ព័ត៌មានជាតិ
គណបក្សកែទម្រង់កម្ពុជា បានដាក់ឯកសារពាក់ព័ន្ធ ដែលក្រសួងមហាផ្ទៃ ឲ្យកែរួចហើយ
ក្រុមការងារគណបក្សកែទម្រង់កម្ពុជា បានដាក់ឯកសារចូលក្រសួងមហាផ្ទៃ កាលពីថ្ងៃច័ន្ទដើមសប្ដាហ៍នេះ ក្រោយក្រសួងមហាផ្ទៃ បានពិនិត្យឃើញថា ស្ថាបនិកគណបក្សនេះ ពុំទាន់បានបំពេញសំណុំឯកសារគ្រប់គ្រាន់ និងត្រឹមត្រូវតាមបញ្ញត្តិនៃច្បាប់ ស្ដីពី គណបក្សនយោបាយ។
លោក អ៊ូ ច័ន្ទរ័ត្ន អតីតតំណាងរាស្រ្ដ នៃអតីតគណបក្សសង្រ្គោះជាតិ និងជាសហស្ថាបនិកគណបក្សកែទម្រង់កម្ពុជា បានឲ្យអ្នកសារព័ត៌មានកម្ពុជាថ្មី ដឹងនៅព្រឹកថ្ងៃទី២ ខែកញ្ញានេះថា កាលពីថ្ងៃទី៣០ ខែសីហាកន្លងទៅនេះ ក្រុមការងាររបស់លោក បានដាក់ឯកសារ និងលក្ខន្តិកៈជាថ្មីរួចហើយ ទៅកាន់ក្រសួងមហាផ្ទៃ។
លោក អ៊ូ ច័ន្ទរ័ត្ន បានឲ្យដឹងបន្តថា «យើងឃើញ មានប៉ុន្មានចំណុច នៅក្នុងលក្ខន្តិកៈគណបក្សហ្នឹង ក្រសួងមហាផ្ទៃ លោកថា ផ្ទុយនឹងច្បាប់ គណបក្សនយោបាយ ហើយយើងបានកែហើយ មាត្រាប៉ុន្មាន ប្រការប៉ុន្មានហ្នឹងយើងកែអស់ហើយ ទី២គណៈកម្មការបណ្ដោះអាសន្ន យើងត្រូវមានលិខិត តែងតាំងជាផ្លូវការត្រឹមត្រូវ មិនអាចដាក់គ្រាន់តែជាបញ្ជីទេ អញ្ចឹងណា៎ តែយើងបានធ្វើហើយ… ហើយគោលនយោបាយមួយចំនួន កម្មវិធីនយោបាយសំខាន់ៗមួយចំនួនហ្នឹង ឲ្យដាក់បំបែកចេញពីលក្ខន្តិកៈ មិនឲ្យដាក់នៅក្នុងលក្ខន្តិកៈ ហើយយើងបានធ្វើសព្វគ្រប់អស់ហើយ ហើយដាក់ទៅក្រសួងមហាផ្ទៃវិញហើយ»។
គួររំលឹកថា សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ កាលពីថ្ងៃទី២០ ខែសីហា ឆ្នាំ២០២១ បានចេញលិខិតមួយ ជម្រាបទៅលោក ប៉ុល ហំម សហស្ថាបនិកគណបក្សកែទម្រង់កម្ពុជា ស្ដីពី សំណើសុំចុះឈ្មោះគណបក្សកែមទ្រង់កម្ពុជា ក្នុងបញ្ជីគណបក្សនយោបាយ នៅក្រសួងមហាផ្ទៃ។
នៅក្នុងលិខិតនោះ បានបញ្ជាក់ថា ក្រសួងមហាផ្ទៃ បានទទួលសំណើសុំចុះឈ្មោះ «គណបក្សកែទម្រង់កម្ពុជា» ក្នុងបញ្ជីគណបក្សនយោបាយ នៅក្រសួងមហាផ្ទៃ។ ប៉ុន្ដែពាក់ព័ន្ធនឹងសំណើនេះ ក្រសួងមហាផ្ទៃ បានពិនិត្យឃើញថា ស្ថាបនិកគណបក្សកែទម្រង់កម្ពុជា ពុំទាន់បានបំពេញសំណុំឯកសារគ្រប់គ្រាន់ និងត្រឹមត្រូវស្របតាមបញ្ញត្តិមាត្រា៩ និងមាត្រា២០ នៃច្បាប់ស្តីពីគណបក្សនយោបាយ។
ក្រសួងមហាផ្ទៃ បានបញ្ជាក់ទៀតថា គណបក្សនេះពុំបានភ្ជាប់មក ជាមួយនូវឯកសារ មួយចំនួន រួមមាន៖ ទី១-សេចក្ដីសម្រេច បង្កើតគណៈកម្មាធិការបណ្ដោះអាសន្ន ,ទី២-គោលនយោបាយ និងកម្មវិធីនយោបាយសំខាន់ៗរបស់គណបក្ស និងទី៣-លក្ខន្តិកៈគណបក្សពុំមានចុះកាលបរិច្ឆេទ និងហត្ថលេខារបស់ប្រធានគណបក្សឡើយ។ទន្ទឹមនេះ លក្ខន្តិកៈគណបក្សមានកំហុសអក្ខរាវិរុទ្ធជាច្រើន ហើយខ្លឹមសារប្រការមួយចំនួន មានលក្ខណៈផ្ទុយនឹងបទប្បញ្ញត្តិ នៃច្បាប់ស្តីពីគណបក្សនយោបាយ។
លោក អ៊ូ ច័ន្ទរ័ត្ន សហស្ថាបនិកគណបក្សកែទម្រង់កម្ពុជា បានបង្ហាញក្ដីសង្ឃឹមថា គណបក្សរបស់លោក នឹងអាចចុះឈ្មោះ ក្នុងបញ្ជីគណបក្សនយោបាយ នៅក្រសួងមហាផ្ទៃជាផ្លូវការ ក្នុងពេលឆាប់ៗនេះ ក្រោយពីបានដាក់ឯកសារ និងលក្ខន្តិកៈជាថ្មីរួចហើយ។ ទោះជាបែបនេះក្ដី សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បាននឹងកំពុងស្ថិត នៅប្រទេសបារាំងនៅឡើយ ដើម្បីពិនិត្យសុខភាព រហូតដល់ថ្ងៃទី៥ ខែកញ្ញា ឆ្នាំ២០២១ ទើបត្រឡប់មកកាន់ប្រទេសកម្ពុជាវិញ៕
អត្ថបទ៖ ឃួន សុភ័ក្រ
-
កីឡា៦ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៥ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
សន្តិសុខសង្គម៧ ថ្ងៃ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ១ សប្តាហ៍ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៥ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ព័ត៌មានអន្ដរជាតិ៥ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ជីវិតកម្សាន្ដ៦ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
ព័ត៌មានអន្ដរជាតិ៧ ថ្ងៃ ago
នាវាចម្បាំងថៃ ច្រឡំដៃបាញ់កាំភ្លើងធំ ចំនាវាគ្នាឯង