អ្នកស្រី ខៃ ចិន្តា៖ មាន ៨ ចំណុចដើម្បីលើក​ស្ទួយឲ្យវិស័យសណ្ឋាគារ​រីកចម្រើន

អ្នកស្រី ខៃ ចិន្តា អនុប្រធាសមាគមសណ្ឋាគារកម្ពុជា បានលើកឡើងថា បច្ចុប្បន្នវិស័យសណ្ឋាគារពុំទាន់មានស្ថានភាពល្អប្រសើរនៅឡើយ ដោយសារវិបត្តិកូវីដ-១៩ បើទោះជាកម្ពុជា បានបើកទូលាយវិស័យទេសចរណ៍រួចហើយក្តី។

កត្តារួមចំណែកដើម្បីឲ្យវិស័យសណ្ឋាគារលូលាស់បានលឿន អ្នកស្រី ខៃ ចិន្តា បានចែករំលែកចំណេះដឹងចំនួន ៨ចំណុចដូចខាងក្រោម៖

១. បដិសណ្ឋារកិច្ច ការទទួលភ្ញៀវនៅព្រលានយន្តហោះ ឬនៅច្រកទ្វារព្រំដែនទទួលភ្ញៀវអន្តរជាតិ ដោយភាពស្វាគមន៍កក់ក្តៅ ជាទំនុកចិត្តដល់ភ្ញៀវ នឹងធ្វើឱ្យភ្ញៀវសប្បាយចិត្តមកលេងនៅប្រទេសយើង។

២. មានជើងយន្តហោះច្រើនទាំងយប់ទាំងថ្ងៃ ជួយសម្រួលដល់ការធ្វើដំណើររបស់ភ្ញៀវទេសចរក្នុងស្រុក និងក្រៅស្រុក។

៣. ធនាគារនៅកម្ពុជា ត្រូវផ្ដល់កម្ចីឥណទានដល់សណ្ឋាគារ ដើម្បីឲ្យម្ចាស់អាជីវកម្មមានលទ្ធភាព ដើម្បីស្ដារពង្រីកពង្រឹងកែលម្អសណ្ឋាគាររបស់ខ្លួនឲ្យមានសោភ័ណភាពបើកទ្វារឡើងវិញ។

៤. ក្រសួង ឬអង្គការបន្តការផ្ដល់វគ្គបណ្ដុះបណ្ដាលវិជ្ជាជីវៈជំនាញវិស័យទេសចរណ៍ដល់បុគ្គលិក ដែលមានជំនាញទូទៅ។

៥. ជួយគាំទ្រវិស័យទេសចរណ៍ពីជនជាតិខ្មែរនៅក្នុងស្រុកដំបូងគេបង្អស់ ក្នុងពេលដែលយើងរង់ចាំភ្ញៀវទេសចរណ៍ក្រៅប្រទេសចូលមកទស្សនានៅប្រទេសខ្មែរយើង។

៦. រៀបចំកញ្ចប់ទស្សនកិច្ចឲ្យមានសម្បូរបែប ដើម្បីឲ្យភ្ញៀវទេសចរមានជម្រើសច្រើន នឹងធ្វើឲ្យទាក់ទាញ និងពន្យារពេលការស្នាក់នៅឱ្យបានយូរ ហើយក៏ជាការប្រកួតប្រជែងមួយជាមួយនឹងប្រទេសជិតខាងផងដែរ។

៧. ហេដ្ឋារចនាសម្ព័ន្ធផ្លូវថ្នល់មធ្យោបាយធ្វើដំណើរតាមទឹកតាមអាកាសឲ្យមានសម្បូរបែប និងប្រកបដោយសុវត្ថិភាព។

៨. សន្តិសុខសង្គមមានសុវត្ថិភាព។

អនុប្រធានសមាគមសណ្ឋាគារ លើកឡើងថា វិស័យសណ្ឋាគារពឹងលើភ្ញៀវទេសចរបរទេស។ «ឥឡូវនេះភ្ញៀវទេសចរបរទេសមានតិចតួចបំផុតដោយសារបញ្ហាកូវីដ ចំណែកភ្ញៀវទេសចរក្នុងស្រុក ភាគច្រើនធ្វើដំណើរកម្សាន្តនៅពេលមានការឈប់សម្រាកបុណ្យទានផ្សេងៗបានម្តងម្កាលប៉ុណ្ណោះ»៕ អត្ថបទ៖ ទួន សុផល