មន្ទីរធនធានទឹក​ស្ទឹងត្រែង​ប្រកាសឱ្យ​ប្រុងប្រយ័ត្ន​ទឹក​ឡើង​អាចដល់កម្រិតប្រកាសអាសន្ន

មន្ទីរធនធានទឹកខេត្តស្ទឹងត្រែង​បានជូនដំណឹងដល់​អាជ្ញាធរស្រុក​ដែលនៅជាប់ដងទន្លេមេគង្គ​ ដងទន្លេសេសាន ពិសេសដងទន្លេសេកុងត្រូវឱ្យប្រជាពលរដ្ឋដែលរស់នៅតាមដងទន្លេ​ វាលទំនាប​បង្កើនការប្រុងប្រយ័ត្នខ្ពស់ ព្រោះទឹកជំនន់ហូរចាក់ពីប្រទេសឡាវ និងអាចឈានដល់​ការប្រ​កាសអាសន្ន។

​លោក ប៉ាង ប៉េង​ប្រធានមន្ទីរធនធានទឹកខេត្តស្ទឹងត្រែង​បានបញ្ជាក់ថា​ បន្ទាប់ពីមានភ្លៀងធ្លាក់​ស្ទើរតែ​ទាំងយប់​ទាំងថ្ងៃ និង​ទឹកហូរធ្លាក់មកពីប្រទេសឡាវផងនោះធ្វើឲ្យទឹកទន្លេទាំងបីពិសេសទន្លេសេកុង ក្នុងខេត្តស្ទឹងត្រែ បានហក់ឡើងយ៉ាងឆាប់រហ័សក្នុងមួយយប់ឡើងរហូតជាងមួយម៉ែត្រ។

​លោកប្រធានមន្ទីរធនធានទឹកខេត្តស្ទឹងត្រែងបានបញ្ជាក់នៅព្រឹកថ្ងៃទី ៣០ កក្កដានេះថា ស្ថានភាព​ទឹកទន្លេទាំង ៣ ក្នុងខេត្តស្ទឹងត្រែងទន្លេមេគង្គព្រឹកម្សិល ៨,៥៥ ​ម៉ែត្រ ព្រឹកនេះ ៩,៨២​ ម៉ែត្រឡើង ​១.២៧ ​ម៉ែត្រ ប្រកាសអាសន្ន ១០,៧០ ម៉ែត្រ។ ​

ទន្លេសេកុងព្រឹកម្សិល១០,០០ម៉ែតព្រឹកនេះមានកម្ពស់ទឹក១១,០៨ម៉ែត្រឡើង១,០៨ម៉ែត្រ ប្រកាស​អាសន្ន ១១,៥០ម៉ែត្រ។ និងទន្លេសេសានព្រឹកម្សិល៧.៥៥ព្រឹកនេះ​មានកម្ពស់ទឹក៩,០២ម៉ែត្រឡើង១,៤៧ម៉ែត្រ ប្រកាសអាសន្ន​១០,៥០ម៉ែត្រ។

​លោកប្រធានមន្ទីរបានបញ្ជាក់បន្ថែមថា បន្ទាប់ពីរទទួលឥទ្ធិពលព្យុះនិងមានការជូនដំណឹង​របស់​ក្រសួងធនធានទឹក ពេលនេះអស់ព្យុះតែទឹកវានៅមានពីច្រកហូរពីប្រទេសឡាវ មានទន្លេមេគង្គ​និងទន្លេសេកុង ហើយស្ថានភាពដងទន្លេទាំងពីរហ្នឹងក៏វាខ្លាំង ហើយទន្លេសេសានវិញ​ក៏ទទួលព្យុះ​និងកខ្លាំងតែពេលនេះព្យុះទៅបាត់ទៅទឹកវាឡើង។

​លោកប្រធានមន្ទីរបានបន្តទៀតថា​ បើមើលពីស្ថានភាពទឹកមិនទាន់ហូរ​អស់វា​ចេះតែឡើង អញ្ចឹងយើងត្រូវតែត្រៀមនៅក្នុងអំឡុងពីរថ្ងៃទៀតប្រហែលជាអស់ហើយ តែក៏វា​អាច​ឈានដល់ការប្រកាសអាសន្នដែរ សម្រាប់ទន្លេសេកុង ក្នុងស្រុកសៀមប៉ាង ដែលវាធ្លាប់បាក់​ទំនប់សេរណាំណយខេត្តអត្តពឺនប្រទេសឡាវ ពេលគេធ្វើភ្ជាប់ឡើងវិញគេបើកទម្លាក់មកធ្វើឲ្យ​ទឹក​ឡើង​ហក់ឡើងខ្លាំងនៅក្នុងស្រុកសៀមប៉ាងអាចដល់ការប្រកាសអាសន្ន។

​លោកប្រធានមន្ទីរបន្តថា ដោយឡែកទន្លេមេគង្គនិងនៅក្បែរៗប្រកាសអាសន្នតាមការព្យាករណ៍​របស់ក្រសួងធនធានទឹក។ចំណែកទន្លេសេសានក៏នៅក្រោមការប្រកាសអាសន្នដែរ អញ្ចឹងមានតែ​សៀមប៉ាងមួយទេដែលអាចឈានដល់ការប្រកាសអាសន្ន។

​លោកបញ្ជាក់ថា តាមការជូនដំណឹងរបស់មន្ទីរធនធានទឹកខេត្តស្ទឹងត្រែងបានជូនដំណឹង​ដល់អាជ្ញាធរ​គ្រប់ស្រុកតាមតេឡេក្រាមបន្ទាន់ឱ្យគាត់ធ្វើការផ្សព្វផ្សាយតាមភូមិឃុំរបស់គាត់ជូនដល់​ប្រជាពលរដ្ឋឱ្យលើកកម្ពស់ការប្រុងប្រយ័ត្នជាពិសេសប្រជាពលរដ្ឋដែលរស់នៅតាមដងទន្លេសេកុងក្នុងស្រុកសៀមប៉ាង៕

អត្ថបទ៖ ងិនលីម