ក្រសួង ​កំពុងរៀបចំឲ្យនិស្សិតកម្ពុជា ១២៨នាក់ ​នៅអ៊ីស្រា​អែល បានត្រឡប់មកវិញ

លោក កុយ គួង អ្នកនាំពាក្យក្រសួងការបរទេស និងសហប្រតិបត្តិការ អន្តរជាតិកម្ពុជា បានឲ្យដឹង​នៅព្រឹក​នេះថា  រាជរដ្ឋាភិបាលកម្ពុជា តាមរយៈក្រសួងការបរទេស និងសហប្រតិបត្តិការអន្តរ​ជាតិ ​កំពុង​សម្រប​សម្រួល​ជាមួយរដ្ឋាភិបាលអ៊ីស្រាអែល ដើម្បីរៀបចំ​មាតុភូមិនិវត្តន៍​និស្សិតកម្ពុជា ចំនួន១២៨ នាក់ ដែល​​បញ្ចប់ការសិក្សានៅប្រទេសអ៊ីស្រាអែល ហើយជួបការលំបាកក្នុងការធ្វើដំណើរ ក្នុងអំឡុងពេលវិបត្តិកូវីដ-១៩ បានត្រឡប់មកមាតុប្រទេសវិញ។ 

បើតាមលោក កុយ គួង ដោយមានកិច្ចសហការល្អរវាងរដ្ឋាភិបាល នៃប្រទេសទាំងពីរ ភាគីអ៊ីស្រាអែល នឹង​បញ្ជូននិស្សិតកម្ពុជា មកដល់ព្រលានយន្តហោះអន្តរជាតិភ្នំពេញ នៅសប្តាហ៍ក្រោយនេះ ចន្លោះថ្ងៃទី២៣ ដល់ថ្ងៃទី៣០ ខែវិច្ឆិកា តាមជើងយន្តហោះពិសេស ដែលហោះត្រង់ពីប្រទេសអ៊ីស្រាអែល មកកាន់​កម្ពុជា​។ 
 
លោក កុយ គួង បញ្ជាក់ថា ពេលមកដល់កម្ពុជា ជើងយន្តហោះពិសេសនោះ នឹងដឹកបញ្ជូននិស្សិត​កម្ពុជា​ដែល​បានទទួលអារូបករណ៍ចំនួន២៥០នាក់ ផ្សេងទៀត ទៅបន្តការសិក្សានៅប្រទេសអ៊ីស្រា​អែល វិញផង​ដែរ៕

អត្ថបទ ៖ កោះកែវ