អាជីវករ​និងពលរដ្ឋ​ក្នុងស្រុកស៉ីធរកណ្តាល​ សប្បាយ​រីក​រាយ​ឃើញអាជ្ញាធរស្ថាបនាផ្លូវបេតុងឡើចុះកំពង់ល្អស្អាត

ក្រុមអាជីវករ​ និងប្រជាពលរដ្ឋ​នៅអមសងខាងទន្លេតូចសប្បាយរីករាយ​ពេលមានផ្លូវបេតុងឡើងចុះស្អាត​ និងស្នើសុំឲ្យអាជ្ញាធរខេត្តព្រៃវែងជួយដោះស្រាយបញ្ហាសម្រាមនៅមាត់ទន្លេផ្សារព្រែកសណ្តែក​ ស្រុកស៉ីធរកណ្តាល​ ខេត្តព្រៃវែង​។

អាជីវករ​ និងប្រជាពលរដ្ឋ​ក្នុងស្រុកស៉ីធរកណ្តាល​ ខេត្តព្រៃវែង​ បានរួមគ្នា​ធ្វើផ្លូវបេតុងឡើងចុះកំពង់ចម្លងផ្សារព្រែកសណ្តែក​ ស្រុកស៉ីធរកណ្តាល​​ ឆ្លងមកឃុំល្វេ​ ស្រុកកោះសូទិន​ ខេត្តកំពង់ចាម​ ពួកគាត់​បានបង្ហាញអារម្មណ៍សប្បាយរីករាយ​ដោយ ពេលបានឃើញមានការសហការគ្នា​ សាមគ្គី​គ្នា​ រួមសប្បុរសជន​ពង្រីក​ និងកសាងផ្លូវបេតុងឡើងចុះនេះ​ ដើម្បីផ្តល់ភាពងាយស្រួលធ្វើដំណើរ ទាំងអ្នកភូមិត្រើយសងខាងទន្លេតូចនេះ។ ទន្ទឹមនឹងនេះដែរ​ អាជីវករលក់ដូរ​ និងពលរដ្ឋ​ ស្នើសុំ​ឲ្យមន្ត្រីជំនាញពាក់ព័ន្ធ​ រួមនឹងអាជ្ញាធរ​មូលដ្ឋាន​ ជួយដោះស្រាយបញ្ហាការទុកដាក់និងប្រមូលសម្រាមនៅមាត់ទន្លេផ្សារព្រែកសណ្តែកនេះផង។

បញ្ហាកង្វក់សម្រាមផ្សារព្រែកសណ្តែក​ ក្នុងស្រុកស៉ីធរកណ្តាល​ ខេត្តព្រៃវែង​ នៅតែគ្មានដំណោះស្រាយ​ បើទោះបី​អាជ្ញាធរឃុំ​ បានធ្វើកិច្ចសន្យាជាមួយអ្នកគ្រប់គ្រងភាស៉ី​ផ្សារច្រើនលើកក៍ដោយ។

គូសបញ្ជាក់​ថា​ បញ្ហាសម្រាម​ នៅចំណុចដងទន្លេ​តូចដែលស្ថិតនៅចំណុចព្រំប្រទល់ស្រុកស៉ីធរកណ្តាល​ ខេត្តព្រៃវែង​ ឆ្លងមកឃុំល្វេ​ ស្រុកកោះសូទិន​ ខេត្តកំពង់ចាម​ បានចោទជាបញ្ហាតាំងពីយូរណាស់មកហើយ។ ប្រជាពលរដ្ឋ​ សិស្សសាលា​ និងអាជីវករផ្សារ​ព្រែកសណ្តែក​ បានរិះគន់ចំពោះអាជ្ញាធរមូលដ្ឋាន​ ដោយគ្មានប្រសិទ្ធភាព​ ក្នុងការដឹកនាំ​ និងដោះស្រាយបញ្ហាមួយនេះបាន​ ព្រោះរាល់ថ្ងៃសម្រាមត្រូវបានកាយ ឬបោះចោលចូលទឹកទន្លេ​ ដែលធ្វើឲ្យប៉ះពាល់សោភណ្ឌដងទន្លេ និងជះក្លិនស្អុយពេញបរិស្ថានជុំវិញផងដែរ៕ អត្ថបទ​និងរូបភាព​៖​ឡេក​ ចាន់ពេជ្រ