Connect with us

ព័ត៌មានជាតិ

ភ្នំពេញ​មាន​ទីសក្ការពីរ​កន្លែង​ ពលរដ្ឋ​​ជំនឿមាន​បារមី​​ពូកែ​ស័ក្តិសិទ្ធ

បានផុស

នៅ

ទូទាំងប្រទេស​កម្ពុជា​មាន​ទី​សក្តារផ្សេងៗ​តាម​ជំនឿ​របស់​ប្រជាពលរដ្ឋ។ ដោយ​ឡែក​នៅ​រាជធានី​ភ្នំពេញ ​មាន​ទី​សក្ការ​ពីរ​កន្លែង​ ដែល​ពលរដ្ឋ​តែងតែទៅ​បួង​សួងសុំសេចក្តី​សុខ​ និង​ចាត់ទុកជា​កន្លែងមាន​បារមី​ពូកែ​​​​ស័ក្ដិសិទ្ធិ​។

រមណីយដ្ឋាន​វត្ត​ភ្នំ​

ក្រៅ​តែ​ជា​​តំបន់​ទេសចរណ៍ វត្តភ្នំ​ជា​ទី​សក្ការ​ដ៏​សំខាន់​មួយ​សម្រាប់​​ពលរដ្ឋ​នៅ​រាជធានី​ភ្នំពេញ។ ទីសក្តារនេះ​ក៏​មានប្រវត្តិ​​ពាក់ព័ន្ធ​ទៅ​នឹង​ការ​កកើត​រាជធានីភ្នំពេញផង​ដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើ​តាម​ឯកសារ​បាន​បង្ហាញ​ថា ក្នុង​កាល​ដ៏​យូរ​លង់​ មាន​ស្ត្រី​មេម៉ាយ​ម្នាក់​ជា​អ្នក​មាន​ស្តុក​ស្ដម្ភ​ដែល​អ្នក​ផង​ហៅ​ថា ” ដូនពេញ”។

ថ្ងៃមួយ​ភ្លៀង​បាន​បង្អុរ​ចុះ​មួយ​មេ​យ៉ាង​ធំ​ធ្វើ​ឲ្យ​ទឹកទន្លេ​ជន់​លិច​ល្ហល្ហាច​។ ពេលនោះ​ដូនពេញ​ដែល​បាន​ចុះទៅ​កំពង់ទឹក​ស្រាប់តែ​ឃើញ​ដើម​គគីរ​ដ៏​ធំ​មួយ​ដើម​ត្រូវបាន​ទឹកទន្លេ​កួច​អណ្តែត​វិលវល់​នៅក្បែរ​ច្រាំង​។ ឃើញ​ដូច្នេះ ដូនពេញ​ក៏​ហៅ​អ្នកជិតខាង​ឲ្យ​មកជួយ​ទាញយក​ដើម​គគីរ​នោះមក​លើគោក​។ ពេល​ស្រង់ដើម​គគីរ​ចេញពី​ក្នុង​ទឹកបាន​ហើយ ដូនពេញ​ក៏​ប្រទះឃើញ​ព្រះពុទ្ធ​រូប ​៤ ​ព្រះអង្គ​តូចៗ​ធ្វើ​ពី​សំរឹទ្ធិ និង​ទេវរូប​មួយអង្គ​ទៀត​ធ្វើ​ពី​ថ្ម ស្ថិតនៅក្នុង​ប្រហោង​ឈើ​គគីរ​នោះ​។​

​ដូនពេញ​ក៏​បាន​ចាត់​ការសង់​ខ្ទម​តូច​មួយ​ សម្រាប់​តម្កល់​វត្ថុ​ជាទី​សក្ការទាំងនោះ​ទុកជា​បណ្ដោះអាសន្ន​។ ក្រោយមក ដូនពេញ​​​ក៏​អំពាវនាវ​ឲ្យ​អ្នកជិតខាង​ជួយ​លើកដី​ពូន​ជា​កូនភ្នំ​មួយ ហើយ​បន្តិច​ម្តងៗកូនភ្នំ​នោះ​ក៏បាន​ក្លាយទៅជា​ភ្នំ​ដ៏​ធំ​មួយ​។ ដូនពេញ​ក៏​ចាត់​ឲ្យ​គេ​សង់​ព្រះវិហារ​មួយ​ ដើម្បី​តម្កល់​ព្រះ​ពុទ្ធរូប​សំរឹទ្ធិ​ទាំង​៤​អង្គ​។ ចំណែកឯ​ព្រះ​ពុទ្ធរូប​មួយអង្គ​ទៀត​ដែល​ធ្វើ​ពី​ថ្ម​ក៏ត្រូវ​បាន​គេ​ដង្ហែ​យកទៅ​តម្កល់​ក្នុង​អាសនៈ​មួយ​នៅឯ​ជើងភ្នំ​ប៉ែក​ខាងកើត​នៃ​ព្រះវិហារ​។​

បន្ទាប់ពី​សាងសង់​ព្រះវិហារ​រួចហើយ ដូនពេញ​ក៏បាន​និមន្ត​ព្រះសង្ឃ​ឲ្យ​មក​គង់​នៅលើ​ជើងភ្នំ​នោះ។ ចាប់តាំងពី​ពេលនោះ​ហើយ​ដែល​ទីតាំង​នោះ​ត្រូវបាន​គេ​ហៅ​ឈ្មោះថា​«​វត្តភ្នំ​ដូនពេញ​» ហើយ​ដែល​ក្រោយមក​ត្រូវគេ​ហៅ​កាត់​ថា “​វត្តភ្នំ​” រហូតមកដល់​សព្វថ្ងៃ​។ ឈ្មោះ​លោកយាយ​ពេញ​ដែលជា​អ្នក​សាងសង់​ទីក្រុង​នេះ​ ក៏​ត្រូវគេ​យកទៅ​ប្រើ​ជា​ឈ្មោះ​ទីក្រុង​«​ភ្នំពេញ​»​ ជា​រៀង​រហូតមក​។​

