ព័ត៌មានជាតិ

ខេត្តពោធិ៍សាត់មានអាហារប្រចាំខេត្ត យកទៅប្រកួតជាប់លេខ ២ ទូទាំងប្រទេស

បានផុស

២ years មុន

នៅ

ថ្ងៃពុធ ១៤ កញ្ញា ២០២២

ដោយ

ខេត្តពោធិ៍សាត់ក្រៅពីវិស័យទេសចរណ៍ដែលមានរមណីយដ្ឋានធម្មជាតិជាច្រើនកន្លែង ខេត្តនេះក៏មានសក្ដានុពលលើផ្នែកម្ហូបអាហារប្រចាំតំបន់ ហើយធ្លាប់យកទៅចូលរួមប្រកួតប្រជែងថ្នាក់ជាតិជាប់លេខ ២ ទៀតផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក អឿន សំអុល ប្រធានការិយាល័យផែនការវិនិយោគ និងអភិវឌ្ឍផលិតផលទេសចរណ៍ខេត្តពោធិ៍សាត់បានឲ្យកម្ពុជាថ្មីដឹងថា ខេត្តពោធិ៍សាត់មានភាពទាក់ទាញលើធនធានធម្មជាតិ វប្បធម៌ប្រពៃណីជាអត្តសញ្ញាណ។ ក្រៅពីនេះខេត្តក៏មានម្ហូបអាហារប្រចាំតំបន់ ដើម្បីទាក់ទាញភ្ញៀវទេសចរណ៍ដែលមកកម្សាន្ត។

លោកអឿន សំអុល បានលើកពីម្ហូបពីរមុខដែលទទួលការពេញនិយមគឺសម្លកកូរនិងហ្មុកត្រី។ លោកបានលើកឡើងម្ហូបទាំងពីរមុខនេះ តាមការស្ទាបស្ទង់ភ្ញៀវដែលមកកម្សាន្តក្នុងខេត្តពោធិ៍សាត់ តែងតែកុម្ម៉ង់ជាហូរហែ រហូតបានក្លាយជាម្ហូបប្រចាំតំបន់របស់ខេត្តពោធិ៍សាត់។

លោកលើកឡើងថា ម្ហូបហ្មុកត្រីរបស់ខេត្តពោធិ៍សាត់កាលពីចុងឆ្នាំ២០២១ ក៏ធ្លាប់យកទៅចូលរួមប្រកួតប្រជែងថ្នាក់ជាតិនៅខេត្តសៀមរាប រហូតទទួលបានជាប់ជយលាភីលេខ ២ ទៀតផង។

លោក អឿន សំអុល បានបញ្ជាក់ទៀតថា ក្រៅពីម្ហូបទាំងពីរមុខហ្នឹង ខេត្តពោធិ៍សាត់ក៏មានផលិតផលសក្ដានុពលមានដូចជាក្រូចពោធិ៍សាត់ ប័រអូរសោម ទុរេនថ្មដា និងចម្លាក់ថ្មកែវ រួមទាំងសិប្បកម្មកែច្នៃដើមត្នោត ដែលមានភាពល្បីល្បាញនិងទទួលស្គាល់ពីប្រជាពលរដ្ឋទូទាំងប្រទេស៕