ខេត្តស្វាយរៀង លែងមានការបន្ទោបង់ ពាសវាលពាសកាល ទៀតហើយ

គិតត្រឹមដំណាច់ឆ្នាំ ២០២១ ខេត្តស្វាយរៀង លែងមានការបន្ទោបង់ពាសវាលពាសកាល (ODF) ទៀតហើយ បន្ទាប់ពីប្រជាពលរដ្ឋស្ទើរគ្រប់គ្រួសារ មានបង្គន់អនាម័យប្រើប្រាស់។ នេះបើតាមការឲ្យដឹងពីអាជ្ញាធរខេត្តស្វាយរៀង។

លោក រស់ ផារិទ្ធ អភិបាលរងខេត្តស្វាយរៀង បានថ្លែងក្នុងសន្និសីទសារព័ត៌មាន ស្ដីពី “វឌ្ឍនភាពមូលដ្ឋានឃុំ-សង្កាត់ និងទិសដៅការងារបន្ដ របស់រដ្ឋបាលខេត្តស្វាយរៀង” នៅព្រឹកថ្ងៃទី ៣ ខែកុម្ភៈនេះថា ជាមោទនភាពសម្រាប់ខេត្តស្វាយរៀង ដែលសម្រេចបាន ១០០ភាគរយ នូវការបញ្ឈប់​ការ​បន្ទោ​បង់​ពាសវាល​ពាសកាល ​(ODF) នៅដំណាច់ឆ្នាំ ២០២១ កន្លងទៅនេះហើយ។​ លោកថា កន្លង​មកក្រសួងអភិ​វឌ្ឍន៍ជនបទ ក៏បានចេញវិញ្ញាបនប័ត្របញ្ជាក់ អំពីបញ្ហានេះហើយដែរ។

លោក រស់ ផារិទ្ធ បានថ្លែងបន្តថា ការបន្ទោបង់របស់ប្រជាពលរដ្ឋ ដែលពីមុនមាននៅតាមកម្ពោធព្រៃ ឬតាមប្រឡាយទឹកជាដើមនោះ គឺពេលនេះលែងមានទៀតហើយ។ ការសម្រេចបានយ៉ាងដូច្នេះ ក៏ព្រោះតែប្រជាពលរដ្ឋស្ទើរតែគ្រប់គ្រួសារ មានបង្គន់អនាម័យប្រើប្រាស់។

អភិបាលរងខេត្តស្វាយរៀង បានថ្លែងឲ្យដឹងទៀតថា «​តាមខ្ញុំសាកសួរ មន្ទីរអភិវឌ្ឍន៍ជនបទ ការសម្រេបាន ការបញ្ឈប់​ការ​បន្ទោ​បង់​ពាសវាល​ពាសកាល ដោយសារយើងធ្វើបង្គន់អនាម័យ នៅគ្រប់ខ្នងផ្ទះ តាមគ្រប់គ្រួសារ ប៉ុន្តែវាមិនទាន់គ្រប់ ១០០ទេ ប៉ុន្តែគឺសម្រេចថា ១០០ភាគរយហើយៗ បើសិនជាសល់តិចតួច ខ្នងផ្ទះណានៅខ្វះតិចតួច គាត់ថា ១គ្រួសារ ២គ្រួសារ គាត់ប្រើបង្គន់រួមមួយ អញ្ចឹងគាត់បញ្ឈប់​ការ​បន្ទោ​បង់​ ពាសវាល​ពាសកាល»។

បើតាមលោក រស់ ផារិទ្ធ មន្ទីរអភិវឌ្ឍន៍ជនបទខេត្តស្វាយរៀង ក៏ដូចជាក្រសួងអភិវឌ្ឍន៍ជនបទតែម្ដង បានប្ដេជ្ញាចិត្តថា នាពេលខាងមុខ នឹងខិតខំធ្វើយ៉ាងណាឲ្យ ១គ្រួសារនៅក្នុងខេត្តស្វាយរៀង មានបង្គន់អនាម័យប្រើប្រាស់ ១តែម្ដង ដែល គេហៅថា គម្រោង ​(ODF) Plus៕

អត្ថបទ៖ ឃួន សុភ័ក្រ