សម្តេចក្រឡាហោម ស ខេង អញ្ជើញទៅបោះឆ្នោតឃុំ-សង្កាត់ នៅខេត្តបាត់ដំបង

នៅថ្ងៃអាទិត្យ ទី០៥ ខែមិថុនានេះ ជាពេលវេលាដ៏សំខាន់ដែលពលរដ្ឋខ្មែរអ្នកមានឈ្មោះក្នុងបញ្ជីឈ្មោះបោះឆ្នោត ត្រូវបំពេញកាតព្វកិច្ចក្នុងនាមប្រជាពលរដ្ឋ បោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥ ដើម្បីបន្តដឹកនាំមូលដ្ឋានដែលពួកគេពេញចិត្ត។

ជាមួយគ្នានេះ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញទៅបោះឆ្នោតនៅការិយាល័យលេខ៥០៣ ក្នុងវិទ្យាល័យ សោហឺ សង្កាត់ស្វាយប៉ោ ខេត្តបាត់ដំបង។ ចំណែកស្ថានភាពទូទៅនៅក្នុងខេត្តបាត់ដំបង មានសភាពស្ងៀមស្ងាត់ល្អប្រសើរ មិនមានករណីណាមួយកើតឡើងគួរឱ្យកត់សម្គាល់នោះឡើយ។

ការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥នេះ បានចាប់ផ្ដើមដំណើរការ ចាប់ពីម៉ោង ៧ ព្រឹក ដោយមានគណបក្សនយោបាយចំនួន១៧ បានចូលរួមប្រកួតប្រជែង ដាក់បេក្ខជនក្រុមប្រឹក្សាឃុំ សង្កាត់ សរុប ៨៦ ០៩២ នាក់ ស្ត្រី ២៧ ៨១៣នាក់។ ដោយឡែកឃុំ-សង្កាត់ ក្នុងអាណត្តិទី៥នេះ មានចំនួន ១ ៦៥២ ហើយចំនួនក្រុម ប្រឹក្សាឃុំ-សង្កាត់ ដែលនឹងត្រូវជ្រើសរើសមកបម្រើការងារក្នុងឃុំ-សង្កាត់ទាំងអស់ មានចំនួន ១១ ៦២២ រូប។

ដំណើរការបោះឆ្នោតក្រុមប្រឹក្សាឃុំ-សង្កាត់ អាណត្តិទី៥នេះ មានការិយាល័យបោះឆ្នោតសរុបចំនួន ២៣ ៦០២ ការយាល័យ។ ប្រជាពលរដ្ឋដែលមានឈ្មោះក្នុងបញ្ជីបោះឆ្នោតសរុបចំនួន ៩ ២០៥ ៦៨១នាក់ ស្មើនឹង ៨៧,៩៤ ភាគរយ នៃប្រជាជនកម្ពុជាទាំងអស់ ក្នុងនោះមានស្រីចំនួន ៤ ៩០៤ ៨៣២ នាក់៕

អត្ថបទ៖ សៅ សារិទ្ធ