ប្រធានមន្ទីរសេដ្ឋកិច្ចខេត្តព្រៃវែង៖ ប្រាក់ចំណូលប្រមូលបានទាំងអស់ ត្រូវដាក់បញ្ចូលថវិកាជាតិ

មន្ទីរសេដ្ឋកិច្ច និងហិរញ្ញវត្ថុខេត្តព្រៃវែង បានរៀបចំកិច្ចប្រជុំសារាចរណែនាំស្តីពីការបិទបញ្ជីចំណូល-ចំណាយថវិកា និងការធ្វើរបាយការណ៍បូកសរុបការអនុវត្តចំណូល-ចំណាយថវិកាថ្នាក់ជាតិឆ្នាំ២០២២ នៅព្រឹកថ្ងៃទី១៣ ខែតុលា ដោយមានការអញ្ជើញចូលរួមដោយ លោក ទួន សុគន្ធ ប្រធានមន្ទីរសេដ្ឋកិច្ច និងហិរញ្ញវត្ថុខេត្តព្រៃវែង លោក ស៊ុន ចំណាន ប្រធានរតនាគារខេត្ត រួមទាំងមន្ត្រីអង្គភាពជុំវិញខេត្តជាច្រើនរូប។

លោក ទួន សុគន្ធ ប្រធានមន្ទីរសេដ្ឋកិច្ច និងហិរញ្ញវត្ថុខេត្តបានមានប្រសាសន៍ថា ប្រាក់ចំណូលទាំងអស់ ទោះបីស្ថិតក្នុង​ប្រភេទចំណូលណាក៏ដោយ អាណាប័កគ្មានសិទ្ធិដកចំណូលយកទៅចំណាយ ឬពន្យារពេល​បង់ចូលថវិកាថ្នាក់​ជាតិដើម្បីទុកប្រើប្រាស់ជាផលប្រយោជន៍ណាមួយឡើយ។ ប្រាក់ចំណូលទាំងអស់ត្រូវ​ប្រមូលបង់ចូលថវិកាថ្នាក់​ជាតិយ៉ាងយូរបំផុតត្រឹមថ្ងៃទី៣០ ខែធ្នូ ឆ្នាំ២០២២ ជាកំហិត។

 លោកប្រធានមន្ទីរ បានបន្តថា ក្រសួងស្ថាប័នអង្គភាពរដ្ឋបាលថ្នាក់ជាតិ និងមន្ទីរជំនាញរាជធានីខេត្តត្រូវរៀប​ចំតារាងឧបសម្ព័ន្ធរជ្ជទេយ្យបុរេប្រទាន និងតារាងគម្រោងចំណាយតាមនិតីវិធីបើកសាច់ប្រាក់មុនសម្រាប់ចំណាយ​ប្រាក់បេសកកម្មនៅក្នុងប្រទេសសិក្ខាសាលាកិច្ចប្រជុំផ្សេងៗសម្រាប់ឆ្នាំ២០២៣ រួចបញ្ជូនមកមន្ត្រីត្រួតពិនិត្យហិរញ្ញវត្ថុ និងគណនេយ្យករសាធារណៈឲ្យបានមុនដំណាច់ខែវិច្ឆិកា (មុនឆ្នាំអនុវត្តន៍)។

 ប្រាក់ចំណូលទាំងអស់របស់គ្រឹះស្ថានសាធារណៈរដ្ឋបាលត្រូវបូកសរុបនិងបង់ចូលគណនីប្រាក់បញ្ញើរបស់គ្រឹះស្ថានសាធារណៈរដ្ឋបាលនៅរតនាគារពាក់ព័ន្ធ ឬនៅធនាគារពាណិជ្ជដៃគូ ឬបេឡាជាបណ្តោះអាសន្នរបស់គណនេយ្យករយ៉ាងយូរ​បំផុតត្រឹមថ្ងៃទី៣០ ខែធ្នូ ឆ្នាំ២០២២៕ សៅគ្រី