រដ្ឋមន្ត្រីវប្បធម៌៖ មរណភាពរបស់លោកព្រឹទ្ធាចារ្យ សាឡាត់ គឺជាការបាត់បង់ដ៏ធំធេងមួយទៀតនៃវិស័យសិល្ប:វប្បធម៌ខ្មែរ

ភ្នំពេញ៖ លោក ស្រី បណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្ប: បានលើកឡើងថា មរណភាពរបស់លោកព្រឹទ្ធាចារ្យ ទឹង វ៉ាន់ ហៅលោកតាសាឡាត់គឺជាការបាត់បង់ដ៏ធំធេងមួយទៀតនៃវិស័យសិល្ប:វប្បធម៌ខ្មែរ ដែលលោកព្រឹទ្ធាចារ្យធ្លាប់បានផ្តល់សំណើចរាប់មិនអស់ចំពោះបងប្អូនជនរួមជាតិយើងរាប់ជំនាន់មកហើយ ថែមទាំងបង្ហាត់បង្រៀនសិល្បករជំនាន់ក្រោយជាច្រើនរូបទៀតផង។

លោកស្រីរដ្ឋមន្ត្រីរដ្ឋមន្ត្រីបានលើកឡើងបែបនេះខណៈដែលលោកស្រីបានអញ្ជើញគោរពវិញ្ញាណក្ខន្ធសពលោកព្រឹទ្ធាចារ្យ ទឹង វ៉ាន់ ហៅលោកតាសាឡាត់កាលពីល្ងាចថ្ងៃទី១៨ខែមិថុនាឆ្នា២០២១នៅគហដ្ឋាននៃសព។

លោក ស្រី រដ្ឋមន្ត្រីបានបន្តថា«គុណបំណាច់របស់លោកព្រឹ ទ្ធាចារ្យសាឡាត់នេះមានតម្លៃមិនអាចកាត់ថ្លៃបានទេ ហើយស្ថិតនៅជាប់ជានិច្ចក្នុងដួងចិត្តរបស់សិល្បករ និងទស្សនិកជនគ្រប់ៗរូប»។

ក្នុងឱកាសដ៏សង្រេងក្រៀមក្រំនេះ លោកស្រីក៏បានពាំនាំសាររំលែកទុក្ខ ព្រមទាំងថវិការបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជាចំនួន ៥លានរៀលជូនគ្រួសារសព ក្នុងនោះលោកស្រីរដ្ឋមន្រ្តី បានចូលបច្ច័យថវិកា ចំនួន ៣លានរៀល និងទទួលជួយសហការចាត់ចែងរៀបចំក្នុងពិធីបុណ្យសពនោះផងដែរ។

គួរបញ្ជាក់ថា លោកព្រឹទ្ធាចារ្យសិល្បៈ ទឹង វ៉ាន់ ហៅលោកតាសាឡាត់ បានទទួលមរណភាពនាថ្ងៃសុក្រ ទី១៨ ខែមិថុនា ឆ្នាំ២០២១ វេលាម៉ោង ៨:០០នាទីព្រឹក ក្នុងជន្មាយុ៨១ឆ្នាំ ដោយជរាពាធ ៕

សំអឿន