អង្គភាពបោស​សំអាតមីន​ភាគខាងត្បូង​សម្រេចលទ្ធផលការងារ​បានប្រមាណ​១៧៣ហិកតា

ក្រុមការងារប្រតិបត្តការបោសសម្អាតមីនខេត្តព្រះសីហនុ ​បានបោសសម្អាតគ្រាប់មីនភាគខាងត្បូង​ ដែលសម្រេចលទ្ធផល​បានផ្ទែដីប្រមាណជាង១៧លានម៉ែត្រការ៉េ ស្មើនឹង ១៧៣ ហិកតា។​

​ចំពោះការឲ្យដឹងបែបនេះ នៅក្នុងពិធីជួបសំណេះសំណាលជាមួយមន្រ្តីបោសសម្អាតមីន​ ក្រោមវត្តមានលោក គួច ចំរើន អភិបាលខេត្តព្រះសីហនុ ​នៅព្រឹកថ្ងៃទី ២២ ខែកក្កដា ២០២២ ​នៅស្រុកកំពង់សីលា ខេត្តព្រះសីហនុ។​

​អង្គភាពបោសសម្អាតមីនបានឲ្យដឹងថា ​ក្រុមការងារបោសសម្អាតមីនបានបោសសម្អាតគ្រាប់មីន​ ​យុទ្ធភ័ណ្ឌមិនទាន់ផ្ទុះលើផ្ទៃដីចំនួន១៧លានម៉ែត្រការ៉េ ស្មើនឹង១៧៣ហិកតា រកឃើញ​ ហើយ​កំទេច​ចោលគ្រាប់មីនបានចំនួន ៣៤គ្រាប់ និងយុទ្ធភ័ណ្ឌមិនទាន់ផ្ទុះ៩៣គ្រាប់។

នៅក្នុង​ពេល​ចុះប្រតិបត្តិការណ៍បោសសម្អាតមីន ក្រុមការងារបានជួបឧបសគ្គ​ជាច្រើនកន្លង​មករួម​មាន អាកាសធាតុភ្លៀងធ្លាក់ខ្យល់ ស្ទើរតែរៀងរាល់ថ្ងៃ ហើយចំពោះចំការមីនភាគច្រើនជាតំបន់ភ្នំ ដែល​នៅឆ្ងាយពីផ្លូវ មិនអាចចូលទៅដល់ ម្យ៉ាងវិញទៀតចំការមីនខ្លះត្រូវធ្វើដំណើរដោយ​ថ្មើរជើង​ជាច្រើន​គីឡូម៉ែត្រក៏មាន។

លោក​ គួច ចំរើន អភិបាល នៃគណៈអភិបាលខេត្តព្រោះសីហនុ បានមាន​ប្រសាសន៍​កោតសរសើរ និងវាយតម្លៃខ្ពស់ចំពោះថ្នាក់ដឹងនាំ បុគ្គិកស៊ីម៉ាក នៅក្នុងស្មារតី​យកចិត្ត​ទុកដាក់រួមចំណែកជាមួយរាជរដ្ឋាភិបាល ក្នុងវិស័យ​មីននៅកម្ពុជា ពិសេសវិស័យមីន​នៅខេត្ត​ព្រះ​សីហនុ។

ទន្ទឹមនេះ អត្ថប្រយោជន៍ដែលទទួលបាន គឺបានរំដោះផ្ទៃដីស្រែចំការ​ដែលមានការគំរាម​កំហែង និងជាឧបសគ្គដល់ប្រជាពលរដ្ឋ និងអ្នកទេសចរណ៍៕

អត្ថបទ៖ ឌឿន ចាន់ធារី