យុទ្ធសាស្ត្រចំនួន៥ គឺជាធាតុផ្សំដ៏សំខាន់សម្រាប់អនុវត្តគោលនយោបាយរដ្ឋាភិបាល ឌី ជី ថល កម្ពុជា ២០២១ -២០៣០

លោក ណុប ចាន់ណារិន្ទ រដ្ឋលេខាធិការ ក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច បានថ្លែងថា ដើម្បីលើកកម្ពស់គុណភាពជីវិត និងទំនុកចិត្តប្រជាពលរដ្ឋតាមរយៈ ការប្រើប្រាស់សេវាសាធារណៈកាន់តែប្រសើរ ដោយបានដាក់ចេញនូវវិធានការនយោបាយអាទិភាព ក្រោមក្របខណ្ឌយុទ្ធសាស្ត្រចំនួន ៥គឺជាធាតុផ្សំដ៏សំខាន់សម្រាប់អនុវត្តគោលនយោបាយរដ្ឋាភិបាល ឌី ជី ថល កម្ពុជា ២០២១ -២០៣០។

លោក ណុប ចាន់ណារិន្ទ ថ្លែងបែបនេះ ពេលដឹកនាំក្រុមការងារគ្រប់គ្រង និងអភិវឌ្ឍន៍ប្រព័ន្ធព័ត៌មានវិទ្យាប្រចាំក្រសួង ចួលរួមក្នុងកិច្ចប្រជុំតាមOnline នាថ្ងៃម្សិលមុិញជាមួយនឹងលោក សុខ ពុទ្ធិវុធ រដ្ឋលេខាធិការ ក្រសួងប្រៃសណីយ៍ និងទូរគមនាគមន៍ ដើម្បីពិភាក្សាពិគ្រោះយោបល់ លើសេចក្តីព្រាង គោលនយោបាយរដ្ឋាភិបាលឌីជីថលកម្ពុជា ២០២១ -២០៣០ នាទីស្តីការក្រសួង។

លោកណុប ចាន់ណារិន្ទ រដ្ឋលេខាធិការ ក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច បានថ្លែងថា កិច្ចប្រជុំ តាមOnline ជាមួយនឹង លោក សុខ ពុទ្ធិវុធ រដ្ឋលេខាធិការ ក្រសួងប្រៃសណីយ៍ និងទូរគមនាគមន៍ ព្រមទាំងមន្ត្រីពាក់ព័ន្ធមានសារៈសំខាន់ណាស់គឺដើម្បីពិភាក្សាពិគ្រោះយោបល់ លើសេចក្តីព្រាង គោលនយោបាយរដ្ឋាភិបាល​ឌីជីថលកម្ពុជា ២០២១ -២០៣០ ក្រោមយុទ្ធសាស្ត្រចំនួន៥ចំនុចសំខាន់ៗដែលត្រូវប្រតិបត្តិពេលខាងមុខនេះ
ទទួល​បាន​ជោគជ័យតាមការគ្រោងទុក។

លោកណុប ចាន់ណារិន្ទ បានថ្លែងថា គោលនយោបាយរដ្ឋាភិបាលឌីជីថលកម្ពុជា ២០២១ -២០៣០ នេះមានគោលបំណង លើកកម្ពស់គុណភាពជីវិត និងទំនុកចិត្តប្រជាពលរដ្ឋតាមរយៈ ការប្រើប្រាស់សេវាសាធារណៈកាន់តែប្រសើរ ដោយបានដាក់ចេញនូវវិធានការនយោបាយអាទិភាពក្រោមក្របខណ្ឌយុទ្ធសាស្ត្រចំនួន ៥ ៖ ទី(១) បទដ្ឋាន​គតិយុត្តរដ្ឋាភិបាលឌីជីថល ទី(២) ហេដ្ឋារចនាសម្ពន្ធឌីជីថល ទី(៣) សេវារដ្ឋាភិបាលឌីជីថល ទី(៤) ការកសាងសមត្ថ​ភាព ការស្រាវជ្រាវ និងនវានុវត្តន៍ឌីជីថល និង ទី(៥) ភាពជាដៃគូរវាងរដ្ឋ និងឯកជន ។

នៅក្នុងកិច្ចប្រជុំនោះផងដែរ លោក ណុប ចាន់ណារិន្ទ ក៏បានលើកឡើងអំពីតួនាទី និងភារកិច្ចរបស់ក្រសួង និងបានសំណូមពរ បំពេញបន្ថែម នូវបណ្តាធាតុចូលមួយចំនួនទៅក្នុងគោលនយោយបាយពាក់ព័ន្ធនឹងវិស័យរបស់ក្រសួងទំនាក់ទំនងជាមួយដ្ឋសភា-ព្រឹទ្ធសភា និងអធិការកិច្ចផងដែរ ៕

អត្ថបទ ៖ វិមាន