។
-ការធានានូវបរិយាកាសសុវត្ថិភាពសម្រាប់ការធ្វើអាជីវកម្ម និងស្ថិរភាពសង្គមក្នុងមូលដ្ឋាន។
-ហេដ្ឋារចនាសម្ព័ន្ធ មានផ្លូវជាតិលេខ ៧ ឆ្លងកាត់, មានផ្លូវកៅស៊ូ AC និង DBST គ្រប់បណ្ដាផ្លូវសំខាន់ៗ រួមទាំងបណ្ដាញផ្លូវផ្សេងទៀតងាយស្រួល លឿនរហ័ស៕

អត្ថបទ៖ ប្រុញ វិធិន