មន្ត្រីជាន់ខ្ពស់គជប៖ ការពិនិត្យបញ្ជីឈ្មោះ និងការចុះឈ្មោះបោះឆ្នោត ដើម្បីធានា​ឱ្យបញ្ជីបោះឆ្នោតមានភាពពេញលេញ

មន្ត្រីជាន់ខ្ពស់គណៈកម្មាធិការជាតិរៀបចំការបោះឆ្នោត (គជប) បានបង្ហាញថា អនុលោមតាមច្បាប់ស្ដីពីការបោះឆ្នោតជ្រើសតាំងតំណាងរាស្ត្រ និងច្បាប់ស្ដីពី វិសោធនកម្មនៃច្បាប់ ការពិនិត្យបញ្ជីឈ្មោះ និងការចុះឈ្មោះបោះឆ្នោត គឺជាដំណើរការធ្វើបច្ចុប្បន្នភាពបញ្ជីបោះឆ្នោត តាមគោលការណ៍ប្រព័ន្ធបញ្ជីបោះឆ្នោតអចិន្ត្រៃយ៍ ដែលត្រូវធ្វើជារៀងរាល់ឆ្នាំ ដើម្បីធានាឱ្យបញ្ជីបោះឆ្នោតមានភាពពេញលេញ ភាពត្រឹមត្រូវ និងបច្ចុប្បន្នភាព ទុកសម្រាប់បម្រើឱ្យការបោះឆ្នោតតាមការ កំណត់នៃច្បាប់។

នេះបើតាមការលើកឡើងរបស់ លោក ទេព នីថា អគ្គលេខាធិការគណៈកម្មាធិការជាតិរៀបចំការបោះឆ្នោត ក្នុងពិធីបិទវគ្គប្រមូលផ្ដុំតាមតំបន់ ស្ដីពីការពង្រឹងសមត្ថភាពមន្ត្រីបោះឆ្នោត អំពីនីតិវិធីនៃការដាក់ ការទទួល និងការដោះស្រាយពាក្យបណ្ដឹង ក្នុងដំណើរការនៃការពិនិត្យបញ្ជីឈ្មោះ និងការលុបឈ្មោះបោះឆ្នោត ឆ្នាំ២០២៥ នៅខេត្តសៀមរាប កាលពីល្ងាចថ្ងៃទី១៣ ខែឧសភានេះ។

លោក ទេព នីថា បញ្ជាក់ថា ដើម្បីធានាសិទ្ធិបោះឆ្នោតរបស់ប្រជាពលរដ្ឋខ្មែរ ច្បាប់ស្ដីពីការបោះឆ្នោត បានកំណត់ឱ្យ គជប រៀបចំដំណើរការនៃការពិនិត្យបញ្ជីឈ្មោះ និងការចុះឈ្មោះបោះឆ្នោតប្រចាំឆ្នាំ ហើយនៅឆ្នាំ២០២៥ នេះ ដំណើរការនៃការពិនិត្យបញ្ជីឈ្មោះ និងការចុះឈ្មោះបោះឆ្នោត និងការផ្ដល់សុពលភាពបញ្ជីបោះឆ្នោតផ្លូវការ ចាប់ពីថ្ងៃទី១ ខែឧសភា ដល់ថ្ងៃទី៣១ ខែកក្កដា ឆ្នាំ២០២៥ ក្នុងនោះការពិនិត្យបញ្ជីឈ្មោះ និងការចុះឈ្មោះបោះឆ្នោតនៅតាមឃុំ សង្កាត់ គឺមានរយៈពេល ២៦ថ្ងៃ ចាប់ពីថ្ងៃទី១-២៦ ខែឧសភា ឆ្នាំ២០២៥។

លោកបន្តថា ការរៀបចំការគ្រប់គ្រង និងការប្រព្រឹត្តទៅនៃការពិនិត្យបញ្ជីឈ្មោះ និងការចុះឈ្មោះបោះឆ្នោត និងការផ្ដល់សុពលភាពលើបញ្ជីបោះឆ្នោតផ្លូវការ ឆ្នាំ២០២៥ ត្រូវអនុវត្តអនុលោមទៅតាមបទបញ្ជា និងនីតិវិធីសម្រាប់ការពិនិត្យបញ្ជីឈ្មោះ និងការចុះឈ្មោះបោះឆ្នោតប្រចាំឆ្នាំ (បនពច)។ ការរៀបចំ(បនពច)ថ្មី គឺមានគោលបំណងធ្វើឱ្យកាន់តែមានភាពប្រសើរឡើងទាំងទម្រង់ ទាំងខ្លឹមសារ ដើម្បីឆ្លើយតបទៅនឹងបរិបទ និងការវិវឌ្ឍន៍ថ្មីៗតាមការសម្រេចចុងក្រោយរបស់ គជប លើបទបញ្ជា និងនីតិវិធីសម្រាប់ការបោះឆ្នោតនានា ព្រមទាំងគំរូទម្រង់ស្ដង់ដារនៃការតាក់តែងច្បាប់ និងលិខិតបទដ្ឋានគតិយុត្ត ដើម្បីធានាបាននូវសង្គតិភាព និងមានលក្ខណៈពេញលេញ៕

ដោយ៖ គឿន វេត