ឯកឧត្ដម ហ៊ុន ម៉ានី អញ្ជើញជាអធិបតី ក្នុងកម្មវិធីបើកជាផ្លូវការ យុទ្ធនាការភ្នំពេញស្អាត ឆ្នាំ២០២១

ឯកឧត្ដម ហ៊ុន ម៉ានី ប្រធានគណៈកម្មការទី​៧ នៃរដ្ឋសភា និងជាសហស្ថាបនិក «គម្រោងស្អាត» នៅព្រឹកថ្ងៃទី១ ខែវិច្ឆិកា ឆ្នាំ២០២១នេះ បានអញ្ជើញជាអធិបតីភាព ក្នុងកម្មវិធីបើកជាផ្លូវការ យុទ្ធនាការភ្នំពេញស្អាត ឆ្នាំ២០​២១ ក្រោមទិសស្លោកថ្មីប្រចាំឆ្នាំ «ទម្លាប់ថ្មី ទម្លាប់ស្អាត» តាមប្រព័ន្ធអនឡាញ Zoom។

ជាកិច្ចចាប់ផ្ដើមឯកឧត្ដម ហ៊ុន ម៉ានី បានថ្លែងនូវការកោតសរសើរ និងវាយតម្លៃខ្ពស់ចំពោះសមាជិក-សមាជិកា និងក្រុមការងារប្រតិបត្តិ ព្រមទាំងយុវជនសុឆន្ទៈស្អាតទាំងអស់ នៃគម្រោងស្អាត ដែលបានខិតខំប្រឹងប្រែង ប្ដេ​ជ្ញា​រៀបចំ និងបន្តអនុវត្តយុទ្ធនាការភ្នំពេញស្អាត ចាប់តាំងពីឆ្នាំ២០១៧ ដែលជាជំហានដំបូង រហូត​សម្រេច​បាន​លទ្ធ​ផលគួរជាទីមោទនៈ នៅថ្ងៃនេះ។

ឯកឧត្ដម បានលើកឡើងថា លទ្ធផលទាំងនេះ មិនអាចលេចចេញជារូបរាងបានទេ ប្រសិនបើគ្មានការចូលរួមពីស្ថាប័នរដ្ឋ ឯកជន ស្ថានទូត សមាគម អង្គការមិនមែនរដ្ឋាភិបាល ព្រមទាំងដៃគូឧបត្ថម្ភ និងដៃគូសហការទាំងអស់ ជាពិសេសកិច្ចសហការឧបត្ថម្ភពេញទំហឹង ក្នុងឆ្នាំ២០២១នេះ ពីសំណាក់ក្រសួងបរិស្ថាន និងរដ្ឋបាលរាជធានីភ្នំពេញ។

ឯកឧត្ដមប្រធានគណៈកម្មការទី​៧ នៃរដ្ឋសភា បានថ្លែងឲ្យដឹងថា គម្រោងស្អាត ត្រូវបានបង្កើតឡើងក្នុងគោលបំណង​ប្រមូលផ្ដុំតួអង្គពាក់ព័ន្ធ បង្កើតឲ្យមានសំឡេងតែមួយ ពីសំណាក់ស្ថាប័នអង្គការ អង្គភាព អាជ្ញាធរដែនដីគ្រប់លំដាប់ថ្នាក់ រូបវន្តបុគ្គល និងនីតិបុគ្គល និងគ្រប់មជ្ឈដ្ឋាន គ្រប់វិស័យ ដើម្បីសម្រេចឲ្យបាននូវចក្ខុវិស័យ រួមគ្នាក្នុងការចូលរួមចំណែកលើកកម្ពស់ មេត្រីភាពបរិស្ថាន ជាពិសេសបញ្ជៀបអំពីបញ្ហាប្រឈម និងខិតខំស្វែងរកដំណោះស្រាយរួមមួយ ស្ដីពី ការទុកដាក់សំរាមឲ្យបានត្រឹមត្រូវ ទៅដល់សាធារណជនគ្រប់ស្រទាប់វណ្ណៈ ដើម្បីបំផុសការចូលរួមចំណែកទាំងអស់ ក្នុងការថែទាំ និងលើកកម្ពស់សោភ័ណ្ឌភាពប្រទេសកម្ពុជា ឲ្យមានភាពប្រសើរឡើង ព្រមទាំងជំរុញកិច្ច​ការពារបរិស្ថានល្អ អនា ម័យល្អ ភាពស្រស់បំព្រង ផាសុខភាពល្អ ដែលជាភាពស៊ីវិល របស់សង្គមសម័យទំនើប។

