ទឹកទន្លេមេគង្គ ខេត្តកំពង់ចាម ​ឡើងដល់ ៨,៧៦ ម៉ែត្រ ខ្ពស់ជាងឆ្នាំមុន

ស្ថានភាពអាកាសធាតុក្នុងខេត្តកំពង់ចាម-ត្បូងឃ្មុំ​ មួយរយៈ​ចុងក្រោយ​នេះ​ មានធ្លាក់ភ្លៀងតាមតំបន់ ហេីយទឹកទន្លេមេគង្គ ក៏បានបន្តហក់ឡើងជាបន្ទបន្ទាប់​​ ពោលឡើងដល់ ៨,៧៦ ម៉ែត្រ ខ្ពស់ជាងឆ្នាំមុន ប៉ុន្តែ​មិនទាន់ដល់កម្រិតប្រកាសអាសន្ននៅឡេីយទេ។

យោងតាមរបាយការណ៍កម្ពស់ទឹក ពីមន្ទីរធនធានទឹក និងឧត្តុនិយម ខេត្តកំពង់ចាម​ បានបញ្ជាក់ថា នៅថ្ងៃទី៣១​ ខែកក្កដា​ ឆ្នាំ២០២៣នេះ ទឹកទន្លេមេគង្គខេត្តកំពង់ចាម មានកម្ពស់ ៨,៧៨ ម៉ែត្រ ធៀបថ្ងៃម្សិលមិញ ទឹកឡើង ០,០៨ ម៉ែត្រ។ ដោយឡែកកម្ពស់ទឹកនាពេលនេះ បើធៀបទៅឆ្នាំ២០២២ ទឹកទន្លេមានកម្ពស់តែ ៨,២៤ ម៉ែត្រ។

កម្ពស់ទឹកទន្លេឡេីងនៅពេលនេះ​ បានហូរចូលទៅតំបន់វាលទំនាបចំនួន ៥ កន្លែង​ ក្នុងនោះស្រុកកងមាស​ ១ កន្លែង ស្រុកកំពង់សៀម​ ២ កន្លែង និងស្រុកស្ទឹងត្រង់​ចំនួន ២ កន្លែង​។ ដោយឡែកនៅតាមដងទន្លេតូច​ ក្នុងស្រុកកោះសូទិន​ ការធ្វេីដំណេីររបស់ប្រជាពលរដ្ឋ​​នៅរដូវនេះ​ គឺធ្វេីដំណេីរតាមទូកចម្លង​ ឬកាណូត​ឆ្លងពីត្រេីយម្ខាងទៅម្ខាង។

ប្រជាពលរដ្ឋ ដែលរស់នៅតាមដងទន្លេមេគង្គ ដូចក្នុងខេត្តកំពង់ចាម-ត្បូងឃ្មុំ​ បានលើកការព្រួយបារម្ភថា បើទឹកទន្លេឡើងតូចដូចឆ្នាំទៅ គឺពួកគាត់ជួបការលំបាកក្នុងការងារបង្កបង្កើនផល ជាពិសេសធ្វើឱ្យដីរឹង ពិបាកភ្ជួររាស់ សំបូរសត្វកណ្តុរ និងស្រមោចមករំខាន។

ក្រៅពីនោះ ទឹកតូចពេក ក៏មិនបាននាំមកនូវដីល្បាប់ សម្រាប់ការងារដាំដុះដំណាំផ្សេងៗ ប៉ុន្តែបើទឹកជំនន់ធំ និងអូសបន្លាយយូរពេក ក៏ពួកគាត់មិនចង់បានដែរ ពោលគឺ ពួកគាត់ប្រាថ្នាចង់បាននូវកម្ពស់ទឹកជំនន់សមល្មម និងអាចលិចដីបង្កបង្កើនផល ត្រឹមតែរយៈពេលខ្លីប៉ុណ្ណោះ គឺគ្រប់គ្រាន់សម្រាប់ពួកគាត់៕

អត្ថបទ ​និង​រូបភាព​៖ ​ឡេក​ ចាន់ពេជ្រ​