សម្ដេច ស ខេង រំពឹងលើទូតថ្មីវៀតណាម នឹងបន្តពង្រឹងទំនាក់ទំនងជាមិត្តភាពល្អជាមួយកម្ពុជា

សម្តេចក្រឡាហោម ស ខេង ដាក់ក្ដីជឿជាក់លើឯកអគ្គរដ្ឋទូតថ្មីរបស់វៀតណាម នឹងបន្តរួមចំណែកពង្រឹងទំនាក់ទំនងជាមិត្តភាពល្អប្រសើរជាមួយកម្ពុជាបន្ថែមទៀត។

ការលើកឡើងរបស់សម្ដេចក្រឡាហោម បានធ្វើឡើងក្នុងពេលអនុញ្ញាតឱ្យលោក ង្វៀន មិញវូ (Nguyen Minh Vu) ឯកអគ្គរដ្ឋទូតវៀតណាមប្រចាំកម្ពុជា ទើបតែងតាំងថ្មី ចូលជួបសម្តែងការគួរសម និងពិភាក្សាការងារ នៅវិមានរដ្ឋសភា កាលពីព្រឹកថ្ងៃទី១៤ ខែមីនា ឆ្នាំ២០២៥។

សម្តេចក្រឡាហោម ស ខេង ឧត្តមប្រឹក្សាផ្ទាល់ព្រះមហាក្សត្រនៃកម្ពុជា និងសមាជិករដ្ឋសភា បានសម្តែងនូវការស្វាគម និងអបអរសាទរចំពោះលោក ង្វៀន មិញវូ ដែលទទួលបានការតែងតាំងជាឯកអគ្គរដ្ឋទូតវិសាមញ្ញ និងពេញសមត្ថភាព ប្រចាំនៅព្រះរាជាណាចក្រកម្ពុជា។ សម្តេច ក៏យកឱកាសនេះសម្តែងនូវការអបអរសាទរចំពោះទំនាក់ទំនងនិងកិច្ចសហប្រតិបត្តិការរវាងថ្នាក់ដឹកនាំកំពូល និងប្រជាជននៃប្រទេសទាំងពីរ។

សម្តេច ស ខេង ក៏ជឿជាក់ថា តាមរយៈតួនាទីរបស់លោកឯកអគ្គរដ្ឋទូត នឹងបន្តរួមចំណែកជំរុញ និងលើកកម្ពស់ដល់ស្មារតីនៃទំនាក់ទំនងនេះឱ្យកាន់តែខ្លាំងក្លាឡើងថែមទៀតរវាងប្រទេស និងប្រជាជនប្រទេសទាំងពីរ។

ជាការឆ្លើយតប លោក ង្វៀន មិញវូ ក៏បានថ្លែងអំណរគុណ និងបានជម្រាបជូននូវការផ្តាំផ្ញើសាកសួរសុខទុក្ខពីសំណាក់ថ្នាក់ដឹកនាំវៀតណាម ជូនចំពោះសម្តេចក្រឡាហោម ស ខេង ហើយលោកផ្ទាល់ ក៏បានដឹង និងថ្លែងអំណរគុណចំពោះការរួមចំណែកយ៉ាងសកម្មក្នុងរយៈពេលកន្លងមករបស់សម្តេច ក្នុងការពូនជ្រុំដល់ទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ ជាពិសេសនៅក្នុងវិស័យនៃការទទួលខុសត្រូវរបស់សម្តេចនៅក្នុងរយៈពេលកន្លងមក។

ត្រង់ចំណុចនេះ សម្តេច ស ខេង បានឆ្លើយតបទៅកាន់លោករដ្ឋទូតវិញ ថា ទោះបីជាសម្តេច មិននៅក្នុងរាជរដ្ឋាភិបាលក៏ដោយ ក៏សម្តេចនឹងបន្តខិតខំចូលរួមចំណែកតាមគ្រប់លទ្ធភាពដល់ការពង្រឹងពង្រីកទំនាក់ទំនងរវាងប្រទេសទាំងពីរ៕