ឯកឧត្ដម ហ៊ុន ម៉ានី បានលើកឡើងបន្តថា «ជាការពិត យុទ្ធនាការភ្នំពេញស្អាត បាននិងកំពុងរួមចំណែកជាមួយអាជ្ញា​ធរដែនដី មានសមត្ថកិច្ច ជាពិសេសរដ្ឋបាលរាជធានីភ្នំពេញ ដែលបានខិតខំចូលរួមដោះស្រាយបញ្ហាសំរាម តាមរយៈផែនការសកម្មភាពនានា នៅក្នុងនោះក៏មានផងដែរ ក្រសួងស្ថាប័នពាក់ព័ន្ធផ្សេងៗទៀត ជាពិសេសគណៈកម្មការជាតិវាយតម្លៃទីក្រុងស្អាត របស់ក្រសួងទេសចរណ៍ ដែលមានសម្ដេចអគ្គមហាសេនាបតីតេជោ ហ៊ុន សែន ជាប្រធានកិត្តិយស យុទ្ធសាស្រ្ដរបស់ក្រសួងអប់រំ យុវជន និងកីឡា ក្នុងការលើកកម្ពស់ការអប់រំ អនាម័យ និងបរិស្ថានស្អាត នៅតាមបណ្ដាគ្រឹះស្ថានអប់រំ ក៏ដូចជាគោលនយោបាយ គ្រប់គ្រងសំរាមរបស់ក្រសួងបរិស្ថាន និងរដ្ឋបាលរាជធានីភ្នំពេញ ដែលសុទ្ធសឹងតែជាផែនការយុទ្ធសាស្រ្ដ របស់រាជរដ្ឋាភិបាលកម្ពុជា ក្នុងការចូលរួមដោះស្រាយ និងលើកកម្ពស់អនាម័យទីក្រុង និងជំរុញមេត្រីភាពបរិស្ថាន ដែលក្នុងនោះ យើងក៏មិនភ្លេចដែរ នូវគោលនយោបាយផ្សព្វផ្សាយពីសំណាក់ក្រសួងព័ត៌មាន ដើម្បីជំរុញការផ្សព្វផ្សាយឲ្យបានទូលំទូលាយ ថែមមួយកម្រិតទៀត»។

ឯកឧត្ដម បានថ្លែងបន្តថា យ៉ាងណាមមិញ អំឡុងឆ្នាំ២០២១នេះ ការរស់នៅរបស់មនុស្សជាតិ មិនទាន់អាចត្រឡប់ទៅកាន់ភាពប្រក្រតីពេញលេញភ្លាមៗ នោះទេ។ ប៉ុន្តែស្ថិតក្នុងកាលៈទេសៈ ក្នុងពេលបច្ចុប្បន្ននេះ យើងត្រូវរៀនរស់ជាមួយនឹងកូវីដ-១៩ ដោយប្រកាន់ភ្ជាប់នូវគន្លងថ្មី ពោលគឺទម្លាប់ថ្មី ទម្លាប់ស្អាត ដែលទិសស្លោកប្រចាំឆ្នាំ របស់​យុទ្ធនាការភ្នំពេញស្អាតឆ្នាំ២០២១នេះ។ ទិសស្លោកថ្មី ​គឺជាការវិវត្តន៍ និងកែសម្រួលពីពាក្យស្លោកចាស់ កាលពី​ឆ្នាំ​២០២០ គឺ ស្អាតជាទម្លាប់ថ្មី ដើម្បីឆ្លើយតបទៅនឹងហេតុការណ៍បច្ចុប្បន្ន ដោយក្ដោបបញ្ចូលទាំងការឆ្លើយតប​ទៅ​លើបញ្ហាកូវីដ-១៩ផង ព្រមទាំងវិស័យអប់រំ អនាម័យ និងបរិស្ថានផងដែរ។

ឯកឧត្ដម ហ៊ុន ម៉ានី ប្រធានគណៈកម្មការទី​៧ នៃរដ្ឋសភា និងជាសហស្ថាបនិក «គម្រោងស្អាត» បានគូស​បញ្ជា​ក់​បន្ថែមថា «ក្នុងន័យនេះ ទម្លាប់ថ្មី​ ទម្លាប់ស្អាត គឺមិនត្រឹមតែ សំដៅដល់ទម្លាប់ក្នុងការគ្រប់គ្រង និងទុកដាក់​សំរាមឲ្យ​បាន​ត្រឹមត្រូវប៉ុណ្ណោះទេ ក៏ប៉ុន្តែអ្វីដែលើសពីនេះ គឺការជំរុញ និងការលើកកម្ពស់ការរស់នៅ ដោយស្មារតីប្រុងប្រយ័ត្ន និងការបំពេញការងារ ការប្រកបវិជ្ជាជីវៈផ្សេងៗ ប្រកបដោយប្រសិទ្ធភាព ក្នុងបរិបទកូវីដ-១៩ ជាមួយនឹងទម្លាប់ថ្មី»​៕

អត្ថបទ៖ ឃួន សុភ័ក្រ