បើកបរ គេចចេញពីគោលដៅ អនុវត្តច្បាប់ចរាចរណ៍ ត្រូវពិន័យកម្រិតណា?

កាលពីយប់ថ្ងៃទី៨ ខែកញ្ញា ឆ្នាំ២០២១ មានករណីអនុវត្តច្បាប់ ស្ដីពី ចរាចរណ៍ផ្លូវគោក តែសង្ស័យបង្កឲ្យមាន​អំពើ​ហិង្សា បង្កឲ្យនារីម្នាក់រងរបួសបែកក្បាល។ បច្ចុប្បន្នមន្ត្រីនគរបាលម្នាក់ ដែលសង្ស័យថា បានប្រើវិទ្យុទាក់ទង វាយ​ចំក្បាលនារីរងគ្រោះ ត្រូវបានសមត្ថកិច្ចជំនាញ បញ្ជូនទៅតុលាការ ដើម្បីចាត់ការបន្តច្បាប់ហើយ។ ចំណែកនារីរង​របួស និងអ្នកបើកបរម៉ូតូម្នាក់ទៀត ដែលបើកបរមិនពាក់មួកសុវត្ថិភាពទាំងពីរនាក់ ហើយបើកគេចពីនគរបាលនោះ ក៏ត្រូវរងការពិន័យ ឬក៏អាច​​ត្រូវ​តុលាការ​ចោទ​ប្រកាន់​បានដែរ។ តើការបើកបរយានយន្ត គេចចេញពីការអនុវត្តច្បាប់​ចរាចរណ៍ អាចត្រូវរងពិន័យ ឬក៏ត្រូវផ្ដន្ទាទោសដែរឬទេ?

នៅក្នុងជំពូកទី១០ ស្ដីពី​ ទោសប្បបញ្ញត្តិ នៃច្បាប់ ស្ដីពី ចរាចរណ៍ផ្លូវគោក ដែលត្រូវបានធ្វើវិសោធនកម្ម នៅឆ្នាំ២០​១៧ ត្រង់មាត្រា៧៦ បានចែងថា ជនណាបើកបរយានយន្ត មិនព្រមបញ្ឈប់យានយន្ត តាមការបញ្ជារបស់មន្ត្រីនគរបាល ចរាចរណ៍ផ្លូវគោក ដើម្បីធ្វើតេស្ដពិនិត្យជាតិអាល់ ឬសារធាតុញៀន ត្រូវផ្ដន្ទាទោសដាក់ពន្ធនាគារពី៦ (ប្រាំមួយ) ថ្ងៃទៅ១ (មួយ) ខែ និងពិន័យជាប្រាក់ពី១០០ ០០០ (មួយសែន) រៀលទៅ ៨០០ ០០០(ប្រាំបីសែន) រៀល។ ត្រូវផ្ដន្ទាទោសដូចកថាខណ្ឌទី១ខាងលើ ចំពោះអ្នកបើកបរណា ដែលមិនព្រមឲ្យធ្វើការត្រួតពិនិត្យ ផ្ទៀងផ្ទាត់យាន ឬ​ធ្វើតេស្ដពិនិត្យ ជាតិអាល់កុល ឬសារធាតុញៀន។

ចំណែក​នៅក្នុងក្រមព្រហ្មទណ្ឌ នៃព្រះរាជាណាចក្រកម្ពុជា ត្រង់មាត្រា៥៤១ ស្ដីពី បទបដិសេធមិនស្ដាប់បង្គាប់​បញ្ជា បានសរសេរថា អ្នកបើកបរយានជំនិះណាមួយ ដែលមិនព្រមស្ដាប់បង្គាប់បញ្ជាឲ្យឈប់ របស់នគរបាល ឬកង​រាជអាវុធហត្ថ ដែលមានឯកសណ្ឋាន ឬសញ្ញាសម្គាល់យ៉ាងច្បាស់ របស់នគរបាល ឬកងរាជអាវុធហត្ថ ដើម្បីស្វែង​រក​ភស្ដុតាង ត្រូវផ្ដន្ទាទោសដាក់ពន្ធនាគារ ពី៦ (ប្រាំមួយ) ថ្ងៃ ទៅ៣ (បី) ខែ និងពិន័យជាប្រាក់ពី ១០ ០០០ (មួយ​ម៉ឺន) រៀល ទៅ៥០០ ០០០ (ប្រាំសែន) រៀល។ រីឯមាត្រា ៥៤២ ស្ដីពី បទបដិ សេធរបស់អ្នកបើកបរ ក្នុងការទទួលការពិនិត្យ បានសរសេរថា ត្រូវផ្ដន្ទាទោសដាក់​ពន្ធ​នាគារ ពី៦ (ប្រាំមួយ) ថ្ងៃ ទៅ៣ (បី) និងពិន័យជាប្រាបក់ ១០ ០០០ (មួយម៉ឺន) រៀល ទៅ ៥០០​ ០០០ (ប្រាំ​សែ​​ន) រៀល អ្នកបើកបរយានជំនិះណាមួយ ដែលមិនព្រមដាក់ខ្លួន ឲ្យធ្វើការត្រួតពិនិត្យលើយាន ឬលើខ្លួនទេ កា​ល​បើការត្រួតពិនិត្យនេះ ត្រូវបានធ្វើឡើង ដើម្បីស្វែងរកភស្ដុតាង ដោយនគរបាល ឬកងរាជអាវុធហត្ថ ដែលមាន​ឯក​ណ្ឋាន ឬសញ្ញាសម្គាល់យ៉ាងច្បាស់ របស់នគរបាល ឬកងរាជអាវុធហត្ថនោះ៕