នៅ​លើ​វត្តភ្នំ​មាន​សំណង់ព្រះវិហារ​ជាសំណង់សាសនា ដែលមានកម្ពស់ខ្ពស់ជាងគេក្នុងទីក្រុងភ្នំពេញ។ នៅក្នុង​បរិវេណ​វត្តភ្នំ មានចេតីយ៏ដ៏​ធំមួយនៅក្រោយព្រះវិហារ ដែល​តម្កល់​ព្រះធាតុ​របស់ព្រះបាទពញាយ៉ាត និងចេតីយ៏​សម្រាប់តម្កល់​ព្រះធាតុ​របស់​ព្រះញាតិវង្សព្រះអង្គ។

ដោយឡែក​ក្នុង​ឱកាស​បុណ្យចូលឆ្នាំ​ប្រពៃណី​ចិន​ អ្នក​ជាប់សែស្រឡាយ​ចិន​តែងតែ​ទៅ​កាន់​វិហារ​លោកតា​ព្រះ​ចៅ ឬ​អ្នកតា​ព្រះ​ចៅ នៅ​រមណីយដ្ឋាន​វត្ត​ភ្នំ ដើម្បី​កាត់​ឆុង​ឆ្នាំនិង​ដើម្បី​សុំ​សេចក្តីសុខ​បញ្ចៀស​គ្រោះ​ចង្រៃ ពិសេស​ឲ្យ​មាន​ហុងស៊ុយ​ល្អ​ក្នុង​ការ​ប្រកប​មុខរបរ​អាជីវកម្ម​ផ្សេងៗ។

ព្រះអង្គ​ដងកើ

ព្រះអង្គដងកើ ក៏ជាកន្លែង​សក្ការៈ​ដ៏ស័ក្កសិទ្ធ​មួយ​ទៀតនៅ​រាជធានី​ភ្នំពេញ។ ជំនឿ​ស្តីពី​បារមី​ព្រះអង្គ​ដង​កើ​នេះ ​តាម​ការ​តំណាល​តៗ​គ្នា​របស់​ចាស់ទុំ​បាន​ប្រាប់​ឱ្យ​ដឹងថា កាលដើមឡើយ ​នៅ​ចំណុច​មុខ​ព្រះអង្គ​ដង​កើ​នេះ ឱ្យ​តែ​រៀងរាល់​រាត្រី​ថ្ងៃសីល​ឬ​ថ្ងៃ​ពេញ​បូរ​មី ​គេ​តែងតែ​សង្កេតឃើញ​មាន​ទង់ក្រពើ​អណ្តែត​ផុស​ចេញពី​ផ្ទៃ​ទឹកទន្លេរួច​ក៏​លិចទៅ​វិញ ដោយ​ផុស​តែមួយ​ភ្លែតៗ​ប៉ុណ្ណោះ​។ កាលណោះ​ដែរ​ ឱ្យ​តែ​ដល់​យប់​ថ្ងៃសីល ប្រជារាស្ត្រ​តែងតែនាំគ្នា​ទៅ​ឈរ​មើល និង​បួងសួង​សុំ​សេចក្តីសុខ​មិនដែល​ខកខាននោះ​ទេ​។ ដោយសារតែ​រាល់​ការ​បន់ស្រន់​រមែង​បានសម្រេច​ដូច​ក្តី​បំណងប្រាថ្នា និង​ចង់​ឱ្យ​បារមី​ទង់ក្រពើ​នោះ​សណ្ឋិត​នៅ​ជា​រៀងរហូត​ ទើប​ប្រជារាស្ត្រ​ក៏បាន​នាំគ្នា​កសាង​ទង់​មួយ​ជា​និមិត្តរូប។

ចាប់តាំងពី​ពេលនោះ​មក​ទីនោះ ​ក៏បាន​ក្លាយទៅជា​កន្លែង​គោរព​សក្ការបូជា​របស់​ប្រជារាស្ត្រ​ខ្មែរ ហើយ​ទង់ក្រពើ​នោះ​ក៏​លែង​​ផុស​អណ្តែត​ចេញពី​ផ្ទៃ​ទឹកទន្លេ​ទៀត​ដែរ។

ជា​រៀងរាល់ថ្ងៃ មិន​ថា​វេលា​ព្រឹក ឬក៏​ល្ងាច​នោះទេ ​ជាពិសេស​ថ្ងៃឧបោសថសីល និង ​បុណ្យ​ប្រពៃណី​ជាតិ​ផ្សេងៗ​គេ​តែង​តែ​សង្កេតឃើញ​មនុស្សម្នា​ក្មេង​ចាស់​ប្រុស​ស្រី​យ៉ាងច្រើន​កុះករ​បាននាំគ្នា​ទិញ​គ្រឿង​សក្ការៈ និង ​តង្វាយ​រួមមាន ធូប ទៀន ស្លាធម៌​ដូងខ្ចី ចេកទុំ ផ្កាឈូក​ក្រហម ស ថ្វាយ​ដល់​បារមី​ព្រះអង្គ​ដង​កើ ដើម្បី​សុំ​សេចក្តីសុខ​ចម្រើន​ត្រជាក់ត្រជុំ​ទៅតាម​ជំនឿ​រៀងៗ​ខ្លួន។

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម