ព័ត៌មានជាតិ

ខ្លោងទ្វារខាងកើតប្រាសាទព្រះខ័ន គ្រោងបើកឱ្យភ្ញៀវទេសចរឆ្លងកាត់ឡើងវិញ

បានផុស

១ year មុន

នៅ

ថ្ងៃសុក្រ ១៤ តុលា ២០២២

ដោយ

ខ្លោងទ្វារមួយខាងកើតនៃអាគារព្រះឥសូរ ដែលស្ថិតជ្រុងឦសាននៃប្រាង្គកណ្ដាលរបស់ប្រាសាទព្រះខ័ន បន្ទាប់ពីផ្អាកដំណើរការមួយរយៈ គ្រោងបើកឲ្យភ្ញៀវទេសចរដើរឆ្លងកាត់ជាថ្មីក្រោយបញ្ចប់ការជួសជុល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមលោក ជា សារិទ្ធ អ្នកបុរាណវិទូនិងជាប្រធានការដ្ឋានជួសជុលនៃអាជ្ញាធរជាតិអប្សរាបានលើកឡើងថា ក្រុមអ្នកជំនាញ បានចាប់ផ្តើមដំណើរនៃការជួសជុលខ្លោងទ្វារមួយនេះ តាំងពីដើមខែវិច្ឆិកា ឆ្នាំ២០២១ មកម៉្លេះ ហើយរហូតមកដល់ពេលបច្ចុប្បន្ន ក្រុមការងារបានបញ្ចប់ការងារបានជួសជុលរួចជាស្ថាពរហើយ។

លោកបន្តថា កំឡុងពេលនៃការជួសជុល ក្រុមការងារបានចាប់ផ្ដើមសិក្សាស្រាវជ្រាវឯកសារពាក់ព័ន្ធ កិច្ចការអភិរក្សកន្លងមក ធ្វើសម្រង់ប្លង់ ចុះបញ្ជើថ្ម ស្វែងរកថ្ម រៀបផ្គុំថ្មសាកល្បង វាស់ស្ទង់ សិក្សាវាយតម្លៃស្ថានភាពសំណង់ដែលរងការខូចខាត ធ្វើវិភាគហើយកំណត់នូវវិធីសាស្ត្រដើម្បីជួសជុល។

លោកថា អាគារព្រះឥសូរមានសសរចំនួន ២៤ ហើយស្រុតស្ទើរតែទាំងអស់ ចំណែករចនាសម្ព័ន្ធសំណង់ទ្រេតខ្លាំង ប្រឈមនឹងការដួលរលំ។ ក្រោយពីការងារជួសជុលរួច អាជ្ញាធរជាតិអប្សរាគ្រោងបើកវង់ទស្សនាឱ្យបានទូលំទូលាយជាងមុន ព្រោះពេលកន្លងមកអគារនេះត្រូវបិទមិនឱ្យភ្ញៀវឆ្លងកាត់។

លោកបញ្ជាក់បន្ថែមថា សំណង់ខ្លោងទ្វារអគារព្រះឥសូរ មានលក្ខណៈខុសប្លែកពីសំណង់ផ្សេងៗនៅក្នុងប្រាសាទព្រះ ខ័ន មានច្រកចេញបើកចំហគ្រប់ទិស គ្មានជញ្ជាំង ហើយមានដំបូលគ្របពីលើសសរចំនួន២៤ដើម។

គួររំលឹកផងថា រចនាសម្ពន្ធខ្លោងទ្វារខាងកើតនៃអគារព្រះឥសូរធ្លាប់បានរៀបចំទល់ទ្រ ដោយការទល់ទ្រនល់និងធ្នឹមអំពីបេតុងនៅឆ្នាំ១៩២៨ ដោយក្រុមអភិរក្សអង្គរនៃសាលាបារាំងចុងបូព៍ា។ អាជ្ញាធរជាតិអប្សរាបានសិក្សាព្រមទាំងធ្វើការទល់ទ្របន្ថែម នូវរចនាសម្ពន្ធដែលប្រឈមការដួលរលំ និងទាំងគ្រោះថ្នាក់បាក់ធ្លាក់ ដោយប្រើប្រាស់ទ្រនល់ឈើបន្ថែមលើទ្រនល់បេតុងចាស់។

ប្រាសាទនេះកសាងឡើងនៅសតវត្យរ៍ទី១២ ក្នុងឆ្នាំ១១៩១ ដោយព្រះបាទជ័យវរ្ម័នទី៧ សាងសង់ឡើងដើម្បីឧទ្ទិសដល់ព្រះវររាជបិតារបស់ព្រះអង្គ៕

Related Topics:អាជ្ញាធរអប្សរា