ព័ត៌មានជាតិ

រដ្ឋមន្ត្រីការងារនិងអ្នកសម្របសម្រួលUNចុះពិនិត្យដំណើរការបណ្តុះបណ្តាលធនធានមនុស្សនៅវិទ្យាស្ថានNPIC

បានផុស

២ years មុន

នៅ

ថ្ងៃចន្ទ ៧ កុម្ភៈ ២០២២

ដោយ

លោកបណ្ឌិត អ៊ិត សំហេង រដ្ឋមន្ត្រីក្រសួងការងារនិងបណ្ដុះបណ្ដាលវិជ្ជាជីវៈ និងលោកស្រី Pauline Tamesisអ្នកសម្របសម្រួលអង្គការសហប្រជាជាតិប្រចាំកម្ពុជា និងជាសហប្រធានកម្មវិធីមុខរបរ និងការងារសមរម្យរបស់យុវជននៅកម្ពុជា(DEY) និងតំណាងអង្គការអន្តរជាតិផ្សេងទៀតនាព្រឹកថ្ងៃទី៧ ខែកុម្ភៈ ឆ្នាំ២០២២បានអញ្ជើញចុះពិនិត្យដំណើរការបណ្តុះបណ្តាលធនធានមនុស្ស នៅវិទ្យាស្ថានពហុបច្ចេកទេសកម្ពុជា(NPIC)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការចុះត្រួតពិនិត្យនេះដោយសារវិទ្យាស្ថាននេះធ្លាប់មានកិច្ចសហប្រតិបត្តិការជាមួយ ILO ក្រុមកម្មវិធី DEY ដំណាក់កាលទី២លើគម្រោងសាកល្បងរួមមានគ្រឿងម៉ាស៊ីន កែច្នៃផ្លែឈើ និងអាហារ និងការដុតនំ។

នៅក្នុងដំណើរទស្សនកិច្ចរបស់គណៈប្រតិភូនេះដែរ ក៏បានអញ្ជើញចុះទៅពិនិត្យមើលរោងជាងរបស់វិទ្យាស្ថាន ដែលរួមមានបន្ទប់មេកានិច បន្ទប់អគ្គិសនី បន្ទប់មេកាត្រូនិច១ បន្ទប់មេកាត្រូនិច២ បណ្ណាល័យសាលបញ្ញាសប្បនិម្មិត និងមន្ទីរពិសោធន៍ចំណីអាហារ។

លោកបណ្ឌិត អ៊ិត សំហេង បានវាយតម្លៃខ្ពស់ដល់វិទ្យាស្ថានNPICដែលមានកម្មវិធីបណ្តុះបណ្តាលបានយ៉ាងល្អសម្រាប់និស្សិតដែលបានបញ្ចប់ការសិក្សាកន្លងមកពីវិទ្យាស្ថាន គឺពួកគាត់ទទួលបានជោគជ័យយ៉ាងធំធេងនៅក្នុងអាជីពការងាររបស់ខ្លួនដោយមានសមត្ថភាពអាចគ្រប់គ្រងផលិតកម្ម របស់ក្រុមហ៊ុនធំៗ និងអ្នកមួយចំនួនខ្លះទៀត ក៏ឈានទៅបើកអាជីវកម្មជាលក្ខណៈឯកជនផ្ទាល់ខ្លួនមានភាពរីកចម្រើន ទទួលបានការគាំទ្រពីអតិថិជនយ៉ាងច្រើនផងដែរ។

គួរជម្រាបជូនថា NPIC ជាគ្រឹះស្ថានសាធារណៈរដ្ឋបាលបង្កើតឡើងដោយរាជរដ្ឋាភិបាលកម្ពុជា សង់លើផ្ទៃដីសរុប ៩៨,១២៣ម៉ែត្រការ៉េ។ វិទ្យាស្ថានមានកម្មវិធីបណ្តុះបណ្តាល រួមមាន វិស្វកម្មអគ្គិសនី, ស្ថាបត្យកម្ម,វិស្វកម្មអេឡិចត្រូនិច និងទូរគមនាគម ន៍ មេកាត្រូនិច វិទ្យាសាស្ត្រកុំព្យូទ័រទេសចរណ៍ និងបដិសណ្ឋារកិច្ច អុបទិក។

បន្ទាប់ពីបញ្ចប់ដំណើរទស្សនកិច្ច របស់គណៈប្រឹក្សាភិបាល នៃកម្មវិធីមុខរបរ និងការងារសមរម្យរបស់យុវជននៅកម្ពុជា ដំណាក់កាលទី២នៅវិទ្យាស្ថានពហុបច្ចេកទេសកម្ពុជា(NPIC) រួចមកគណៈប្រតិភូបានអញ្ជើញចុះទស្សនកិច្ចផលិតផលទឹកបរិសុទ្ធវីតាល់ របស់ក្រុមហ៊ុនអិនវីស៊ី ខបភើរេសិន ខូ អិលធីឌី ដែលជាក្រុមហ៊ុនក្នុងស្រុកឈានមុខមួយក្នុងវិស័យផលិត និងចាយចំណីអាហារ និងភេសជ្ជៈដែលបានចុះបញ្ជីនៅក្រសួងពាណិជ្ជកម្ម នៃព្រះរាជាណាចក្រកម្ពុជា។

ក្រុមហ៊ុននេះបានចាប់ផ្តើមដំណើរការជាផ្លូវការ នៅថ្ងៃទី៧ ខែមករា ឆ្នាំ២០១០។ ផលិតផល និងប្រព័ន្ធរបស់ក្រុមហ៊ុនទទួលបានវិញ្ញាបនបត្រទទួលស្គាល់ដោយស្តង់ដារជាតិ និងអន្តរជាតិ ដូចជា CS009:2005, GHP, HACCP, ISO2200:2018, ISO9001:2015,ISO14001:2015.។

សម្រាប់ភាពជាដៃគូរ រវាងក្រុមហ៊ុន និងកម្មវិធី មុខរបរ និងការងារសមរម្យរបស់យុវជននៅកម្ពុជា គឺក្រុមហ៊ុនបានជ្រើសរើស សិស្ស-និស្សិតពី វិទ្យាស្ថានពហុបច្ចេកទេសកម្ពុជា(NPIC) ដើម្បីបម្រើការងារក្នុងក្រុមហ៊ុនរួមទាំងសិស្សដែលបានចូលរួមក្នុងវគ្គបណ្តុះបណ្តាលសាកល្បងនូវកញ្ចប់បណ្តុះបណ្តាលផ្អែកលើសមត្ថភាពជំនាញគ្រឿងម៉ាស៊ីន/ការកែច្នៃបន្លែផ្លៃឈើ/ការដុតនំ៕

អត្ថបទ៖ សំអឿន

Related Topics:

Up Next

សន្និបាតបូកសរុបលទ្ធផលការងារ របស់ក្រសួងទំនាក់ទំនងរដ្ឋសភា-ព្រឹទ្ធសភា បានចាប់ផ្ដើមដំណើរការនាថ្ងៃនេះ

Don't Miss

ACU ព្រមានចាត់វិធានការច្បាប់លើមន្ត្រី ៩ រូប មិនចូលខ្លួនប្រកាសទ្រព្យសម្បត្តិ