លោក ខាន់ សុវណ្ណ ស្ថាបនិកអង្គព្រោកប្រាជ្ញ ទទួលមរណភាពដោយរោគាពាធ

លោក ខាន់ សុវណ្ណ ស្ថាបនិក នៃអង្គព្រោកប្រាជ្ញ និងជាអ្នកអត្ថាធិប្បាយបញ្ហាសង្គម និងនយោបាយ បានទទួលមរណភាព កាលពីយប់ថ្ងៃទី ២៣ ខែមីនា ឆ្នាំ ២០២២ ក្នុងជន្មាយុ ៦៦ឆ្នាំ ដោយរោគាពាធ។

បើតាមសារចូលរួមមរណទុក្ខ របស់សមាជិក-សមាជិកា នៃអង្គព្រោកប្រាជ្ញ បានសរសេរថា សូមថ្លែងនូវមរណទុក្ខក្រៀមក្រំ ដោយក្តីក្តុកក្តួលបំផុតដែលលោក ខាន់ សុវណ្ណ ស្ថាបនិក នៃអង្គព្រោកប្រាជ្ញ បានទទួលមរណភាព នាយប់ថ្ងៃទី ២៣ ខែមីនា ឆ្នាំ ២០២២ ក្នុងជន្មាយុ ៦៦ឆ្នាំ ដោយរោគាពាធ។

សារចូលរួមមរណទុក្ខ បានសរសេរបន្តថា សូមសម្តែងនូវការសោកស្តាយ គ្មានអ្វីប្រៀបផ្ទឹមបានឡើយចំពោះមរណភាពនេះ និងសូមកត់ត្រាទុកនូវរាល់ស្នាដៃ ឧត្តមគតិ វីរភាព និងគុណបំណាច់របស់លោក ដែលជាកុលបុត្រខ្មែរ និងជាសកម្ម​ជនដ៏ឆ្នើម ដែលបានពលិកម្មគ្រប់បែបយ៉ាង ដើម្បីផលប្រ​យោ​​ជន៍របស់ប្រទេសជាតិ ប្រជាជនកម្ពុជា និងបានចូលរូមថែ​រក្សាសន្តិភាពបាន ដោយលំបាកនេះ។

ប្រភពដដែល បានបន្តថា «សូមចូលរួមរំលែកនូវមរណទុក្ខ ដោយក្តីសោកសង្រេងបំផុត ជាមួយក្រុមគ្រួសារសព ហើយសូមបួងសួងឲ្យវិញ្ញាណក្ខន្ធរបស់លោក ខាន់ សុវណ្ណ បានទៅសោយសុខក្នុងសុគតិភពកុំបីឃ្លៀងឃ្លាតឡើយ»។

ប្រភពព័ត៌មានមួយចំនួន បានឲ្យដឹងថា ស្ថាបនិក នៃអង្គព្រោកប្រាជ្ញ លោក ខាន់ សុវណ្ណ បានធ្វើដំណើរ​ទៅព្យាបាលជំងឺនៅប្រទេសឥណ្ឌា។ ប៉ុន្តែមិនទាន់ដល់ ក៏ទទួលមរណភាពនៅប្រទេសមីយ៉ាន់ម៉ា។ ប្រភពផ្សេងទៀត បានបញ្ជាក់ដែរថា លោក ខាន់ សុវណ្ណ​ បានមរណភាព​ ដោយសារជំងឺក្រិនថ្លើម៕