វៀតណាមគ្រោងបន្តគោលនយោបាយលើកទឹកចិត្តពន្ធសម្រាប់ EV ដល់ ២០៣០​

ការិយាល័យសភាវៀតណាម​បាន​ឱ្យដឹងកាលពីចុងសប្ដាហ៍កន្លងទៅថា ​រដ្ឋាភិបាលវៀតណាមមានគម្រោង​បន្តកាត់បន្ថយពន្ធប្រើប្រាស់ពិសេសលើយានយន្តអគ្គិសនី (EV) រយៈពេលជិត ៤ ឆ្នាំទៀត រហូតដល់ចុងឆ្នាំ ២០៣០ ​ដើម្បីជំរុញការលក់ EV និងកាត់បន្ថយការបំភាយឧស្ម័នផ្ទះកញ្ចក់​។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រនៅថ្ងៃចន្ទ (២០ មេសា)។

រដ្ឋាភិបាលនឹងដាក់សំណើ​បន្ថែមពេលកាត់បន្ថយពន្ធនេះទៅសភា ដើម្បីសុំការអនុម័ត។ នេះបើយោងតាមរបាយការណ៍មួយពីក្រសួងហិរញ្ញវត្ថុ។

គួរគូសបញ្ជាក់ថា វៀតណាមបានចាប់ផ្ដើម​កាត់បន្ថយពន្ធប្រើប្រាស់ពិសេសលើ EV ក្នុងខែមីនា ឆ្នាំ ២០២២ មកត្រឹមចន្លោះពី ១% ទៅ ៣% ពីកម្រិតចាស់ ៤% ទៅ ១១%។ ការកាត់បន្ថយនេះ គ្រោងនឹងបញ្ចប់នៅខែត្រឹម​ខែ​កុម្ភៈ ឆ្នាំ ២០២៧។

​ក្រោមគោលនយោបាយលើកទឹកចិត្តពន្ធបែបនេះ​ វៀតណាម​បាន​មើលឃើញពីកំណើនលក់ EV ក្នុងស្រុកយ៉ាងខ្លាំង ពីជិត ៧ ០០០ គ្រឿង នៅឆ្នាំ ២០២២ ដល់ជិត ១៧៥ ០០០ គ្រឿង នៅឆ្នាំមុន។

របាយការណ៍ពីក្រសួងហិរញ្ញវត្ថុ បាននិយាយថា ​គោលនយោបាយពន្ធនេះ បានរួមចំណែកដល់គោលដៅសូន្យសុទ្ធឆ្នាំ ២០៥០ របស់ប្រទេសវៀតណាម ដោយ EV នីមួយៗជួយកាត់បន្ថយការបំភាយឧស្ម័នកាបូន​ឌីអុកស៊ីត​ចំនួន ០,៨៥ តោន/ឆ្នាំ បើប្រៀបធៀបទៅនឹងរថយន្តប្រើឥន្ធនៈ។ ​

របាយការណ៍​ដដែលបន្តថា៖ «ការបន្តអនុវត្តការលើកទឹកចិត្តពន្ធសម្រាប់រថយន្តអគ្គិសនី អាចបង្កើត​ផល​​វិជ្ជមានជាច្រើន ដែលជួយពន្លឿនការផ្លាស់ប្តូរឆ្ពោះទៅរកវិស័យ​ដឹកជញ្ជូនដែលប្រើ​ថាមពលស្អាត កាត់បន្ថយការបំភាយឧស្ម័ន និងបង្កើនគុណភាពខ្យល់ ជាពិសេសនៅក្នុងទីក្រុងធំៗ»៕