ខេត្តព្រៃវែងមានអ្នកឆ្លងកូវីដជិត៦ពាន់នាក់ តែនៅសល់ត្រឹមជាង៣០០នាក់ប៉ុណ្ណោះកំពុងព្យាបាល

មួយរយៈចុងក្រោយនេះ ខេត្តព្រៃវែង ហាក់មានការថយចុះនៃការឆ្លងរាលដាលនៃជំងឺកូវីដ-១៩ ចំណែកការជាសះស្បើយមានចំនួនច្រើនពីមួយថ្ងៃទៅមួយថ្ងៃ ដែលធ្វើឲ្យអ្នកជំងឺកំពុង​សម្រាក​ព្យាបាលសរុបក្នុងខេត្តមួយនេះ នៅសល់តែជាង៣០០នាក់ប៉ុណ្ណោះ។

យោងតាមរបាយការណ៍ប្រចាំថ្ងៃរបស់រដ្ឋបាលខេត្តព្រៃវែង ចំនួនរកឃើញអ្នកឆ្លងថ្មីក្នុងរយៈពេល​ប៉ុន្មាន​ថ្ងៃចុង​ក្រោយនេះ មានអ្នកឆ្លងត្រឹមតែជាង២០ទៅជាង៣០នាក់ប៉ុណ្ណោះក្នុងមួយថ្ងៃ ខណៈ​ដែល​កន្លង​ទៅ តួលេខអ្នកឆ្លងមានចាប់ពីជិត១០០នាក់ រហូតជាង១០០នាក់ក្នុងមួយថ្ងៃក៏មាន។

នៅថ្ងៃទី៧ ខែកញ្ញា ឆ្នាំ២០២១នេះ រដ្ឋបាលខេត្តព្រៃវែង បានប្រកាសរកឃើញអ្នកឆ្លងជំងឺកូវីដ-១៩ ថ្មីត្រឹមតែ៣០នាក់ តាមរយៈការធ្វើតេស្ដរហ័ស (Rapid Test) នៅក្នុងមូលដ្ឋានក្រុង ស្រុកចំនួន៩ និង​មកពីបណ្ដាខេត្តផ្សេងទៀត ខណៈមានអ្នកជាសះស្បើយចំនួន៤៤នាក់ និងស្លាប់ម្នាក់។

គិតតរឹមថ្ងៃទី៧ ខែកញ្ញា ឆ្នាំ២០២១ ខេត្តព្រៃវែងមានអ្នកជំងឺកូវីដ-១៩​ សរុប៥,៩៩១នាក់ ព្យាបាលជា​សះស្បើយចំនួន៥,៥១១នាក់ កំពុងសម្រាកព្យាបាល៣៦៣នាក់ និងស្លាប់១១៧នាក់៕

អត្ថបទ៖ សុខុម