ព័ត៌មានជាតិ

គ្រោងសាងសង់ផ្លូវកាត់ថ្មី ធ្វើដំណើរពីស្រុកកោះធំទៅអ្នកលឿងកាន់តែលឿន

បានផុស

៤ ខែ មុន

នៅ

ថ្ងៃអង្គារ ១ វិច្ឆិកា ២០២២

ដោយ

ផ្លូវថ្មីមួយខ្សែទៀតស្ថិតនៅក្នុងខេត្តកណ្តាល គ្រោងនឹងបើកការដ្ឋានសាងសង់ឆាប់ៗនេះ ក្រោយសិក្សាចប់សព្វគ្រប់។

លោក ស៊ុន ចាន់ថុល រដ្ឋមន្រ្តីក្រសួងសាធារណការនិងដឹកជញ្ជូនបានថ្លែងក្នុងសន្និសីទរបស់ក្រសួងកាលពីសប្តាហ៍មុនថា ផ្លូវថ្មីមួយខ្សែនេះបានចរចាចប់សព្វគ្រប់ហើយ នៅរង់ចាំតែថ្ងៃបើកការដ្ឋានសាងសង់តែប៉ុណ្ណោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ស៊ុន ចាន់ថុល បានបញ្ជាក់ថា ផ្លូវលេខ ២៣ ជាផ្លូវថ្មីតភ្ជាប់ពីឃុំលើកដែកស្រុកកោះធំ ទៅស្រុកលើកដែកខេត្តកណ្តាល។

បើតាមលោករដ្ឋមន្រ្តី តាមរយៈផ្លូវថ្មីលេខ ២៣ នេះ បងប្អូននៅឃុំលើកដែក ស្រុកកោះធំ បើចង់ទៅលេងអ្នកលឿង មិនបាច់មកភ្នំពេញតាមផ្លូវជាតិលេខ១ គឺអាចធ្វើដំណើរត្រង់តាមផ្លូវលេខ ២៣ នេះតែម្តង។

ខេត្តកណ្តាលកំពុងអភិវឌ្ឍផ្លូវយុទ្ធសាស្រ្តថ្មីៗចំនួន ២ ខ្សែទៀត។ ផ្លូវទី១ មានប្រវែងបណ្តោយជាង ៧ គីឡូម៉ែត្រ ទទឹង ៦០ ម៉ែត្រ សាងសង់ចេញពីក្បែរច្រកទ្វារអន្តរជាតិក្អមសំណស្រុកលើកដែកឆ្ពោះទៅស្រុកកោះធំ និងផ្លូវថ្មីមួយខ្សែទៀតមានប្រវែង ៣២ គីឡូម៉ែត្រ ទទឹង៥០ម៉ែត្រ ចេញពីស្រុកលើកដែក ឆ្ពោះទៅផ្លូវក្រវាត់ក្រុងទី៣ ឬចំណុចបំបែកផ្លូវលេខ១ ម្តុំខាងលិចស្ពានអ្នកលឿង។

ដោយឡែក ក៏កំពុងសិក្សាកសាងផ្លូវប្រវែងជាង ៥ គីឡូម៉ែត្រ ទទឹង ៥០ ម៉ែត្រឆ្ពោះទៅស្រុកកោះធំមួយផ្សេងទៀតផងដែរ៕