មន្ទីរអភិវឌ្ឍន៍ជនបទខេត្តរតនគិរី បើកកិច្ចប្រជុំដាក់ទិសដៅពង្រឹងការអភិវឌ្ឍហេដ្ឋារចនាសម្ព័ន្ធនិងទឹកស្អាត

មន្ទីរអភិវឌ្ឍន៍ជនបទខេត្តរតនគិរី បានរៀបចំកិច្ចប្រជុំបូកសរុបលទ្ធផលការងារប្រចាំត្រីមាសទី២ និងលើកទិសដៅការងារបន្តសម្រាប់ត្រីមាសទី៣ ឆ្នាំ២០២៦ ដោយផ្តោត សំខាន់លើការពង្រឹងការអភិវឌ្ឍហេដ្ឋារចនាសម្ព័ន្ធជនបទ ការលើកកម្ពស់ការទទួលបានទឹកស្អាត និងអនាម័យបរិស្ថានជនបទ។

កិច្ចប្រជុំនេះរៀបចំឡើងនៅថ្ងៃទី ៤ ខែមិថុនា ឆ្នាំ ២០២៦ ក្រោមអធិបតីភាពលោក ហុង ឡុង រដ្ឋលេខាធិការក្រសួងអភិវឌ្ឍន៍ជនបទ និងលោក ស៊ូ សិរី អភិបាលរងខេត្តរតនគិរី ដើម្បីពិនិត្យវឌ្ឍនភាពការងារ និងកំណត់ទិសដៅអនុវត្តបន្តឱ្យស្របតាមគោលនយោបាយ និងយុទ្ធសាស្ត្ររបស់រាជរដ្ឋាភិបាល។

ថ្នាក់ដឹកនាំក្រសួងលោក ហុង ឡុង បានជំរុញឱ្យមន្ទីរបន្តយកចិត្តទុកដាក់លើការអភិវឌ្ឍផ្លូវជនបទ ការពង្រីកការផ្គត់ផ្គង់ទឹកស្អាត ការថែទាំហេដ្ឋារចនាសម្ព័ន្ធដែលបានសាងសង់រួច និងការពង្រឹងយន្តការតាមដានគម្រោងអភិវឌ្ឍន៍នានា ដើម្បីលើកកម្ពស់ជីវភាពរស់នៅរបស់ប្រជាពលរដ្ឋនៅតំបន់ជនបទឱ្យកាន់តែប្រសើរឡើង។ លោកក៏បានកោតសរសើរសល់ថ្នាក់ដឹកនាំ និងមន្ត្រីរាជការ នៃមន្ទីរអភិវឌ្ឍន៍ជនបទខេត្តរតនគិរី ដែលបានយកចិត្តទុកដាក់ខិតខំអនុវត្តនូវរាល់សកម្មភាពការងារ ដែលថ្នាក់ដឹកនាំក្រសួង ក៏ដូចជារដ្ឋបាលខេត្តរតនគិរីប្រគល់ជូន។

លោក ស៊ូ សិរី អភិបាលរងខេត្តរតនគិរី បានលើកឡើងថា វិស័យអភិវឌ្ឍន៍ជនបទក្នុងភូមិសាស្ត្រខេត្ត បានអនុវត្ត យ៉ាងខ្ជាប់ខ្ជួនតាមអនុសាសន៍ណែនាំរបស់ថ្នាក់ដឹកនាំក្រសួង និងថ្នាក់ដឹកនាំខេត្ត ស្របតាមគោលនយោបាយ របស់រាជរដ្ឋាភិបាល ក៏ដូចជាចក្ខុវិស័យរបស់ក្រសួង មានកម្មវិធីអាទិភាពគន្លឹះទាំង ៥គឺ៖ ទី១៖អភិវឌ្ឍហេដ្ឋារចនា សម្ព័ន្ធរូបវ័ន្ត និងគមនាគមន៍ជនបទ ប្រកបដោយភាពធន់, ទី២៖លើកកម្ពស់ការទទួលបានទឹកស្អាត និងអនាម័យបរិស្ថានជនបទ, ទី៣៖ ការងារអភិវឌ្ឍសហគមន៍ជនបទ ឌីជីថល និងចលនាភូមិគំរូ ទី៤៖លើកកម្ពស់ ការធ្វើពិពិធកម្មសេដ្ឋកិច្ចជនបទ និង ទី៥៖ការគ្រប់គ្រងស្ថាប័ន និងសេវាគាំទ្រទូទៅ។

តាមៈកិច្ចប្រជុំនេះ បានដាក់ចេញអោយរៀបចំផែនការសកម្មភាពប្រចាំឆ្នាំដោយផ្តោតទៅលើគោលនយោបាយក្រសួងដែលបានដាក់ចេញ ហើយត្រូវសហការជាមួយរដ្ឋបាលខេត្តអោយបានល្អ ព្រមទាំងត្រូវធ្វើការថែទាំរាល់ហេដ្ឋារចនាសម្ព័ន្ធដែលស្ថាបនា និងសាងសង់រួចផងដែរ៕

ដោយ៖ ខៀវ ចាប