លទ្ធផលបណ្ដោះអាសន្ន ៤០ថ្ងៃ នៃការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ ២០២១​

តាមរបាយការណ៍ពីឃុំ-សង្កាត់ ចំនួន១.២៥៥ លទ្ធផលបណ្ដោះអាសន្ននៅថ្ងៃទី ៤០ នៃការពិនិត្យបញ្ជីឈ្មោះ និងការចុះឈ្មោះបោះឆ្នោត​ឆ្នាំ ២០២១ ត្រូវ​នឹងថ្ងៃទី ​២​២ ខែវិច្ឆិកា ឆ្នាំ ២០២១ នៅទូទាំងប្រទេស មាន​​ប្រជាពលរដ្ឋ​ បានអញ្ជើញទៅចុះឈ្មោះបោះឆ្នោតថ្មី មានចំនួន​ ៥.​៣៥៨នាក់។

ចំណែកអ្នក ដែលនឹងត្រូវលុបឈ្មោះ ចេញពីបញ្ជីបោះឆ្នោត​មានចំនួន ​៤.២៥៩នាក់ ហើយអ្នកដែលបានកែតម្រូវទិន្នន័យ​មានចំនួន ​២.៨៣១​នាក់។ រីឯអ្នក​ដែលបានផ្ទេរទីលំនៅចូលក្នុង​ឃុំ-សង្កាត់ថ្មី ​មានចំនួន​ ២.៤៥០​នាក់។

សរុបរយៈពេល​ ៤០ថ្ងៃ ​នៃការពិនិត្យបញ្ជីឈ្មោះ និងការចុះឈ្មោះ គឺមាន​ប្រជាពលរដ្ឋ​ ដែលបាន​អញ្ជើញទៅ ចុះឈ្មោះបោះឆ្នោតថ្មីសរុប​ចំនួន ​៤០១.២៤៥ នាក់, អ្នកដែលនឹងត្រូវលុបឈ្មោះចេញពីបញ្ជីបោះឆ្នោត សរុប​មានចំនួន ​១៩១.០៣១ នាក់, អ្នក​ដែល​បាន​កែតម្រូវទិន្នន័យសរុប​មានចំនួន​១៦៣.៦៨៩នាក់ ហើយអ្នកដែលបានផ្ទេរទីលំនៅ ចូលក្នុងឃុំ-សង្កាត់ថ្មីសរុបមានចំនួន ​១២២.៣៩៣ នាក់។

ការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ ២០២១ ប្រព្រឹត្តទៅចាប់ពីថ្ងៃទី ១២ ខែតុលា ដល់ថ្ងៃទី ៣០ ខែវិច្ឆិកា ឆ្នាំ ២០២១ គិតទាំងថ្ងៃសៅរ៍ និងថ្ងៃអាទិត្យ។ គ.ជ.ប បាន​អំពាវ​នាវ​ឲ្យ​ប្រជាពលរដ្ឋដែលមានសិទ្ធិបោះឆ្នោត អញ្ជើញទៅពិនិត្យបញ្ជីឈ្មោះ និងចុះឈ្មោះបោះឆ្នោត នៅតាមការិយាល័យចុះឈ្មោះបោះឆ្នោត​ ឲ្យបានគ្រប់ៗគ្នា​។

ប្រជាពលរដ្ឋ អាច​ចូលទៅ​កាន់​គេហទំព័រ គ.ជ.ប www.nec.gov.kh/​khmer/​taxonomy/​term/​364 ដើម្បី​ពិនិត្យមើលតារាងលទ្ធផលបណ្ដោះ​អាសន្ន នៃការ​ពិនិត្យ​បញ្ជី​ឈ្មោះ និង​ការ​ចុះឈ្មោះ​​បោះឆ្នោត ឆ្នាំ២០២១ ប្រចាំថ្ងៃ៕

អត្ថបទ៖ កោះកែវ