សម្ដេចតេជោ៖ យើងប្រឆាំងដាច់ខាត អ្នកមានអំណាច និងទឹកលុយ ជ្រកក្រោមពលរដ្ឋ ទន្ទ្រានដី

សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា មានប្រសាសន៍ថា យើងប្រឆាំងដាច់ខាតចំពោះការប្រើប្រាស់សិទ្ធិអំណាច និងការប្រើទឹកលុយ ដើម្បីជ្រកក្រោមរូបភាពប្រជាពលរដ្ឋ ហើយដណ្ដើមទន្ទ្រានកាន់កាប់យកដីធ្លី។

សម្ដេចតេជោ ហ៊ុន សែន លើកឡើងបែបនេះនៅក្នុងការសេចក្តីថ្លែងសារផ្សាយផ្ទាល់ពិសេស ស្ដីពី បឹងទន្លេសាប ថ្ងៃទី២៧ ខែឧសភានេះ ខណៈសម្ដេចបានបញ្ជាដល់លោក​ឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួង​រៀបចំ​ដែនដី នគរូបនីយកម្ម និង​សំណង់ ដែលជា​ប្រធាន​គណៈកម្មការ​សូ​រិ​យោ​ដី ថ្នាក់ជាតិ រួមទាំងខេត្តជុំវិញបឹងទន្លេសាប ធ្វើការកែសម្រួលព្រំប្រទល់ថ្មីនៃតំបន់អភិរក្សបឹងទន្លេសាប។

សម្ដេចតេជោ ហ៊ុន សែន បានអំពាវនាវដល់ប្រជាពលរដ្ឋទាំងអស់ នៅពេលទទួលបានដីធ្លីដែលធ្លាប់បង្កបង្កើនផលហើយ សូមកុំកាប់រានដីដែលនៅជិតខាងដើម្បីពង្រីកដីកាន់តែធំ។ ហើយកុំឱ្យអ្នកនៅពីក្រៅតំបន់ ជាឈ្មួញ ឬអ្នកមានអំណាចទៅ គប់គិតជាមួយប្រជាពលរដ្ឋ ហើយកាប់រានយកផ្ទៃដីរដ្ឋរាប់រយ រាប់ពាន់ហិកតា ហើយជួលឱ្យប្រជាពលរដ្ឋ ដូចរយៈពេលកន្លងទៅ។

សម្ដេចតេជោ មានប្រសាសន៍បញ្ជាក់បន្តថា៖ “យើងប្រឆាំងដាច់ខាតជាមួយការប្រើប្រាស់សិទ្ធិអំណាចរបស់អ្នកមានអំណាច និងការប្រើទឹកលុយរបស់អ្នកមានប្រាក់ ដើម្បីជ្រកក្រោមរូបភាពប្រជាពលរដ្ឋ ហើយដណ្ដើមទន្ទ្រានកាន់កាប់យកដីធ្លី ដើម្បីធ្វើជាផលប្រយោជន៍ផ្ទាល់ខ្លួន។ ប៉ុន្តែយើងគាំទ្រ និងលើកទឹកចិត្ត និងផ្ដល់ការគាំពារប្រជាពលរដ្ឋសុចរិតដែលបានបង្កបង្កើនផលលើផ្ទៃដីនេះយូរមកហើយ យ៉ាងហោចណាស់ក៏ជាង១០ឆ្នាំដែរ”។

សម្ដេចតេជោ ហ៊ុន សែន បញ្ជាក្រុមការពារ ពិនិត្យពិចារណាដោយផ្អែកលើស្ថានភាពជាក់ស្ដែងនៃភូមិសាស្ត្រនីមួយៗក្នុងការកាត់ឆ្កៀលចេញពីតំបន់២ ឬតំបន់៣ សម្រាប់ទីតាំងដែលមានប្រជាជនរស់នៅជាក់ស្ដែង មានភូមិករ សាលា វត្តអារាម ដែលភូមិករខ្លះបានកើតជាយូរណាស់មកហើយ។

សម្ដេចតេជោ លើកឡើងថា កន្លងមករដ្ឋាភិបាលបានសាងសង់វត្តអារាម ក៏ដូចជាសាលារៀនបណ្ដែតទឹក សាលារៀនខ្ពស់លើផ្ទៃដីជូនប្រជាពលរដ្ឋរស់នៅតំបន់ព្រៃលិចទឹកនៅតំបន់ទន្លេសាប។

គួររម្លឹកថា កាលពី​ថ្ងៃទី​២៨ ខែវិច្ឆិកា ឆ្នាំ២០២១ សម្ដេចតេជោ ហ៊ុន សែន បាន​បញ្ជាទៅ​ប្រធាន​អង្គភាពប្រឆាំង​អំពើ​ពុក​រលួយ ក្រសួងរៀបចំដែនដី និងស្ថាប័នពាក់ព័ន្ធផ្សេងទៀត ចុះទប់ស្កាត់ជាបន្ទាន់ចំពោះករណី​ទន្ទ្រាន​ដីព្រៃលិចទឹក​នៅតំបន់បឹងទន្លេសាបដោយខុស​ច្បាប់​ និង​ចាត់​វិធាន​ការ​ច្បាប់​តឹង​រ៉ឹងចំពោះ​អ្នក​ល្មើស​។ ត្រឹម​ដើមខែមករា ឆ្នាំ២០២២នេះ ដីព្រៃលិច​ទឹក​ជិត ៦០ ០០០ ហិកតា ក្នុងខេត្តចំនួន៦​នៅជុំវិញ​បឹងទន្លេ​សាប ត្រូវ​បាន​ដក​ហូត​មក​ទុក​ជា​សម្បត្តិរដ្ឋ​វិញ ក្រោយជនល្មើសទន្ទ្រានកាន់កាប់​ដោយ​ខុស​ច្បាប់។ ក្រៅពីដកហូតដីមក​វិញ រដ្ឋាភិបាលបាន​បញ្ជាទៅអាជ្ញាធរពាក់ព័ន្ធឱ្យធ្វើការ​បោះបង្គោល​កំណត់​ព្រំដី ដំឡើងផ្ទាំងប៉ាណូ ដើម្បីកំណត់ព្រំតំបន់ការពារដែនព្រៃលិចទឹក និងការដាំដើមឈើលិចទឹកក្នុងតំបន់៣ឡើងវិញ រួមទាំងចុះរៀបចំចុះបញ្ជីដីរដ្ឋក្នុងតំបន់៣៕

អត្ថបទ៖ ច័ន្ទ វីរៈ