ទឹកទន្លេមេគង្គខេត្តកំពង់ចាមតែមួយយប់ ឡើងជិត១.៥ម៉ែត្រ

កំពង់ចាម៖  ពីមួយថ្ងៃទៅមួយថ្ងៃ ស្ថានភាពកម្ពស់ទឹកទន្លេមេគង្គ នៅតាមបណ្តាខេត្ត ជាប់ដងទន្លេមេគង្គ បានបន្តហក់ឡើងជាបន្ទបន្ទាប់ ខណៈនៅព្រឹកថ្ងៃទី២៨ ខែកក្កដានេះ  កម្ពស់ទឹកទន្លេមេគង្គកំពង់ចាមមានកម្ពស់៩ម៉ែត្រ ៥២សង់ទីម៉ែត្រ ហេីយ ដោយកម្រិតត្រូវប្រកាសអាសន្នគឺ ១៥ម៉ែត្រ ២០សង់ទីម៉ែត្រ។

នេះយោងតាមរបាយការណ៍កម្ពស់ទឹក ពីមន្ទីរធនធានទឹក និងឧត្តុនិយម ខេត្តកំពង់ចាម បានបញ្ជាក់ថា នៅថ្ងៃទី២៨ ខែកក្កដា ឆ្នាំ២០២១  កម្ពស់ទឹកបានឡើងសន្សឹមៗ ដល់កម្ពស់ ៩,៥២ម៉ែត្រ បើធៀបទៅនឹងថ្ងៃម្សិលមិញ ទឹកឡើង ១,៤៨ម៉ែត្រ។

ជាមួយគ្នានេះដែរ បងប្អូនប្រជាពលរដ្ឋមួយចំនួនដែលរស់នៅតាមដងទន្លេមេគង្គ ដូចក្នុងខេត្តកំពង់ចាម ត្បូងឃ្មុំ បានលើកការព្រួយបារម្ភថា បើទឹកទន្លេឡើងតូចដូចឆ្នាំទៅ គឺពួកគាត់ជួបការលំបាកក្នុងការងារបង្កបង្កើនផលហើយ ជាពិសេសធ្វើឱ្យដីរឹង ពិបាកភ្ជួររាស់ សម្បូរសត្វកណ្តុរ និងស្រមោចមករំខាន។

ក្រៅពីនោះ ទឹកតូចពេក ក៏មិនបាននាំមកនូវដីល្បាប់ សម្រាប់ការងារដាំដុះដំណាំផ្សេងៗ ប៉ុន្តែបើទឹកជំនន់ធំ និងអូសបន្លាយយូរពេក ក៏ពួកគាត់មិនចង់បានដែរ ពោលគឺ ពួកគាត់ប្រាថ្នាចង់បាន នូវកម្ពស់ទឹកជំនន់សមល្មម និងអាចលិចដីបង្កបង្កើនផល ត្រឹមតែរយៈពេលខ្លីប៉ុណ្ណោះ គឺវាគ្រប់គ្រាន់ហើយ៕

អត្ថបទ  និង  រូបភាព៖ ហុង  ម៉េងហៀ