ជិះរថយន្តអគ្គិសនី​ចម្ងាយ ១០០ គីឡូម៉ែត្រ​ ចំណាយ​តិចជាងរថយន្ត​ប្រេង​ឥន្ធនៈជិត ៣ ដង

សព្វថ្ងៃចរន្តនៃការប្រើប្រាស់​យានយន្ត​អគ្គិសនី​នៅកម្ពុជា​កំពុងមានការកើនឡើង ខណៈរាជរដ្ឋាភិបាលកំពុងរៀបចំគោលនយោបាយអំពីការប្រើប្រាស់រថយន្តអគ្គិសនី ដោយសារជួយសន្សំសំចៃសេដ្ឋកិច្ច និងកាត់បន្ថយជាតិពុល។​

លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន មានប្រសាសន៍នៅថ្ងៃទី ២៧ ខែឧសភា ២០២២នេះថា តម្លៃនៃការប្រើប្រាស់រថយន្តអគ្គិសនីធូរថ្លៃជាងរថយន្តប្រេងឥន្ធនៈ។

លោកទេសរដ្ឋមន្ត្រីលើកឡើងថា “តាមការគ្រោងទុក តម្លៃ ១ ៣០០ រៀល ក្នុង១ គីឡូវ៉ាត់ និយាយឱ្យងាយយល់ បើជិះ​១០០ គីឡូ ត្រូវចំណាយប្រហែល ៤ ដុល្លារ ប្រៀបធៀបជាមួយឡានប្រើប្រេងឥន្ធនៈគឺថោកជាង ដែលឡានធម្មតាអាចអស់ ១០ ដុល្លារ”។

មកទល់ពេលនេះ កម្ពុជាមានរថយន្តប្រើអគ្គិសនីចំនួន ១៤៨ គ្រឿង ដែលបានចុះបញ្ជីនៅក្រសួងសាធារណការ និងដឹកជញ្ជូន។ នៅក្នុងរយៈពេល ៥ ខែ ឆ្នាំ ២០២២ នេះ មានការចុះបញ្ជីរថយន្ត ៨៤ គ្រឿង បើប្រៀបធៀបឆ្នាំ ២០២១ មានតែ ៩ គ្រឿង ដូច្នេះមានការកើនឡើង ៨០០%។

រាជរដ្ឋាភិបាលបានដាក់ចេញ​នូវគោលនយោបាយ​ដើម្បីឱ្យមានអាព្យាក្រឹត្យ ទាក់ទងនឹង​ការប​ញ្ចេញ​ឧស្ម័ន​ឱ្យក្លាយទៅជាសូន្យ នៅឆ្នាំ ២០៥០ និងជំរុញឱ្យការប្រើប្រាស់យានយន្តដើរដោយអគ្គិសនី ប្រមាណ ៤០ ភាគរយនៅឆ្នាំ ២០៥០ និងម៉ូតូ ៧០ ភាគរយនៅឆ្នាំ ២០៥០ ដែរ។

កម្ពុជាមិនទាន់មានស្ថានីយសាកថ្មរថយន្តអគ្គិសនីគ្រប់គ្រាន់នោះទេ ដែលបច្ចុប្បន្នមាននៅក្រសួងសាធារណការ ក្រុងព្រះសីហនុ កំពុងដំឡើងនៅខេត្តបាត់ដំបង និងសៀមរា និងស្ថានីយ៍កាល់តិច នៅព្រៃស ព្រមទាំងស្ថានីយប្រេងឥន្ធនៈមួយចំនួន កំពុងដំឡើង៕

អត្ថបទ៖ ឡេង ដេត