សពអ្នកកូវីដជាច្រើនត្រូវបានអ្នកបើកឡានពេទ្យដឹកយកទៅទម្លាក់ពីលើស្ពានចូលទន្លេ​ គង្គា

រូបភាពនៃសាកសពដែលគេអះអាងថា បោះចោលពីលើស្ពានដោយអ្នកបើកឡានពេទ្យ ត្រូវបានគេចែកចាយពាសពេញបណ្តាញសង្គម ខណៈមនុស្សជាច្រើនបានបង្ហាញការភ្ញាក់ផ្អើលនិងអាណិតអាសូរចំពោះជនរងគ្រោះដោយសារជំងឺកូវីដ-១៩ និងក្រុមគ្រួសាររបស់ពួកគេ។ ក្រុមមន្រ្តីនៅរដ្ឋ Bihar បាននិយាយថា សាកសពដែលអណ្តែតមកទើរលើច្រាំងទន្លេគង្គាក្នុងទីក្រុង Buxar កាលពីម្សិលមិញ គឺមានចំនួន៧១នាក់ ហើយពួកគេបានស្តីបន្ទោសទៅរដ្ឋ Uttar Pradesh ចំពោះករណីនេះ។

សមាជិកសភាគណបក្ស BJP របស់រដ្ឋ Bihar ឈ្មោះ Janardhan Singh Sigriwal ចោទប្រកាន់ថា សាកសពជនរងគ្រោះកូវីដ កំពុងត្រូវបានក្រុមអ្នកបើកឡានពេទ្យ ដឹកទាំងឡានៗយកមកទម្លាក់ចូលក្នុងទឹកទន្លេពីលើស្ពាន Jaiprabha Setu ស្ថិតនៅក្នុងស្រុក Saran នៃខេត្ត Bihar ជិតព្រំប្រទល់រដ្ឋ Uttar Pradesh។ យោងតាមតួលេខដែលចេញផ្សាយដោយក្រសួងសុខាភិបាលកាលពីថ្ងៃអង្គារ បានបង្ហាញថា ប្រទេសឥណ្ឌា បានកត់ត្រាការឆ្លងជំងឺកូវីដ-១៩ថ្មីចំនួន ៣២៩,៩៤២ករណី ដែលនាំឲ្យចំនួនសរុបកើនដល់ ២២,៩៩២,៥១៧ករណី៕

ប្រែសម្រួលដោយ៖ Vann Vann

ប្រភព៖ NDTV