ព័ត៌មានជាតិ

ការឈ្លានពានរបស់ថៃ នាំឲ្យខូចខាតដល់ហេដ្ឋារចនាសម្ព័ន្ធថាមពលខេត្តជាប់ព្រំដែនកម្ពុជាប្រមាណ ១០ លានដុល្លារ

បានផុស

៥ ខែ មុន

នៅ

ថ្ងៃសៅរ៍ ១៤ កុម្ភៈ ២០២៦

ដោយ

លោក កែវ រតនៈ រដ្ឋមន្រ្តីក្រសួងរ៉ែ និងថាមពលបានអះអាងថា ការឈ្លានពានរបស់ថៃបាននាំឲ្យខូចខាតដល់ហេដ្ឋារចនាសម្ព័ន្ធថាមពលតាមបណ្តាខេត្តជាប់ព្រំដែនរបស់កម្ពុជាគិតជាទឹកប្រាក់ប្រមាណ ១០ លានដុល្លារ។

លោករដ្ឋមន្រ្តីបានបញ្ជាក់ថា ការខូចខាតហេដ្ឋារចនាសម្ព័ន្ធថាមពលមានទាំងរបស់វិស័យឯកជន និងរបស់រដ្ឋ។

«រដ្ឋតាមរយៈអគ្គិសនីកម្ពុជា បានសងថ្លៃខូចខាតហេដ្ឋារចនាសម្ព័ន្ធអគ្គិសនីទាំងអស់ ដែលរងការបំផ្លាញពីការឈ្លានពាន។ ការខូចខាតត្រូវបានប៉ាន់ប្រមាណថា មានចំនួនជាង ៤ លានដុល្លារសម្រាប់ផ្នែកឯកជន និងលើសពី ៥ លានដុល្លារសម្រាប់អគ្គិសនីកម្ពុជា។ ការខាតបង់របស់វិស័យឯកជន ត្រូវបានរដ្ឋាភិបាលចេញសងទាំងស្រុង»។ នេះបើតាមលោក កែវ រតនៈ។

លោករដ្ឋមន្រ្តីមើលឃើញថា បើសិនមិនបានឈានទៅដល់ការអនុវត្តបទឈប់បាញ់នោះទេ ការខូចខាតនឹងកាន់តែធ្ងន់ធ្ងរថែមទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកថា ការអនុវត្តបទឈប់បាញ់បានជួយបញ្ឈប់ការបាត់បង់អាយុជីវិតរបស់ជនស៊ីវិល និងកងទ័ព ព្រមទាំងការខូចខាតដល់ហេដ្ឋារចនាសម្ព័ន្ធផ្សេងៗ។

ប្រទេសថៃត្រូវបានគេចាត់ទុកថាជាអ្នកឈ្លានពាន និងមិនទាន់បានអនុវត្តបទឈប់បាញ់ពេញលេញឡើយ។ រដ្ឋមន្រ្តីក្រសួងរ៉ែ និងថាមពលបានគូសបញ្ជាក់ថា កម្ពុជាប្រកាន់យកគោលការណ៍អត់ធ្មត់ ដោយសារកម្ពុជាជាប្រទេសតូច និងមិនទាន់មានសមាមាត្រកម្លាំងអាវុធស្មើនឹងប្រទេសធំឡើយ។

រាជរដ្ឋាភិបាលកម្ពុជាផ្តល់អាទិភាពលើការប្រើប្រាស់មធ្យោបាយច្បាប់អន្តរជាតិនិងការទូត ដើម្បីដោះស្រាយបញ្ហាដោយសន្តិវិធី។ គោលដៅចម្បងគឺកាត់បន្ថយការបាត់បង់ជីវិត និងការពារសេដ្ឋកិច្ចជាតិ ក៏ដូចជាហេដ្ឋារចនាសម្ព័ន្ធថាមពល និងផ្លូវថ្នល់។

ក្នុងអំឡុងសង្គ្រាមឈ្លានពានរបស់ថៃ រាជរដ្ឋាភិបាលបានប្រើវិធានការជាច្រើនដើម្បីគាំទ្រដល់កម្លាំងជួរមុខ។ បើតាមលោករដ្ឋមន្រ្តី ការជួយជ្រោមជ្រែងនៅសមរភូមិក្រោយ ទោះបីជាមិនបានកាន់អាវុធដោយផ្ទាល់ ប៉ុន្តែបុគ្គលិកអគ្គិសនីបានដើរតួនាទីយ៉ាងសំខាន់នៅជួរមុខ។ បុគ្គលិកអគ្គិសនីត្រូវពាក់មួកដែក និងរង់ចាំជួសជុលបណ្តាញភ្លើង សូម្បីតែក្នុងពេលមានគ្រោះថ្នាក់ពីយន្តហោះចម្បាំង៕