ព័ត៌មានជាតិ

មន្ទីរពេទ្យធំពីរកន្លែងនៅក្រុងភ្នំពេញ រកឃើញអ្នកជំងឺនិងបុគ្គលិកឆ្លងកូវីដបំប្លែងថ្មីពីឥណ្ឌា

បានផុស

៥ years មុន

នៅ

ថ្ងៃចន្ទ ២ សីហា ២០២១

ដោយ

ក្រសួងសុខាភិបាលបានប្រកាសរកឃើញករណីឆ្លងកូវីដបំប្លែងថ្មី B.1.617.2 (Delta) ចំនួន ១០៩ ករណីនៅថ្ងៃទី៣១ ខែកក្កដា និងនៅថ្ងៃទី០១ ខែសីហា ឆ្នាំ២០២១។

ខេត្តក្រុងចំនួន ១១ ប៉ះពាល់រកឃើញអ្នកឆ្លងកូវីដកាចសហាវមានប្រភពមកពីឥណ្ឌានេះ។ ដោយឡែកមានមន្ទីរពេទ្យពីរកន្លែងនៅក្រុងភ្នំពេញ និងមណ្ឌលព្យាបាលមួយកន្លែង មានអ្នកជំងឺនិងបុគ្គលិកពេទ្យបានឆ្លងកូវីដបំប្លែងថ្មីនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើយោងតាមសេចក្តីប្រកាសរបស់ក្រសួងសុខាភិបាលនៅថ្ងៃ ៣១ កក្កដាឆ្នាំ២០២១ នៅមណ្ឌលព្យាបាលសែនសុខរាជធានីភ្នំពេញរកឃើញមួយករណីជាពលករមកពីថៃ។ ដោយឡែកនៅថ្ងៃ ០១ សីហាឆ្នាំ២០២១ មានមួយករណីលើអ្នកជំងឺមកមន្ទីរពេទ្យកាល់ម៉ែត្រ និងពីរករណីទៀតរកឃើញនៅមន្ទីរពេទ្យមិត្តភាពខ្មែរសូវៀត ពាក់ព័ន្ធបុគ្គលិកអនាម័យម្នាក់ និងអ្នកជំងឺផ្នែកសង្រ្គោះបន្ទាន់ម្នាក់។

វីរុសដែលតា (Delta) កំពុងរាតត្បាតចូលក្នុងសហគមន៍ ហើយរដ្ឋមន្ត្រីក្រសួងសុខាភិបាល បានក្រើនរំលឹកដល់ពលរដ្ឋ បន្តប្រុងប្រយ័ត្នខ្ពស់ ការពារខ្លួន កុំភ្លេចខ្លួនឲ្យសោះ កាត់បន្ថយការធ្វើដំណើរចល័ត ឬនៅផ្ទះ ប្រសិនមិនមានភារកិច្ចចាំបាច់។

ក្រសួងសុខាភិបាលសង្កេតឃើញថា ការចម្លងនាបច្ចុប្បន្ននេះមានសន្ទុះកើនឡើងលើយុវវ័យ ដែលក្រុមនេះបានដើរចេញក្រៅផ្ទះច្រើន ឬមានការជួបជុំមិត្តភ័ក្ត្រ អាចនាំជំងឺចូលផ្ទះឆ្លងរាលដាលដល់សមាជិក គ្រួសារឪពុកម្តាយ ជីដូនជីតា ឬអ្នកមានជំងឺប្រចាំកាយដែលជាបុគ្គលងាយរងគ្រោះ និងប្រឈមខ្ពស់ចំពោះភាពធ្ងន់ធ្ងរនៃជំងឺ ឬឈានទៅដល់ការស្លាប់បើមានការឆ្លងនូវ វីរុសកូវីដ-១៩ នេះ៕

អត្ថបទ៖ ប៊ុណ្ណារ៉ា

Related Topics: