អាជ្ញាធរ​ប្រាប់​ឱ្យ​ពលរដ្ឋ​រស់នៅតាមបណ្ដោយផ្លូវ ២ខ្សែ​ ប្រញាប់​រុះរើខ្សែកាបចេញ

អាជ្ញាធររាជធានីភ្នំពេញ បានប្រកាសទុកពេល ១៥ ថ្ងៃ ឱ្យប្រជាពលរដ្ឋ និងក្រុមហ៊ុន កំពុងប្រើប្រាស់បណ្ដាញ​ខ្សែកាប នៅផ្លូវព្រះយុគន្ធរ ផ្លូវឧកញ៉ាសន្ធរម៉ុក ប្រញាប់រួសរាន់រៀបចំរុះរើចេញ ដើម្បីលើកម្ពស់សោភ័ណភាពរាជធានីភ្នំពេញ ឱ្យល្អស្រស់បំព្រង សក្ដិសមជាបេះដូង នៃព្រះរាជាណាចក្រកម្ពុជា។

សេចក្ដីជូនដំណឹងរបស់រដ្ឋបាលរាជធានីភ្នំពេញ បានឱ្យដឹងថា ដើម្បីលើកកម្ពស់សោភ័ណភាពរាជធានីភ្នំ​ពេញ ឱ្យកាន់តែល្អស្រស់បំព្រង ក្រុមការងារចម្រុះរបស់រដ្ឋបាលរាជធានីភ្នំពេញ នឹងធ្វើការរៀបចំសណ្តាប់​ធ្នាប់ បណ្តាញខ្សែកាប្ដីអាកាសតាមដងផ្លូវ ចំនួន ០២ រួមមាន៖

១- វិថីព្រះអង្គយុគន្ធរ (ផ្លូវលេខ ១៩) ចាប់ពីផ្លូវលេខ ១០៨ ដល់ផ្លូវលេខ ៩៨

២ -វិថីឧកញ៉ាសន្ធរម៉ុក (ផ្លូវលេខ ៩៨) ចាប់ពីផ្លូវលេខ ១៩ ដល់តិរៈវិថីព្រះស៊ីសុវត្ថិ

សេចក្ដីជូនដំណឹងលើកឡើងថា “សូមបងប្អូនប្រជាពលរដ្ឋ ម្ចាស់អាជីវកម្មដ្ឋាន អង្គភាពរដ្ឋ និងបណ្តាក្រុមហ៊ុន ឯកជនទាំងអស់ ដែលកំពុងប្រើប្រាស់បណ្តាញខ្សែកាប្ដីអាកាសនៅតាមផ្លូវទាំង ០២ ខាងលើនេះ សូមប្រញាប់រួសរាន់រៀបចំរុះរើចេញ ក្នុងរយៈពេល ១៥ថ្ងៃ ដោយគិតចាប់ពីថ្ងៃជូនដំណឹងនេះតទៅ”៕

សេចក្ដីជូនដំណឹង៖

អត្ថបទៈ ស្រីរ័ត្ន