កុំខ្លាចនឿយហត់! រដ្ឋមន្ត្រីមហាផ្ទៃជំរុញឱ្យក្រុមការងារចុះមូលដ្ឋានខេត្តព្រៃវែងបន្តខិតខំដោះស្រាយទុក្ខលំបាកពលរដ្ឋ

ក្រុមការងាររាជរដ្ឋាភិបាលចុះមូលដ្ឋានខេត្តព្រៃវែង ត្រូវតែបន្តរាល់សកម្មភាពក្នុងការខិតខំដោះស្រាយនូវរាល់ទុក្ខលំបាក និងសំណូមពររបស់ប្រជាពលរដ្ឋនៅតាមមូលដ្ឋាន ដោយកុំខ្លាចភាពនឿយហត់។ នេះគឺជាសារជំរុញរបស់ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លោក ស សុខា ទៅកាន់ក្រុមការងាររាជរដ្ឋាភិបាលចុះមូលដ្ឋានខេត្តព្រៃវែង។

លោក ស សុខា ដែលទទួលកាន់ជាប្រធានក្រុមការងាររាជរដ្ឋាភិបាលចុះមូលដ្ឋានខេត្តព្រៃវែងបានថ្លែងជំរុញទៅដល់ក្រុមការងាររបស់លោកឱ្យខិតខំបម្រើពលរដ្ឋដែលការណ៍នេះលោក ថា គឺជាការឆ្លុះបញ្ចាំងពីការបន្តមរតកនយោបាយដ៏ឧត្តុង្គឧត្តមរបស់រាជរដ្ឋាភិបាល ក្នុងការតម្កល់ផលប្រយោជន៍រាស្ត្រជាធំ និងមិនប្រែប្រួលតាំងពីដើមរាងមករហូតដល់បច្ចុប្បន្ន។

ការថ្លែងជំរុញដូច្នេះ ក្នុងឱកាសលោកអញ្ជើញជាអធិបតីសន្និបាតបូកសរុបលទ្ធផលការងារចុះមូលដ្ឋានប្រចាំឆ្នាំរបស់ក្រុមការងាររាជរដ្ឋាភិបាលចុះមូលដ្ឋានខេត្តព្រៃវែង នៅសាលាខេត្តព្រៃវែង កាលពីរសៀលថ្ងៃទី២៨ ខែកុម្ភៈ ឆ្នាំ២០២៦។

លោកឧបនាយករដ្ឋមន្ត្រី ស សុខា បានណែនាំដល់ក្រុមការងាររាជរដ្ឋាភិបាលចុះមូលដ្ឋានខេត្តព្រៃវែង ឱ្យបន្តសកម្មភាពផ្សព្វផ្សាយរាល់គោលនយោបាយ យុទ្ធសាស្ត្រ និងលទ្ធផលការងារឱ្យដល់មូលដ្ឋាន ព្រមទាំងខិតខំប្រមូល និងការដោះស្រាយរាល់សំណើរ សំណូមពររបស់ពលរដ្ឋឱ្យបានទាន់ពេល ជាពិសេសត្រូវជំរុញកិច្ចការងារវាស់វែងផ្តល់ប្លង់ដីកម្មសិទ្ធិ និងពង្រឹងសន្តិសុខ សណ្តាប់ធ្នាប់សាធារណៈ ដោយត្រូវលុបបំបាត់ឱ្យអស់នូវបញ្ហាគ្រឿងញៀន ក្មេងទំនើង និងល្បែងស៊ីសងគ្រប់ប្រភេទ។

លោកឧបនាយករដ្ឋមន្ត្រី ក៏បានសង្កត់ធ្ងន់ឱ្យក្រុមការងារយកចិត្តទុកដាក់ខ្ពស់លើសន្តិសុខឌីជីថល ដោយត្រូវបង្កើនការផ្សព្វផ្សាយ និងអប់រំឱ្យពលរដ្ឋយល់ដឹងកាន់តែច្បាស់អំពីបទល្មើសបច្ចេកវិទ្យា ជាពិសេសយន្តការប្រយុទ្ធប្រឆាំងនឹងការឆបោកតាមប្រព័ន្ធបច្ចេកវិទ្យាអនឡាញ (Online Scam) ដែលកំពុងរីករាលដាល ជាមួយនឹងការរឹតបន្តឹងការអនុវត្តអនុក្រឹត្យលេខ០៣ ដើម្បីធានាឱ្យបាននូវតម្លាភាព និងប្រសិទ្ធភាពក្នុងការរាយការណ៍វត្តមានជនបរទេសដែលស្នាក់នៅក្នុងមូលដ្ឋានរបស់ខ្លួនឱ្យបានហ្មត់ចត់បំផុត។

បន្ថែមពីនេះ លោក ស សុខា ក៏បានទទូចឱ្យក្រុមការងារត្រូវបន្តតាមដាន និងជំរុញការអនុវត្តគម្រោងអភិវឌ្ឍន៍ឃុំ-សង្កាត់នានាឱ្យបានជាប់ជាប្រចាំ ដើម្បីធានាថាការអភិវឌ្ឍទាំងនោះ គឺពិតជាទទួលបានលទ្ធផលផ្លែផ្កា និងឆ្លើយតបនឹងតម្រូវការជាក់ស្ដែងរបស់ប្រជាពលរដ្ឋនៅមូលដ្ឋាន៕