ទឹកទន្លេមេគង្គខេត្តកំពង់ចាម បន្តហក់ឡើងថែមទៀត ធ្វើឱ្យព្រែកចំនួន៣៦ក្នុងខេត្ត ទទួលរបបទឹកទន្លេមេគង្គ

នៅថ្ងៃទីទី០៩ ខែកញ្ញា ឆ្នាំ២០២៥ នេះ ស្ថានភាពទឹកទន្លេមេគង្គខេត្តកំពង់ចាម បានបន្តហក់ឡើងថែមទៀត ធ្វើឱ្យព្រែកចំនួន៣៦ព្រែក ក្នុងចំណោមព្រែកទាំង៤១ក្នុងខេត្តកំពង់ចាម បានទទួលនូវរបបទឹកទន្លេមេគង្គ។ នេះបើតាមប្រភពពីការិយាល័យទីភ្នាក់ងារសារព័ត៌មានកម្ពុជាAKP នៃមន្ទីរព័ត៌មានខេត្តកំពង់ចាម។

លោក អ៊ុម វិបុល ប្រធានមន្ទីរធនធានទឹក និងឧតុនិយមខេត្តកំពង់ចាម បានបញ្ជាក់ថា ចំពោះស្ថានភាពទឹកទន្លេមេគង្គខេត្តកំពង់ចាម នៅថ្ងៃដាក់បិណ្ឌវេណទី២​​​​​ នេះ ទឹកទន្លេបានហក់ឡើងថែមទៀតដល់កម្ពស់១៣,៤០ម៉ែត្រ ធៀបថ្ងៃម្សិលមិញទឹកឡើងកម្ពស់០,១០ម៉ែត្រ។ កម្ពស់ទឹកនាពេលនេះធៀបទៅឆ្នាំ២០២៤ ទឹកទន្លេ មានកម្ពស់ ១១,៥០ម៉ែត្រខណៈដែលចំណុចប្រកាសប្រុងប្រយ័ត្នមានកម្ពស់១៥,២០ម៉ែត្រ។

ដោយឡែក ចំពោះស្ថានភាពអាកាសធាតុកាលពីម្សិលមិញគឺមានភ្លៀងធ្លាក់តិច ឫច្រើនក្នុងស្រុកកុ្រងចំនួន៦នៃខេត្តកំពង់ចាម៕