កម្ពុជា-ថៃ ឯកភាពគ្នាពន្លឿនដំឡើង និងបើកដំណើរការច្រកទ្វារព្រំដែនអន្តរជាតិចំនួន៣ដែលនៅសេសសល់

រាជរដ្ឋាភិបាលកម្ពុជា និងរាជរដ្ឋាភិបាលថៃ បានប្តេជ្ញាបានឯកភាពសហការពន្លឿនដំឡើងនិងការបើកដំណើរការច្រកទ្វារព្រំដែនអន្តរជាតិចំនួន៣ទៀតដែលនៅសេសសល់ដើម្បីផ្លាស់ប្តូរពាណិជ្ជកម្មរវាងប្រទេសទាំងពីរកាន់តែប្រសើរ។

ការប្តេជ្ញានេះ បានធ្វើឡើងក្នុងកិច្ចប្រជុំអភិបាលខេត្តជាប់ព្រំដែន កម្ពុជា-ថៃ លើកទី៧ក្រោមអធិបតីភាពនាយឧត្តមសេនីយ៍ អនុភុង ផៅចិន្តា រដ្ឋមន្ត្រីក្រសួងមហាផ្ទៃ នៃព្រះរាជាណាចក្រថៃ និងសម្ដេចក្រឡាហោម ស ខេង
ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នៃព្រះរាជាណាចក្រកម្ពុជា និងជាប្រធានគណៈប្រតិភូកម្ពុជាកាលពីថ្ងៃទី១៦ ខែកញ្ញា ឆ្នាំ២០២២ តាមប្រព័ន្ធវីដេអូ។

យោងតាមសេចក្ដីប្រកាសព័ត៌មានរួម ស្ដីពីកិច្ចប្រជុំអភិបាលខេត្តជាប់ព្រំដែន កម្ពុជា-ថៃ លើកទី៧ បានឱ្យដឹងថា ច្រកទ្វារព្រំដែនចំនួន៣ដែលនៅសេសសល់ជាច្រកទ្វារអន្តរជាតិរួមមានទី១ ច្រកទ្វារព្រំដែនអានសេះ ខេត្តព្រះវិហារ ទល់ច្រកទ្វារព្រំដែនអានម៉ា ខេត្តឧប៊ុនរាជធានី។ ទី២ច្រកទ្វារព្រំដែនថ្មដា ខេត្តពោធិ៍សាត់ ទល់នឹងច្រកទ្វារព្រំដែនបានថាសែន
ខេត្តត្រាត និង ទី៣ច្រកទ្វារព្រំដែនជប់គគី ខេត្តឧត្តរមានជ័យ ទល់នឹងច្រកទ្វារព្រំដែនតាគូខេត្តបូរីរ៉ាំ។ ជាមួយគ្នានេះដែរភាគីទាំងពីរក៏បានយល់ព្រមពិនិត្យលទ្ធភាពក្នុងការដំឡើងកម្រិតច្រកទ្វារព្រំដែនឆរកា ខេត្តបាត់ដំបង ទល់នឹងបានម៉ាក់មួង​ ខេត្តត្រាតទៅជាច្រកព្រំដែនអន្តរជាតិ។

ជាងនេះទៀតភាគីទាំងពីរបានលើកទឹកចិត្តអាជ្ញាធរពាក់ព័ន្ធប្រទេសទាំងពីរឲ្យធ្វើការវាស់វែងលំអិតនៅភូមិព្រៃចាន់ ខេត្តបន្ទាយមានជ័យ និងណនម៉ាក់មួង ខេត្តស្រះកែវ ដើម្បីបង្កើតច្រកតំបន់ព្រំដែនថ្មីមួយ។ បន្ថែមលើនេះភាគីទាំងពីរបានឯកភាពថា មិនបិទច្រកព្រំដែនជាឯកតោភាគីឡើយ។ ការបិទច្រកព្រំដែនណាមួយគប្បីធ្វើឡើងដោយមានហេតុផលច្បាស់លាស់ និងតាមការចាំបាច់ និងដោយមានការព្រមព្រៀងពីអាជ្ញាធរពាក់ព័ន្ធនៃប្រទេសទាំងពីរ។

នាឱកាសនោះដែរ កិច្ចប្រជុំបានដំណើរការក្នុងបរិយាកាសមិត្តភាព សាមគ្គីភាព ភាតរភាព និងយោគយល់គ្នាទៅ វិញទៅមក។ ភាគីទាំងពីរទទួលស្គាល់នូវសារៈសំខាន់នៃទំនាក់ទំនង និងកិច្ចសហប្រតិបត្តិការយ៉ាងជិតស្និទ្ធរវាងបណ្តាខេត្តជាប់ព្រំដែនកម្ពុជា-ថៃ និងមានឆន្ទៈក្នុងការរក្សាសន្តិភាព មិត្តភាពកិច្ចសហប្រតិ បត្តិការ និងការអភិវឌ្ឍប្រកបដោយចីរភាពរវាងប្រទេសទាំងពីរ។

ភាគីកម្ពុជា យល់ព្រមទទួលធ្វើជាម្ចាស់ផ្ទះ នៃកិច្ចប្រជុះអភិបាលខេត្តជាប់ព្រំដែនកម្ពុជា-ថៃ លើកទី៨។ ដោយឡែក កាលបរិច្ឆេទ ពេលវេលា និងទីកន្លែងរៀបចំកិច្ចប្រជុំលើកទី៨ នឹងត្រូវពិភាក្សាគ្នាតាមផ្លូវទូត៕

អត្ថបទ៖ សំអឿន