ក្រសួង ប្រកាសពីស្ថានភាពអាកាសធាតុ រយៈពេល ១ សប្តាហ៍នេះ

ក្រសួងធនធានទឹក និងឧតុនិយម នៅ ថ្ងៃទី ១៤ ខែធ្នូ ឆ្នាំ ២០២១ នេះ បានប្រកាសអំពីស្ថានភាពអាកាសធាតុរយៈពេលមួយសប្តាហ៍ ចាប់ពីថ្ងៃទី ១៥ ដល់ថ្ងៃទី ២២ ខែធ្នូ ឆ្នាំ ២០២១។ សេចក្ដីជូនដំណឹង បញ្ជាក់ថា ក្នុងសប្តាហ៍ខាងមុខ នឹងទទួលរងនូវឥទ្ធិពលសម្ពាធទាបខ្សោយ ទ្រនុងសម្ពាធទាបខ្ពស់ពីជើង និងខ្យលមូសុងឦសាន។

នៅ ថ្ងៃទី ១៣ ខែធ្នូ ក្នុងមហាសមុទ្រប៉ាស៊ីហ្វិក បានកើតឡើងនូវព្យុះទី ២២ ឈ្មោះ រ៉ាយ ដែលអាចមានធ្វើដំណើរឆ្លងកាត់ប្រទេសហ្វីលីពីន ចូលក្នុងសមុទ្រចិនខាងត្បូង។

ក្នុងអំឡុងថ្ងៃទី ១៩ ដល់ថ្ងៃទី ២១ ខែធ្នូ ព្យុះនេះមានទិសដៅ តម្រង់ទៅ ប្រទេសវៀតណាម ក្បែរឆ្នេររួចងាកចេញមកក្បែរកោះហាយណាំវិញ ដោយបន្តដំណើរឡើងទៅ លើ ក្នុងសមុទ្រ ដែលឥទ្ធិពលក៏ថមថយជាបន្តបន្ទាប់ផងដែរ។

ព្យុះនេះមានឥទ្ធិពលបន្តិចបន្តូចមកលើតំបន់ខ្ពង់រាប ភាគឦសានប្រទេសកម្ពុជា។

ស្ថានភាពនេះ នឹងធ្វើឱ្យមានភ្លៀងធ្លាក់ខ្សោយ និងអាកាសធាតុចុះត្រជាក់ ក្នុងរង្វង់ ១៦ ទៅ ១៨ អង្សា ចាប់ពីថ្ងៃទី ១៩ដល់ថ្ងៃទី ២១ នៅ បណ្តាខេត្តជាប់ជួរភ្នំដងរ៉ែក និងខ្ពង់រាបឦសាន៕