វិស័យសណ្ឋាគារផ្ទះសំណាក់ក្នុងខេត្តសៀមរាបកំពុងខ្វះធនធានមនុស្សប្រមាណ ៣ពាន់នាក់

វិស័យទេសចរណ៍ បាននិងកំពុងមានកំណើនគួរកត់សម្គាល់ ក្រោយពីស្ថានការឆ្លងរាលដាលនៃជំងឺកូវីដ-១៩ បានធូរស្បើយ ហើយរាជរដ្ឋាភិបាល បានដកចេញនូវការរិតត្បិតទាំងអស់សម្រាប់ភ្ញៀវទេសចរ ចេញចូលកម្ពុជា។

ស្របពេលដែលកំណើនភ្ញៀវទេសចរងើបឡើងវិញជាលំដាប់ ធនធានដែលបម្រើការងារក្នុងវិស័យនេះ កំពុងខ្វះខាត និងមានតម្រូវការច្រើន ជាពិសេសផ្នែកសណ្ឋាគារ និងផ្ទះសំណាក់។

ជាក់ស្តែងលោក នួន ច័ន្ទតារា នាយកគ្រប់គ្រងសណ្ឋាគារ ស្តារី អង្គរ នៅខេត្តសៀមរាប បានឱ្យដឹងថា គ្រាន់តែខេត្តសៀមរាបមួយ តម្រូវការធនធានមនុស្សក្នុងវិស័យសណ្ឋាគារផ្ទះសំណាក់ បានប៉ាន់ស្មានថា មានចំនួនប្រមាណ ៣ពាន់នាក់។

បើតាមលោក នួន ច័ន្ទតារា ការខ្វះធនធានបម្រើការងារក្នុងវិស័យសណ្ឋាគារ ផ្ទះសំណាក់ និងវិស័យទេសចរណ៍ គឺដោយសារ ក្នុងអំឡុងពេលវិបត្តិកូវីដ វិស័យទេសចរណ៍រងគ្រោះធ្ងន់ធ្ងរ បុគ្គលិកដែលបម្រើការក្នុងវិស័យនេះ បាត់បង់ការងារក៏បានងាកទៅធ្វើការក្នុងផ្នែកផ្សេង នៅតាមបណ្តាខេត្តនានា ហើយមួយចំនួនទៀត បានចំណាកស្រុកបណ្តោះអាសន្ន ទៅធ្វើការនៅក្រៅប្រទេស ដើម្បីរកចំណូលទ្រទ្រង់ជីវភាពគ្រួសារ។

ទាក់ទងនឹងបញ្ហានេះ លោក ច័ន្ទតារា មានការ​ព្រួយបារម្ភទៅលើគុណភាពធនធានមនុស្សក្នុងវិស័យសណ្ឋាគារ​ផ្ទះសំណាក់ ខណៈការរំពឹងរបស់អ្នក​ជំនាញទេសចរ ព្យាកណ៍ថា កំណើនភ្ញៀវ នឹងកើនឡើងខ្លាំងនៅចុងឆ្នាំនេះ និងដើមឆ្នាំក្រោយ។ លោកថា​ សណ្ឋាគារ ផ្ទះសំណាក់ បានបើកឡើងវិញជាបណ្តើរៗ ដើម្បីត្រៀមទទួលភ្ញៀវទាំងជាតិ និងអន្តរជាតិ។ ទន្ទឹមនេះ លោកក៏បានអំពាវនាវដល់បងប្អូនប្រជាពលរដ្ឋកម្ពុជា ចូលរួមការពារ និងជៀស​ឱ្យឆ្ងាយពីជំងឺកូវីដ -១៩ ជាពិសេសចូលរួមបន្តអនុវត្តនូវការចាក់វាក់សាំងដុស​ជំរុញទី៣ ដល់ទី៥ ​ជាមួយ​រាជរដ្ឋាភិបាលបន្ថែមទៀត។

រាជរដ្ឋាភិបាល បានយកចិត្តទុកដាក់ខ្ពស់ ដោយបានណែនាំដល់វិស័យឯកជន សហការជាមួយរដ្ឋបណ្តុះ​បណ្តាលធនធានមនុស្ស និងកៀរគរពួកគេដែលបានឃ្លាតពីជំនាញរបស់ខ្លួន​ដោយសារកូវីដមកវិញ ដើម្បីបំពេញ​ចំណែះដឹង និងតម្រូវការ ដែលកំពុងខ្វះខាត។

ពាក់ព័ន្ធនឹងវិស័យនេះផងដែរ សមាគមទីភ្នាក់ងារទេសចរណ៍កម្ពុជា និងអ្នកជំនាញវិស័យសណ្ឋាគារ នឹងសហការគ្នាបើកវគ្គបណ្តុះបណ្តាលដល់បុគ្គលិក និងធនធានមនុស្សក្នុងវិស័យនេះ នៅពេលឆាប់ៗខាងមុខ។ គម្រោងនេះ ក៏មានការគាំទ្រពីរាជរដ្ឋាភិបាលផងដែរ៕