ព័ត៌មានជាតិ

ក្រសួងសង្គមកិច្ច បង្កើតលេខទូរសព្ទទាន់ហេតុការណ៍ដើម្បីជួយដល់ជនមានពិការភាព

បានផុស

៦ years មុន

នៅ

ថ្ងៃពុធ ២ ធ្នូ ២០២០

ដោយ

ភ្នំពេញ ៖ ក្រសួងសង្គមកិច្ចអតីតយុទ្ធជននិងយុវនីតិសម្បទា បានប្រកាសដាក់ឲ្យដំណើរការជាផ្លូវការលេខទូរសព្ទ ទាន់ហេតុការណ៍ «១២៧០»ដើម្បីជួយដោះស្រាយបញ្ហាផ្សេងៗជួនដល់បងប្អូនដែលមានពិការភាព។

យោងតាមសេចក្តីជូនដំណឹង ស្តីពីការដាក់ដំណើរការផ្លូវការលេខទូរសព្ទ HOTLINE “១២៧០” របស់នាយកដ្ឋានសុខុមាលភាពជនពិការ នៃក្រសួងសង្គមកិច្ច អតីតយុទ្ធជន និងយុវនីតិសម្បទាដែលបានផ្សាយនៅថ្ងៃនេះបានឲ្យដឹងថា «ក្រសួងសង្គមកិច្ចអតីតយុទ្ធជននិងយុវនីតិសម្បទាសូមជំរាបដល់បងប្អូនដែលមានពិការភាពនិងបងប្អូនប្រជាពលរដ្ឋទាំងអស់អោយបានជ្រាបថាក្រសួងបានដាក់ឲ្យដំណើរការជាផ្លូវការលេខទូរសព្ទសម្រាប់ឱ្យបងប្អូនទាំងអស់អាចធ្វើហៅចូលរៀងរាល់ម៉ោងធ្វើការមកកាន់នាយកដ្ឋានសុខមាលភាពជនពិការដោយឥតគិតថ្លៃ»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមសេចក្តីជូនដំណឹងដដែល ប្រព័ន្ធទូរសព្ទនេះនឹងជួយផ្ដល់ភាពងាយស្រួលដល់បងប្អូនដែលមានពិការភាពនិងបងប្អូនប្រជាពលរដ្ឋទាំងអស់ក្នុងករណីមានតម្រូវការសម្រាប់ការផ្ដល់ព័ត៌មានបន្ទាន់ ឬ ទាន់ហេតុការណ៍បណ្ដឹងតវ៉ាប្រឆាំងការរើសអើងការរំលោភបំពានណាមួយឬមានសំណូមពរចាំបាច់មកនាយកដ្ឋានធ្វើការសម្របសម្រួលនិងដោះស្រាយតាមករណីជាក់ស្ដែងនីមួយៗ។

គួរបញ្ជាក់ថា តាមការប៉ាន់ស្មានបច្ចុប្បន្ននេះ នៅប្រទេសកម្ពុជា មានជនពិការគ្រប់ប្រភេទនៅទូទាំងប្រទេសប្រមាណ៥២ម៉ឺននាក់ដែលភាគច្រើនពួកគេកំពុងរស់នៅយ៉ាងលំបាកលំបិនដោយសារមិនមានប្រាក់ចំណូលសមរម្យក្នុងការចិញ្ចឹមជីវិតប្រចាំថ្ងៃ៕
ដោយ ៖ សំអឿន