គ.ជ.ប ទទួលស្គាល់លោកស្រី ចឹក ហេង ជាបេក្ខជនជាប់ឆ្នោតព្រឹទ្ធសភា ជំនួសលោក មួង ប៉យ

នៅថ្ងៃទី៧ ខែឧសភា ឆ្នាំ២០២៥នេះ គណៈកម្មាធិការជាតិរៀបចំការបោះឆ្នោត (គ.ជ.ប) បានចេញសេចក្ដីសម្រេចប្រកាសទទួលស្គាល់លោកស្រី ចឹក ហេង ជាបេក្ខជនជាប់ឆ្នោតសមាជិកព្រឹទ្ធសភា នីតិកាលទី៥ របស់គណបក្សប្រជាជនកម្ពុជា នៅមណ្ឌលភូមិភាគទី៨ (ខេត្តកំពង់ធំ ព្រះវិហារ ក្រចេះ ស្ទឹងត្រែង រតនគិរី និងខេត្តមណ្ឌលគិរី)។

ការប្រកាសទទួលស្គាល់លោកស្រី ចឹក ហេង ជាបេក្ខជនជាប់ឆ្នោតថ្មីពេលនេះ គឺត្រូវបានធ្វើឡើងបន្ទាប់ពីលោក មួង ប៉យ សមាជិកព្រឹទ្ធសភាប្រចាំមណ្ឌលភូមិភាគទី៨ បានទទួលមរណភាព កាលពីថ្ងៃទី២៦ ខែមេសា កន្លងទៅនេះ ក្នុងជន្មាយុ៧៤ឆ្នាំ ដោយរោគាពាធ ហើយ គ.ជ.ប ក៏បានចេញសេចក្ដីសម្រេចលុបឈ្មោះលោក ចេញពីបេក្ខជនជាប់ឆ្នោតមណ្ឌលភូមិភាគទី៨។

បេក្ខជនជាប់ឆ្នោតជាសមាជិកព្រឹទ្ធសភាថ្មី លោកស្រី ចឹក ហេង ក៏ជាអតីតសមាជិកព្រឹទ្ធសភា ក្នុងនីតិកាលទី៤ ហើយលោកស្រី ក៏ធ្លាប់កាន់តំណែងជាអភិបាលរងខេត្តព្រះវិហារ ផងដែរ៕