មេឃុំដារបង្ហាញពីផែនការអភិវឌ្ឍន៍ក្នុងឃុំ ខណៈ​ពលរដ្ឋរិះគន់ពី​ផ្លូវខូចពិបាកធ្វើដំណើរ

ស្ថានភាពផ្លូវក្រួសក្រហមមួយខ្សែ ស្ថិតក្នុងភូមិជួរជ្រៃ ឃុំដារ ស្រុកចិត្របុរី ខេត្តក្រចេះ មានការខូចខាត និងលេចចេញជាក្រឡុកដុំៗ ធ្វើឲ្យពលរដ្ឋពិបាកដល់ការធ្វើដំណើរម្តងៗ នៅពេលភ្លៀងធ្លាក់ និង​រង​ការ​រិះគន់​ពី​ពលរដ្ឋ​នៅលើ​បណ្ដាញសង្គមហ្វេសបុកផង​ដែរ។

ដើម្បីឆ្លើយតប និងបកស្រាយបំភ្លឺជូនប្រជាពលរដ្ឋ ក៏ដូចជាអ្នកនិយមលេងបណ្ដាញសង្គមហ្វេសប៊ុក ជុំវិញការបង្ហោះរិះគន់អំពីស្ថានភាពផ្លូវធ្វើដំណើរមានការខូចខាតនៅក្នុងមូលដ្ឋានខាងលើ លោក ឈាង វត មេឃុំដារ ស្រុកចិត្របុរី ខេត្តក្រចេះ បានប្រាប់ឲ្យដឹងថា លោកពិតជាទទួលស្គាល់ថា ស្ថានភាពផ្លូវនៅក្នុងភូមិជួរជ្រៃ ឃុំដារ ពិតជាមានការខូចខាត លេចចេញជាក្រឡុកដុំៗពិតប្រាកដមែន។

ទោះជាយ៉ាងណាក៏ដោយ លោកបានស្នើសុំការយោគយល់ពីសំណាក់បងប្អូនប្រជាពលរដ្ឋ និងបានពន្យល់ពីហេតុផល ក៏ដូចជាកម្រិតថវិការបស់ឃុំ។ ​

លោកមេឃុំ បានបញ្ជាក់ថា នៅក្នុងឃុំដា មានភូមិរដ្ឋបាលរហូតដល់ទៅ ១០ ភូមិ ហើយផ្លូវលំទាំងអស់មានប្រវែងសរុបជាង ៦០,០០០ គីឡូម៉ែត្រ។ ថវិកាអភិវឌ្ឍន៍របស់ឃុំក្នុងមួយឆ្នាំៗ គឺអាចធ្វើបានតែម្តងមួយភូមិៗប៉ុណ្ណោះ ដោយផ្អែកលើផែនការវិនិយោគ ៣ ឆ្នាំរំកិល និងការវាយតម្លៃជ្រើសរើសយកភូមិណាដែលរងការខូចខាតខ្លាំងជាងគេមុន។ ​

លោកមេឃុំ បានបន្តថា នៅក្នុងអាណត្តិទី៥ នេះ ឃុំបានសម្រេចការអភិវឌ្ឍហេដ្ឋារចនាសម្ព័ន្ធបានចំនួន ៤ ទៅ ៦ ភូមិរួចមកហើយ។ ដោយឡែកក្នុងឆ្នាំ២០២៦ ឃុំបានកំពុងផ្តោតលើការជួសជុលផ្លូវនៅភូមិតងួន ដែលជាភូមិជាប់គ្នា និងធ្លាប់រងការខូចខាតខ្លាំងជាងភូមិជួរជ្រៃ។

នៅឆ្នាំ ២០២៧ ខាងមុខ ឃុំមានផែនការច្បាស់លាស់រួចរាល់ក្នុងការបន្តទៅអភិវឌ្ឍ ភូមិជួរជ្រៃ (ដែលជាភូមិចុងក្រោយក្នុងផែនការនៃអាណត្តិ) ដោយគ្រោងធ្វើជា ផ្លូវបេតុង តែម្តង។

លោកបញ្ជាក់បន្ថែមថា ផ្លូវក្នុងភូមិជួរជ្រៃនេះមានប្រវែងសរុប ៤,០៣០ ម៉ែត្រ ហើយចំណុចដែលរងការ​ខូចខាតខ្លាំង ដូចក្នុងវីដេអូបង្ហោះនោះ គឺមានប្រវែងប្រហែល ៧៥០ ម៉ែត្រប៉ុណ្ណោះ ហើយជាផ្លូវខ្នងប្រឡាយ។ ចំពោះរូបភាពផ្លូវដែលរងការខូចខាតបែកភក់​ខ្លាំង លោកមេឃុំបានពន្យល់ថា នោះមិន​មែន​ជាផ្លូវលំស្ថិតក្រោមការគ្រប់គ្រងរបស់ឃុំឡើយ ប៉ុន្តែវាជាផ្លូវខ្នងប្រឡាយ ស្ថិតក្នុងគម្រោងរបស់ មន្ទីរធនធានទឹក។ ​

ដោយសារតែរដូវនេះជារដូវវស្សា មានភ្លៀងធ្លាក់ជោកជាំ បូករួមផ្សំនឹងការធ្វើដំណើរដឹកជញ្ជូនកសិផលធ្ងន់ៗ (ដូចជាដំឡូងមី ស្រូវ អង្ករ) របស់ប្រជាកសិករផងនោះ ទើបធ្វើឱ្យផ្លូវខ្នងប្រឡាយនេះរងការ​ខូចខាត។

មន្ទីរធនធានទឹក ក៏មានទិសដៅអភិវឌ្ឍ និងជួសជុលផ្លូវខ្នងប្រឡាយនេះឱ្យបានល្អប្រសើរ នៅក្នុងឆ្នាំ២០២៧ ខាងមុខនេះផងដែរ។

ឃុំដារ មានភូមិចំនួន ៤ភូមិ ក្នុងចំណោមភូមិទាំង ១០ គឺភូមិម្រ៉ើម តាងួន ជួរជ្រៃ និងភូមិខ្នងពស់ ជាភូមិនៅជាប់ព្រែតតេ ហើយក៏ជាភូមិដែលរងគ្រោះដោយទឹកជំនន់រាល់ឆ្នាំផងដែរ នារដូវវស្សា។ ​

ជាចុងក្រោយ លោកមេឃុំដារ បានអំពាវនាវដល់បងប្អូនប្រជាពលរដ្ឋទាំងអស់ មេត្តាជួយថែទាំផ្លូវនៅតាមមុខផ្ទះរៀងៗខ្លួន ដោយជួយលុប ឬកៀរក្រឡុកតូចៗជាបណ្តោះអាសន្ន ដើម្បីសម្រួលដល់ការធ្វើដំណើរក្នុងរដូវវស្សានេះ និងសូមឲ្យមានការទុកចិត្តលើថ្នាក់ដឹកនាំមូលដ្ឋាន ដែលតែងតែយកចិត្តទុកដាក់ និងមានផែនការអភិវឌ្ឍន៍ច្បាស់លាស់ទៅតាមជំហាននីមួយៗ៕

អត្ថបទ៖ ប្រុញ វិធិន