ព័ត៌មានជាតិ

ស្ពានកោះយ៉ថ្មី គ្រោងនឹងបញ្ចប់ការសាងសង់នៅពាក់កណ្តាលខែកក្កដា ឆ្នាំ២០២៣

បានផុស

៣ years មុន

នៅ

ថ្ងៃចន្ទ ១៩ ធ្នូ ២០២២

ដោយ

កោះកុង ៖ ប្រធានមន្ទីរសាធារណការ និងដឹកជញ្ជូនខេត្តកោះកុង ឱ្យដឹងថា ក្រុមការងារជំនាញរបស់លោកនឹងពន្លឿនការសាងសង់ស្ពានកោះយ៉ថ្មីឱ្យចប់នៅពាក់កណ្តាលខែកក្កដា ឆ្នាំ២០២៣ មុននឹងការបោះឆ្នោតជ្រើសតាំងតំណាងរាស្ត្រ។

គិតចាប់ពីដើមខែសីហាមកទល់ថ្ងៃទី១៦ ខែធ្នូ ឆ្នាំ២០២៣ ការដ្ឋានសាងសង់ស្ពានកោះយ៉ បានសម្រេចការងារប្រមាណជា៦០ភាគរយហើយ ដោយការងារនៅសេសសល់៤០ភាគរយនោះគឺការខួងរណ្ដៅសសរស្ពានចុងក្បាលស្ពាន និងលើកទម្រទួលស្ពានតភ្ជាប់គ្នា។

នេះបើតាមការបញ្ជាក់របស់លោក អន ដាវុធ ប្រធានមន្ទីរសាធារណការ និងដឹកជញ្ជូនខេត្តកោះកុង រសៀលថ្ងៃទី១៩ខែធ្នូ ឆ្នាំ២០២២។

បើតាមលោក អន ដាវុធ លោកនឹងជំរុញដល់ក្រុមការងារ ដើម្បីពន្លឿនការអនុវត្តស្ថាបនាឱ្យចប់ជាស្ថាពរនៅពាក់កណ្តាលខែកក្កដា ឆ្នាំ២០២៣ខាងមុខ មុននឹងយុទ្ធការបោះឆ្នោតជ្រើសតាំងតំណាងរាស្ត្រមកដល់។ ស្ពានកោះយ៉ថ្មីប្រវែង១២៦ ម៉ែត្រ និងទទឹង១១ម៉ែត្រ ស្ថិតនៅក្នុងឃុំប៉ាក់ខ្លង ស្រុកមណ្ឌលសីមា ប្រើប្រាស់ថវិកាចំណាយសរុប១លាន៤សែនដុល្លារ។

ស្ពានបេតុងថ្មីស្រឡាងមួយនេះដែរ ធ្វើឡើងតបតាមអនុសាសន៍របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាកាលពីថ្ងៃទី២០ ខែមេសា ឆ្នាំ២០២២ ដោយអ្នកឧកញ៉ា លី យ៉ុងផាត់ ជាអ្នកទទួលបន្ទុកសម្របសម្រួលដោះស្រាយ។ គ្រាស្ពានដែកបាឡេកោះយ៉ បច្ចុប្បន្ន មានសភាពចាស់ទ្រុឌទ្រោម និងតែងបង្កគ្រោះថ្នាក់ដល់អ្នកដំណើរជាញឹកញាប់។

កន្លងទៅ ទាំងអាជ្ញាធរ និងពលរដ្ឋ បង្ហាញក្តីរំពឹងថា នៅពេលការដ្ឋានស្ពាននេះបញ្ចប់ជាស្ថាពរ វាជាចំណងដៃថ្មីមួយសម្រាប់មូលដ្ឋានស្រុកមណ្ឌលសីមា ព្រមទាំងផ្តល់ការចរាចរណ៍ប្រកបដោយសុវត្ថិភាព និងទាក់ទាញកំណើនភ្ញៀវទេសចរមកលេងកម្សាន្តស្ទើរគ្រប់រដូវកាល៕

អត្ថបទ ៖ សិរីវឌ្ឍនៈ